Read Diospa Simin Qelqa HEBREOS 10 Bible Online

HEBREOS 10 - Diospa Simin Qelqa bible

HEBREOS 10

¹Moisespa kamachikuy siminqa hamuq allinkaqkunaq llanthun hinallan karqan, manan chay kikin allinkaqkunapunichu. Diosman qayllaykuqkunaqa watan-watanmi kikin sacrificiokunallatapuni haywarqanku, chaymi kamachikuy simiqa mana atinchu paykunata Diospa chaskinanpaq hina ruwayta.

²Kamachikuy simichus Diospa chaskinanpaq hina ruwayta atinman chayqa, manañachá chay sacrificiokunata haywankumanñachu karqan. Chay haywaqkunaqa ch'ulla kutillapichá cheqaqtapuni ch'uyanchasqa kaspanku manaña huchaq ñit'isqanchu kankuman karqan.

³Aswanpas chay sacrificiokunan huchankuta sapa wata hina yuyarichiq,

⁴torokunaq orqo cabrakunaq yawarnin huchankuta mana qechuyta atisqanrayku.

⁵Chayraykun Cristoqa kay pachaman hamuspa nirqan: “Manan sacrificiotapas ofrendatapas munarqankichu, aswanmi huk cuerpota wakichipuwarqanki.

⁶Hucha pampachay sacrificiokunapas ruphachina sacrificiokunapas manan sonqoykiman chayaqchu karqan”, nispa.

⁷Chaymi nirqani: Diosnilláy, munayniykita ruwanaypaqmi hamushani, imaynan qelqa k'uyupi ñoqamanta qelqasqa kashan hina, nispa.

⁸Ñawpaqtaqa ninmi: Manan munarqankichu sacrificiotapas, ofrendatapas, hucha pampachay sacrificiotapas, ruphachina sacrificiotapas, chaykunaqa manan sonqoykiman chayaqchu karqan, nispa. Chaytan nin kamachikuy simiman hinaña chaykuna haywana karqan chaypas.

⁹Chaymantapas nillantaqmi: Diosnilláy, munayniykita ruwanaypaqmi hamushani, nispa. Chay hinaqa, Diosmi ñawpaqkaq sacrificiokunata wikch'un, chaykunaq rantinpitaq mosoq sacrificiota churan.

¹⁰Diosmi ch'uyanchawanchis, paypa munayninta ruwaspa Jesucristoq ch'ulla kutillata wiñaypaq kikin cuerponta sacrificiopi entregakusqanrayku.

¹¹Llapa sacerdoten sapa p'unchay servin, kikin sacrificiokunallatapuni askha kutita haywaspanku. Chay sacrificiokunaqa manan hayk'aqpas huchakunata qechuyta atinchu.

¹²Criston ichaqa ch'ulla sacrificiollata huchakunamanta wiñaypaq haywarqan, hinaspa Diospa paña ladonpi tiyaykurqan.

¹³Chaypin kunan suyashan awqankunata chaki sarunanman churanankama.

¹⁴Payqa ch'ulla ofrendallawanmi huchamanta ch'uyanchasqakunata Diospa wiñaypaq chaskikapunanpaq hinapuni ruwarqan.

¹⁵Kaqllataq Santo Espiritupas chaymanta willawanchis,

¹⁶Señor Diosmi nin: “Qhepa p'unchaykunapiqa kay hinatan paykunawan rimanakusaq: Sonqonkupin kamachikuyniykunata churasaq, yuyayninkupitaq chaykunata qelqasaq”, nispa.

¹⁷Nillantaqmi: “Huchankutapas mana chanin ruwasqankutapas manan hayk'aqpas yuyarisaqñachu”, nispa.

¹⁸Chhaynaqa, huchakunachus pampachasqa kapun chayqa, manañan necesitakunñachu huchamanta haywana sacrificioqa.

¹⁹Wawqe-panaykuna, Jesucristoq yawarninraykun kunanqa Ch'uyay-ch'uya Cheqasman mana manchakuspa haykuyta atinchis.

