Read Diospa Simin Qelqa HEBREOS 7 Bible Online

HEBREOS 7 - Diospa Simin Qelqa bible

HEBREOS 7

¹Chay Melquisedecqa karqan Salem llaqta reymi, hinallataq Ancha Hatun Diospa sacerdoten. Reykunata maqanakuypi atipasqanmanta Abraham kutimushaqtintaq Melquisedecqa Abrahamwan tupaq lloqsimurqan, hinaspan payta samincharqan.

²Chaymi Abrahamqa Melquisedecman diezmota qorqan maqanakuypi lliw qechumusqankunamanta. Melquisedec sutiqa “Chanin Rey” ninantan nin. Salem Rey sutiqa “Thak-kay Rey” ninantan nin.

³Payqa rikhurin mana taytayoq, mana mamayoq, mana ñawpa tayta-mamayoq. Manallataqmi nacesqanpas wañusqanpas yachakunchu, aswanpas Diospa Churinman rikch'akuspan wiñaypaq sacerdote kapun.

⁴Chay hinaqa, qhawariychis may hina chaniyoqchus Melquisedecqa kasqanta. Paymanmi ñawpa taytanchis Abrahampas maqanakuypi lliw qechumusqanmanta aswan allinninkaqmanta diezmota qorqan.

⁵Diospa kamachikuy siminman hinaqa Leví aylluq mirayninmanta kaq sacerdotekunan runakunamanta diezmotaqa chaskinanku karqan, chaytan chaskirqanku llaqta-masinkumanta, paykunaqa llapankupas Abrahampa mirayninmi karqanku.

⁶Melquisedectaq ichaqa mana Leví ayllu miraymanta kashaspapas, Abrahammanta diezmota chaskirqan, hinaspan prometesqakunata chaskiq Abrahamta samincharqan.

⁷Cheqaqtapunin saminchaqqa aswan kurak saminchasqamantaqa.

⁸Leví runakunaq ruwasqanman hinaqa wañuq runakunan diezmota chaskirqanku, Melquisedecpa ruwasqanman hinataq mana wañuq nisqa runa diezmota chaskirqan.

⁹Chaymi kay hinata nisunman: Diezmota chaskiq Levipas Abrahampin diezmota qorqan, nispa.

¹⁰Abrahamwan tupaq Melquisedec lloqsimushaqtinmi Leviqa ñawpa taytan Abrahampi kasharqan, manaraq nacemurqanchu chaypas.

¹¹Israel runakunaqa Aaronpa miraynin Leví sacerdotekunawanmi Diospa kamachikuy siminta chaskirqanku. Chay sacerdotekunaq ruwasqanchus hunt'asqa kanman karqan chayqa, manañachá necesitakunmanchu karqan huk t'aqa sacerdote hatarichiyqa. Chay sacerdoteqa manan Aaronpa t'aqanmantañachu hamurqan, aswanpas Melquisedecpa t'aqanmantan.

¹²Sacerdotechus cambiasqa kaqtinqa kamachikuy simipas cambiasqallataqmi kanan.

¹³Diospa Simin Qelqan Señorninchismanta riman. Payqa manan Leví ayllumantachu karqan, paypa ayllunmantaqa manan pipas sacerdote karqanchu.

¹⁴Señorninchispa Judá ayllumanta nacesqantaqa yachanchismi, Moisespas sacerdotemanta rimashaspaqa manan imatapas chay ayllumanta nirqanchu.

¹⁵Chay nisqaykunaqa aswan sut'iraqmi, Melquisedec hina wak sacerdote hatarimun chayqa.

¹⁶Payqa manan runaq kamachikusqanman hina churasqachu karqan, manallataq mirayninman hinapaschu, aswanpas mana tukukuq kawsaypa atiyninman hina churasqan karqan.

¹⁷Paymantan kay hinata Diosqa nin: “Qanmi wiñaypaq sacerdote kanki, Melquisedecpa t'aqanman hina”, nispa.

¹⁸Chay hinaqa, ñawpaqkaq kamachikuyqa tukukapunmi, mana atiyniyoq mana imapaq serviq kasqanrayku.

¹⁹Kamachikuy simiqa manan imatapas hunt'asqaman tukuchiyta atirqanchu. Chaymi kamachikuy simiq rantinpi aswan allin suyakuyta Diosqa qowanchis, chay suyakuywan payman asuykunanchispaq.

²⁰Chay sacerdotetan Diosqa juramentowan churarqan. Wakin sacerdotekunaqa manan juramentowan churasqachu karqanku,

²¹chay sacerdotetan ichaqa juramentowan churaspa Diosqa nirqan: “Ñoqa Señor Diosmi jurarqani: Qanmi wiñaypaq sacerdoteqa kanki”, nispa. Manataqmi “imapaqmi jurarqani” nisaqchu, nispa.

²²Chayraykun Jesusqa aswan allin rimanakuyta ñoqanchispaq allinta sayachin.

²³Chay wakin sacerdotekunaqa wañuq kaspankun mana unaytachu servirqanku, chaymi askha karqanku.

²⁴Jesusmi ichaqa wiñay kawsaq kaspa, sacerdote-kayninta mana pimanpas saqenchu.

²⁵Ahinapin payqa Diosman asuykachisqankunata wiñaypaq qespichiyta atin, paykunapaq Diosmanta mañapuspa wiñayta kawsasqanrayku.

²⁶Chay hinaqa, chay uma sacerdotetapunin ñoqanchisqa necesitasharqanchis. Payqa ch'uyan, mana huchayoq, chanin, llapa huchasapakunamanta t'aqasqa, hanaq pachapi Diospa hatunchasqanpuni.

²⁷Wakin uma sacerdotekunaqa sapa p'unchaymi paykuna kikinkuq huchankumanta sacrificiota haywarqanku, chaymantataq llapa llaqtaq huchankunamanta haywarqanku. Jesusmi ichaqa runakunaq huchanmanta pay kikinta sacrificiopi ch'ulla kutillata wiñaypaq haywakurqan.

²⁸Kamachikuy simiqa pisi kallpayoq runakunallatan uma sacerdote kananpaq churarqan. Diospa juramentowan siminmi ichaqa kamachikuy simi qhepataña karqan, chay juramenton Churita uma sacerdote kananpaq churan, paymi wiñaypaq hunt'asqapuni kapun.