Read Diospa Simin Qelqa SANTIAGO 2 Bible Online

SANTIAGO 2 - Diospa Simin Qelqa bible

SANTIAGO 2

¹Wawqe-panallaykuna, musphana atiyniyoq Señorninchis Jesucristopi iñiyniyoq kaspaykichisqa, ama rikch'ayninta qhawaspachu runakunata allinpaq hap'iychis.

²Qankunaq huñukuyniykichisman huk runa qori sortijayoq, sumaq p'achayoq haykumunman, huk wakcha runapas haykumullanmantaq thanta p'achayoq chayqa,

³sumaq p'achayoqkaq runata allinpaq qhawarispaykichistaq niwaqchis: Qanqa kay allinkaq tiyanapi tiyaykuy, nispa, wakcha runatataq ichaqa niwaqchis: Qanqa chayllapi sayaykuy, nispa, otaq: Kay pampapi chakiy qayllapi tiyaykuy, nispa.

⁴Chayta ruwaspaykichisqa, ¿manachu qankuna kikiykichis runakunata akllashankichis? ¿Manachu millay yuyayniyoq juezkunaña kankichis?

⁵Munakusqay wawqe-panaykuna, kayta uyariychis: Diosqa kay pachapi wakchakunatan akllakurqan iñiypi qhapaq kanankupaq, munakuqninkunaman prometesqanman hina qhapaqsuyunpi kanankupaqwan.

⁶Qankunan ichaqa wakchakunata p'enqachirqankichis. ¿Manachu qhapaqkunaqa muchuchisunkichis? ¿Manachu paykuna kikinku juezkunamanpas aysasunkichis?

⁷¿Manachu paykunaqa Jesucristoq ancha chaniyoq sutinta ñakanku? Chay sutitan qankunaqa sut'ita rimarirqankichis.

⁸Diospa Simin Qelqan nin: “Runamasiykita munakunki qan kikiykita hina”, nispa. Chay hinaqa, cheqaqtapunichus chay allinnin kamachikuy simita hunt'ankichis chayqa, allintan ruwankichis.

⁹Runata imaynachus kasqanta akllaspaykichismi ichaqa, huchallikunkichis, kamachikuy simiq huchachasqantaq kankichis, chay kamachikuyta p'akisqaykichis hawa.

¹⁰Pipas kamachikuy simita lliwta hunt'aspa huk chhikallanta pantarqon chayqa, llapallanmantan huchachasqa rikukun.

¹¹Kikin Diosmi nirqan: “Aman wasanchankichu”, nispa. Nillarqantaq: “Aman pitapas wañuchinkichu”, nispa. Chay hinaqa, wasanchay huchata mana ruwawaqchu, ichaqa wañuchiwaqtaq karqan chayqa, kamachikuy simita p'akiqñan kanki.

¹²Qankunaqa rimaychispas ruwaychispas kacharichiwaqninchis kamachikuy simiq nisqanwan juzganapaq kaqkuna hinapuni.

¹³Mana khuyapayakuqpaqqa mana khuyapayakuyniyoq huchachaymi kanqa, khuyapayakuqkunan ichaqa taripay p'unchaypi atipaqkuna kanqaku.

¹⁴Wawqe-panallaykuna, pipas: Iñiyniyoqmi kani, ninman, manataq allinkaqkunata ruwanmanchu chayqa, ¿ima allintaq kanman? ¿Chay iñiyqa atinmanchu payta qespichiyta?

¹⁵Huk wawqepas otaq huk panapas mana p'achayoq, mana mikhunayoq sapa p'unchay kasaqtin,

¹⁶mayqennillaykichispas paykunata niwaqchis: Allillanña ripuychis, allinta p'istukuychis, saksaykuychis, nispa, ichaqa manataq kawsananpaq imakunachus pisisqanta paykunaman qowaqchischu chayqa, ¿ima allintaq kanman?

¹⁷Chay hinallataqmi iñiypas allin kaqkunata mana ruwaspaqa wañusqa kashan.

¹⁸Icha pipas ninqapaschá: Qanqa iñiyniyoqmi kanki, ñoqataq allinkunata ruwani, nispa. Chay hinaqa ninin: Rikuchiway iñiyniykita allinkaqta mana ruwaspalla, ñoqataq allinkaqta ruwaspa iñiyniyta rikuchisqayki, nispa.

¹⁹Qanqa iñinkin Diosqa ch'ullalla kasqanta, allinmi chayqa. Ichaqa supaykunapas creenkun, manchakuymantataq khatatatanku.

²⁰Mana yuyayniyoq runa, ¿manachu yachanki mana ruwayniyoq iñiyqa wañusqa kasqanta?

²¹Ñawpa taytanchis Abrahampas iñiywan ruwasqanraykun Diospa chaninchasqan karqan, maypachachus altar patapi churin Isaacta sacrificiopi haywasharqan chaypacha.

²²Qhawariy, Abrahampa iñiyninqa ruwasqankunawanmi rikuchikurqan, ruwasqankunawanmi iñiyninpas hunt'asqa-kayman ayparqan.

²³Ahinapin Diospa Simin Qelqa hunt'akurqan. Chaymi nin: “Abrahammi Diospi iñirqan, chaymi Diosqa payta chanincharqan”, nispa. Ahinapin Abrahamqa Diospa amigon nisqa kapurqan.

²⁴Chay hinaqa, yachankichismi, runaqa ruwasqankunapiwan chaninchasqa kasqanta, manataq iñiyllawanchu.

²⁵Chhaynallataqmi rabona warmi Rahabpas ruwasqankunawan chaninchasqa karqan. Paymi qhamiyaq kachasqakunata qorpacharqan, hinaspan wak ñanninta paykunata kachapurqan.

²⁶Imaynan mana espirituyoq cuerpoqa wañusqa kashan, chay hinallataqmi allinkunata mana ruwaqtinchisqa iñiyninchispas wañusqa kashan.