Read Diospa Simin Qelqa SANTIAGO 4 Bible Online

SANTIAGO 4 - Diospa Simin Qelqa bible

SANTIAGO 4

¹¿Maymantataq maqanakuykunapas ch'aqwaykunapas qankuna ukhupi rikhurin? Chaykunaqa sonqoykichispi churanakuq millay munayniykichiskunamantan rikhurin.

²Qankunaqa imatapas tariytan munankichis, mana tarispataq wañuchinkichis. Qankunaqa sinchitan munapayankichis, mana imatapas tarispataq ch'aqwaspa maqanakunkichis, imachus munasqaykichistapas manataq chaskinkichischu, Diosmanta mana mañakusqaykichisrayku.

³Mañakuspaykichispas manataqmi chaskinkichischu, mana allinta mañakusqaykichisrayku, mañakuspaykichisqa aycha kusichiypi tukunallaykichispaqmi munankichis.

⁴¡Ay, Diosta wasanchaq runakuna! ¿Manachu yachankichis kay pacha kaqkunaman k'askakuqqa Diospa awqan kasqanta? Pipas kay pacha kaqkunaman k'askakuyta munaqqa Diospa awqanmi kapun.

⁵Diospa Simin Qelqaqa manan yanqachu nin: “Ñoqanchispi Diospa tiyachisqan Santo Espiritun anchatapuni munakuwanchis”, nispa.

⁶Diosqa astawanmi khuyapayaspa yanapaykuwanchis. Chaymi Diospa Simin Qelqaqa nillantaq: “Diosqa hatunchakuqkunaq contranpin sayarin, huch'uyyaykukuqkunatataq khuyapayaspa saminchaykun”, nispa.

⁷Chhaynaqa, Diostapuni kasuychis, saqraq contranpitaq qaqata sayaychis, chaymi payqa qayllaykichismanta ayqekapunqa.

⁸Diosman asuykuychis, hinan payqa asuykamusunkichis. ¡Yaw, huchasapakuna, makiykichista mayllikuychis! ¡Yaw, iskay yuyaykuqkuna, sonqoykichista ch'uyayachiychis!

⁹Llakikuychis, qapariychis, waqaychis. Asikuyniykichis waqayman tukuchun, kusikuyniykichispas llakikuyman tukuchun.

¹⁰Señorpa ñawpaqenpi k'umuykukuychis, hinan payqa hatunchasunkichis.

¹¹Wawqe-panaykuna, ama hukkuna hukkunaq contranpi rimaychischu. Wawqen contra rimaqqa, otaq wawqenta huchachaqpas, Diospa kamachikuy simin contran riman, kamachikuy simitataq huchachanpas. Kamachikuy simitachus huchachanki chayqa, manan kamachikuy simita hunt'aqchu kanki, aswanpas juezmi kanki.

¹²Diosllan kamachikuy simita churaqpas juezpas, paymi qespichiytapas chinkachiytapas atin. Qanri, ¿pitaq kanki runamasiykita huchachanaykipaq?

¹³Wakinniykichismi ninkichis: Kunanpas paqarinpas chay llaqtata risunchis, chaypitaq huk watata kamusun, qhatumusunchis, hinaspa qolqeta tarimusunchis, nispa, chayrayku uyariwaychis,

¹⁴qankunaqa manan yachankichischu imachus paqarin sucedenasuykichista. Chayri, ¿imataq kawsayniykichisqa? Kawsayniykichisqa pacha phuyu hinallan, huk ratollan rikhurimun, chaymantataq chinkarqapun.

¹⁵Aswanpas kay hinatachá niwaqchis: Señor munaqtinqa kawsasunchis, hinaspa kaytapas chaytapas ruwasunchis, nispa.

¹⁶Qankunataq ichaqa anchaykachaspaykichis rimashallankichis, tukuy chay anchaykachayniykichisqa manan allinchu.

¹⁷Chay hinaqa, pipas allinkaq ruwayta yachashaspa mana ruwanchu chayqa, huchallikunmi.