²⁰Cristoqa wañuspanmi Diospa kashasqan t'aqaq cortinanta haykuspa huk mosoq kawsashaq ñanta kicharipuwarqanchis Diosman qayllaykunanchispaq, chayqa paypa cuerponmi.

²¹Cristoqa hanaq pacha Diospa wasinpi uma sacerdotenchismi.

²²Chayrayku, Diosman asuykusunchis cheqaq sonqowan, mana kuyuriq hunt'asqa iñiywan, mana allin yuyaymanta ch'uyanchasqa sonqowan, ch'uya unuwan mayllisqa cuerpowan.

²³Willakusqanchis suyakuyninchispi qaqata sayasun, ama iskayrayaspa, prometewaqninchis Diosqa hunt'aqpuni kasqanrayku.

²⁴Hukkuna hukkunawan kallpachanakusunchis aswanta munanakunanchispaq, allin ruwaykunatapas ruwananchispaq.

²⁵Ama huñunakuyninchista saqesunchu, imaynan wakinkuna saqenku hinataqa, aswanpas astawanraq kallpachanakusun, Señorpa kutimunan p'unchay qayllaykamushasqanta yachashaspanchisqa.

²⁶Cheqaq-kayta reqsishaspanchisñachus yuyaymantapuni huchallikusunchis chayqa, manan hucha pampachaq sacrificio kanñachu,

²⁷aswanpas manchay-manchay hatun juiciollañan suyawanchis. Chaypin Diospa awqankunataqa nina rawray ruphaykapunqa.

²⁸Pipas Moisespa kamachikuy siminta mana kasukuqqa iskay otaq kinsa testigokunaq sut'inchasqanmi mana khuyapayaspa wañuchisqa karqan.

²⁹Chay hinaqa, pipas Diospa Churinta sarunchan chayqa, Cristoq yawarninwan ch'uyanchasqa kaspa chay rimanakuyta cheqaqchaq yawartapas qhellipaq hap'in chayqa, khuyapayaqnin Espiritutapas k'amin chayqa, ¿imayna muchuchisqaraqtaq kanqa?

³⁰Yachanchismi Señorpa nisqanta. Paymi nirqan: “Ñoqan awqa vengakuqqa kani, ñoqan paymanqa kutichipusaq”, nispa. Nillarqantaqmi: “Ñoqa Señor Diosmi llaqtayta juzgasaq”, nispa.

³¹¡Manchay-manchaymi kawsaq Diospa makinman urmayqa!

³²Diospa k'anchaykusqasuykichis p'unchaykunata yuyariychis, chaypachan sinchi sasakunata muchushaspapas qaqata sayarqankichis.

³³Mayninpin runakunaq qayllanpi k'amisqa, muchuchisqa karqankichis, mayninpitaq chay hinata muchuqkunawan muchuysikuq-masi karqankichis.

³⁴Preso kaqkunatapas khuyapayarqankichismi, kaqniykichista qechushasuqtiykichispas kusisqallapunin muchurqankichis, hanaq pachapi aswan allin kaqniykichis, mana hayk'aq tukukuq kasqanta yachaspa.

³⁵Amapuni Señorpi suyakuyniykichistaqa chinkachiychischu, chay hina kaspaqa allin-allin saminchasqan kankichis.

³⁶Qankunaqa anchatapunin pacienciakunaykichis Diospa munayninta ruwanaykichispaq, ahinapi paypa prometesqanta chaskinaykichispaq.

³⁷Diospa Simin Qelqan nin: “Kunallanmi, usqhayllan, chay hamunanpaq kaqqa hamunqa, manan tardamunqañachu.

³⁸Chaninchasqay runaqa iñiywanmi kawsanqa. Qhepamanchus kutirikapunqa chayqa, manan paymantaqa kusisqachu kasaq”, nispa.

³⁹Ñoqanchisqa manan kutirikapuspa chinkayman riqkunachu kanchis, aswanpas qespichisqa kananchispaq iñiyniyoqkunan kanchis.