Read Diospa Simin Qelqa HEBREOS 1 Bible Online

HEBREOS 1 - Diospa Simin Qelqa bible

HEBREOS 1

¹Ñawpa tiempopin Diosqa ñawpa taytanchiskunaman imaymanamanta askha kutita profetakunawan rimapayarqan,

²kunantaq kay p'uchukay tiempokunapi Churinwan rimapayawanchis. Churinwanmi Diosqa hinantin pachakunatapas ruwarqan, hinaspa tukuy herencia chaskiq kananpaq payta churarqan.

³Paymi Diospa hatun-atiyninpa lliphlli-kayninqa, Diospa kikin rikch'ayninpunitaq kanpas, paymi tukuy imaymanatapas atiyniyoq siminwan hap'ishan. Paymi runakunaq huchanta Dioswan pampachachispa hanaq pachapi Diospa paña ladonpipas tiyaykurqan.

⁴Diospa Churinqa angelkunamantapas aswan kurak-kaymanmi ayparqan, paykunaq sutinmantapas aswan qollana sutitapunin chaskirqan.

⁵Diosqa manan hayk'aqpas mayqen angeltapas nirqanchu: “Qanmi Churiyqa kanki, kunan p'unchaymi churiyayki”, nispaqa. Manallataq mayqen angelmantapas nirqanchu: “Ñoqan Yayanqa kasaq, paytaq Churiy kanqa”, nispaqa.

⁶Phiwi Churinta kay pachaman kachamuspanmi ichaqa nin: “Diospa llapallan angelninkuna payta yupaychachunku”, nispa.

⁷Angelninkunamantataq nin: “Diosmi angelninkunata wayraman hina tukuchin, kamachinkunatapas rawrashaq ninaman hina tukuchin”.

⁸Churintan ichaqa nin: “Qanqa Diosmi kanki, wiñay-wiñaypaqmi lliwta kamachikunki, chaninkaqta ruwaspallapunin kamachikunki.

⁹Chaninkaqtan munakurqanki, mana chaninkaqtataq cheqnikurqanki, chaymi ñoqa Diosniykiqa wakinkunamantapas, hatunchaspa aceitewan hawispa kusichirqayki”, nispa.

¹⁰Nillantaq: “Qanqa Señormi kanki, qallariypiqa qanmi kay pachata teqsicharqanki, hanaq pachatapas makiykiwanmi ruwarqanki.

¹¹Chaykunaqa tukukapunqan, qanmi ichaqa kashallankipuni. Llapallanmi chaykunaqa p'acha hina mawk'ayapunqa,

¹²huk p'achata hinan chaykunata k'uyuykunki, huk p'acha hinataqmi cambiasqa kanqa, qanmi ichaqa kaqllapuni kanki, kawsayniykipas manan hayk'aqpas tukukunqachu”, nispa.

¹³Diosqa manan hayk'aqpas mayqen angeltapas nirqanchu: “Paña ladoypi tiyaykuy, awqaykikunata chaki sarunaykiman churanaykama”, nispaqa.

¹⁴Llapan angelkunaqa Diospa kamachin ruwaq espiritukunallan kanku, paykunaqa Diospa qespichisqankunaq allinninpaq yanapaqta kachamusqallanmi kanku.