Read Diospa Simin Qelqa FILEMÓN 1 Bible Online

FILEMÓN 1 - Diospa Simin Qelqa bible

FILEMÓN 1

¹Jesucristorayku preso kashaq ñoqa Pablon, wawqe Timoteopiwan qelqamuykiku llank'aqmasiyku munasqa Filemonman,

²munasqa pananchis Apiaman, soldadomasiyku Arquipoman, wasiykipi huñukuq iglesiamanpas.

³Dios Yayanchis Señor Jesucristopiwan anchata khuyapayasunkichis thak-kaytapas qosunkichis.

⁴Wawqéy Filemón, Diosmanta mañakuspaymi yuyarikullaykipuni, hinaspan Diosniyman graciasta qoni,

⁵Señor Jesuspi iñisqaykimanta llapa ch'uya iñiqkunatapas munakusqaykimantawan uyarispa.

⁶Diosmantan mañakuni iñiqmasiyku kaspayki, Jesucristowan llapa saminchayoq kasqanchista allinta entiendenaykipaq.

⁷Munakuyniykiwanmi anchatapuni kusikunipas kallpachakunipas. Qanmi, wawqéy, iñiqkunaq sonqonta llanllarichirqanki.

⁸Chayraykun Cristoq apostolnin kaspa imachus ruwanaykita mana manchakuspa kamachiykiman, ichaqa manan chhaynatachu kamachiyki,

⁹aswanpas munakuywanmi valekuyta munayki. Ñoqa Pablon, yuyaqña kani, hinallataq Jesucristorayku preso kaspa,

¹⁰anchata valekuyki, preso kashaspa tarisqay iñiypi churiy Onesimopaq.[1]

¹¹Payqa huk tiempopi manan imapaqpas servirqasunkichu, kunanmi ichaqa qanpaqpas ñoqapaqpas allin servicioyoq kapun.

¹²Chaymi ancha munakusqay Onesimota kutichimpushayki.

¹³Munaymanmi karqan kaypi ñoqawan qhepakunanta, allin willakuykunata willasqayrayku preso kasqaypi qanpa rantiykipi yanapawananpaq.

¹⁴Ichaqa manan imatapas mana simiykimantaqa ruwayta munarqanichu, allin ruwasqayki ama kamachisqa hinalla kananpaq, aswanpas munayniykimantapuni kananpaq.

¹⁵Ichapaschá Onesimoqa huk tiempo qanmanta t'aqakurqan, kunantaq wiñaypaqña payta chaskikapunaykipaq.

¹⁶Ichaqa manaña huk kamachita hinañachu, aswanpas kamachimantaqa aswan allin, munasqa wawqeta hina. Ñoqaqa anchatan paytaqa munakuni, qanqa astawanraqchá munakunki, mana runamasita hinallachu, aswanpas Señorpi iñiq wawqeta hinapuni.

¹⁷Chhaynaqa, llank'aq-masiykita hinachus qhawariwanki chayqa, ñoqa kikiyta hina payta chaskiykuy.

¹⁸Ima mana allintapas ruwarqasunki, otaq manuykipas rikhurin chayqa, ñoqaña qopusqayki.

¹⁹Ñoqa Pablon makiywanpuni kayta qelqamuyki, ñoqan chay manuta qopusqayki. Qanpas Cristopi iñiymantaqa manuypas kawaq hinan kashanki, chaymantaqa manan imaniykipasñachu.

²⁰Arí, wawqéy, Señorpi iñiq hinapuni valekusqayta uyariykuway, Cristopi wawqe hinapuni sonqoyta llanllarichiway.

²¹Kasukunaykita allinta yachaspaymi qelqamuyki, nisqaymantapas astawanraq ruwanaykita yachaspa.

²²Hinallataq valekuyki qorpachana wasita wakichipuwanaykipaq, suyakushanin Diosmanta mañapuwaqtiykichis qankuna watukuqta Señorpa kachamuwananta.

²³Jesucristorayku presomasiy Epafrasmi napaykamusunki,

²⁴hinallataq llank'aq-masiykunapas Marcos, Aristarco, Demas, Lucaspiwan napaykamusunkiku.

²⁵Señorninchis Jesucristo anchata saminchasunkichis.