Read Diospa Simin Qelqa HEBREOS 13 Bible Online

HEBREOS 13 - Diospa Simin Qelqa bible

HEBREOS 13

¹Wawqe-panapuraqa munanakullaychispuni.

²Wasiykichisman chayamuqkunataqa qorpachallaychispuni. Chay hinata qorpachaspan wakinqa mana yachaspa angelkunatawanpas qorpacharqanku.

³Presokunamanta yuyarikuychis, paykunawan kuskapas preso kashawaqchis hinata. Muchuchisqakunamantapas yuyarikullaychistaq, qankunaq cuerpoykichispas muchushanman hinata.

⁴Casarakuytaqa lliwlla ancha allinpaq hap'ichunku, casarasqakunapas amataq wasanchanakuchunkuchu. Ichaqa qhelli huchapi puriqkunatan wasanchaqkunatawanmi Diosqa huchachanqa.

⁵Ama qolqe sonqo kaychischu, kunan imachus kapusunkichis chayllawan kusisqa kawsaychis. Diosmi nirqan: “Manan saqerparisqaykichu, manataqmi wikch'urparisqaykipaschu”, nispa.

⁶Chay hinaqa, mana manchakuspan niyta atinchis: Señormi yanapaykuwaqniyqa, manan manchakusaqchu. Runari, ¿imanawanqataq? nispa.

⁷Diospa siminta willaqniykichis umallikunamanta yuyarikuychis. Imaynatachus kawsasqankuta yachaqakuychis, iñiyninkutapas qatichikullaychistaq.

⁸Jesucristoqa iman kaqllapunin qaynapas, kunanpas, wiñay-wiñaypaqpas.

⁹Ama imaymana rikch'aq yachachikuykunawanpas kayman chayman apaykachachikuychischu. Mikhunapaq kamachikuykunaqa manan sonqonchista kallpachanchu, chay kamachikuykuna hunt'ayqa manan hayk'aqpas runata yanapanchu. Aswanpas sonqonchista Diospa munakuyninwan kallpachaymi aswan allinqa.

¹⁰Ñoqanchispaqqa huk-hina sacrificion altarpi kapuwanchis, chaymantaqa manan yupaychana ñawpa karpapi kaq sacerdotekunaqa mikhuyta atinkumanchu.

¹¹Uma sacerdoten Ch'uyay-ch'uya Cheqasman animalkunaq yawarninta apaykuq huchata pampachananpaq, chaykunaq aychantataq ichaqa karpa-karpa hawapi ruphachiqku.

¹²Chay hinan Jesuspas llaqta punku hawapi wañurqan runakunata kikin yawarninwan ch'uyanchananpaq.

¹³Chhaynaqa, haku Jesusman, karpa-karpa hawaman, imaynan pay p'enqayta muchurqan chay hinata muchuspa.

¹⁴Kay pachapiqa manan wiñaypaq takyaq llaqtanchisqa kanchu, aswanpas chayraq rikhurimunqa chay llaqtatan suyakushanchis.

¹⁵Chayrayku, Jesucristopi Diosman yupaychay sacrificiota qollasunpuni, chay sacrificioqa Diospa sutinta sut'ita siminchiswan rimariyninchismi.

¹⁶Amataq allinkaqta ruwaytapas yanapakuytapas qonqaychischu, chay hina sacrificiokunawanmi Diosqa kusikun.

¹⁷Umalliykichiskunata uyariychis, paykunata kasuychis, paykunaqa qankunatan michishallasunkichispuni, qankunamanta Diosman cuenta qonayoq kasqankuta yachaspa. Paykunata kasuychis kusisqa llank'anankupaq, mana chayqa llakisqan kankuman, qankunapaqpas manan allinniykichispaqchu kanman.

¹⁸Ñoqaykupaq Diosmanta mañapuwayku, allintan yachayku allin concienciayoq kasqaykuta, tukuy imaymanapitaqmi allintapuni puriyta munayku.

¹⁹Aswantaqa valekuykichis, qankunaman usqhaylla kutimunaypaq Diosmanta mañapuwanaykichistan.

²⁰Thak-kay qoq Diosmi Señorninchis Jesucristota wañusqakuna ukhumanta kawsarichimpurqan. Paymi yawarninwan wiñaypaq rimanakuyta cheqaqchaspa ovejakunaq qollana michiqnin kapurqan.

²¹Diosmi qankunata tukuy imaymana allin ruwayta yachachisunkichis paypa munayninta ruwanaykichispaq, Jesucristowantaq tukuy ima munasqanta ñoqanchispi pay ruwachun. ¡Wiñay-wiñaypaq yupaychasqa Jesucristoqa kachun! Amén.

²²Valekuykichismi, wawqe-panaykuna, kay kunaykuy simikunata kasukunaykichispaq, kay pisi simillapin qelqamuykichis.

²³Yachaychis wawqenchis Timoteoqa preso kasqanmanta kacharisqañan kapun. Usqhayllachus chayamunqa chayqa, paywan kuskan watukuqniykichis hamusaq.

²⁴Llapa umalliykichiskunata, hinallataq ch'uya iñiq wawqe-panakunatapas napaykapuwaychis. Italia suyupi kaq wawqe-panakunan napaykamusunkichis.

²⁵Llapallaykichistan Diosqa anchata saminchasunkichis.