Read Diospa Simin Qelqa TITO 1 Bible Online

TITO 1 - Diospa Simin Qelqa bible

TITO 1

¹Ñoqan Pablon Diospa kamachin kani, Jesucristoq apostolnin. Paymi kachawarqan Diospa akllakusqankunata iñiyninkupi wiñachinaypaq, cheqaq-kayta reqsichinaypaq Diosta tukuy sonqo yupaychanaman hina.

²Ahinapin paykunaqa wiñay kawsayta suyakunqaku. Chay kawsaytan mana llullakuq Diosqa prometerqan, manaraq kay pachapas kamasqa kashaqtin,

³hinaspan tiemponpi siminta reqsichirqan allin willakuykunata willaqtiy. Chaykunatan Qespichiqninchis Diosqa confiawaspa willanaypaq kamachiwarqan.

⁴Kay cartatan qelqamuyki iñiypi cheqaq churíy Tito. Dios Yayanchis Qespichiqninchis Jesucristopiwan anchata khuyapayasunki, thak-kaytapas qosunki.

⁵Creta islapiqa saqerqayki ruwanaraq kaqta tukupanaykipaqmi, sapanka llaqtapi iñiqkuna ukhupi umalli runakunata churanaykipaqwan, imaynan nirqaykiña hinata.

⁶Umalli runaqa mana huchachanan kanan, ch'ulla warmiq qosallan, hinallataq wawankunapas Jesucristopi iñiq kananku, amataq millay puriymantapas mana kasukuq k'ullu kaymantapas qhawasqachu kananku.

⁷Michiq umalliqa mana huchachanan kanan, Diospa mayordomon kasqanrayku. Paymi kanan mana anchaykachaq, mana saltaq sonqo, mana machaq, mana maqanakuq, qolqellata mana chaninpi mana tariy munaq ima.

⁸Aswanpas payqa kanan qorpachaqllapuni, allinkaq ruwayta munaq, allin yuyaywan puriq, chaninta ruwaq, ch'uya kawsaq, cuerponta kamachiq.

⁹Payqa yachaqasqan cheqaq yachachikuytan hap'ikunan, ahinapin cheqaq yachachikuyta yachachispa hukkunata kallpachanqa, kutipakuqkunatapas upallachinqa.

¹⁰Askhan kanku mana kasukuq k'ullu runakuna, paykunan yanqa rimaspa q'otukuqkuna kanku, chaykunamanta astawanqa wakin iñiq judío runakunan kanku.

¹¹Chay runakunataqa upallachinapunin, paykunaqa mana allinkunata yachachispan familiakunata llapanta waqllichinku, qolqellata mana chaninpi tariyta munaspa.

¹²Kikin Creta islamanta paykunaq huknin profetankun nirqan: Creta runakunaqa hina llullapunin kanku, millay salqa animalkuna hinan, rakrapukunan, qellakunan, nispa.

¹³Chay nisqanqa cheqaqpunin, chayrayku paykunataqa k'arakta anyay, iñiyninkupi allin kanankupaq,

¹⁴judío runakunaq yanqa willakuyninkunatapas ama kasunankupaq, cheqaq-kaymanta t'aqakuq runakunaq kamachikusqankunatapas ama kasunankupaqwan.

¹⁵Ch'uya kaqkunapaqqa tukuy imapas ch'uyallataqmi, ichaqa huchawan qhellichasqakunapaqpas mana iñiqkunapaqpas manan imapas ch'uyaqa kanchu, yuyayninkupas concienciankupas huchawan qhellichasqa kasqanrayku.

¹⁶Paykunaqa “Diosta reqsiyku” ninkun, ichaqa ruwayninkuwanmi Diosta neganku. Chaykunataqa Diospas millakunmi, mana kasukuq k'ullun kanku, manapunin ima allin ruwaytapas atinkuchu.