Read Diospa Simin Qelqa 1 PEDRO 2 Bible Online

1 PEDRO 2 - Diospa Simin Qelqa bible

1 PEDRO 2

¹Chayrayku, tukuy mana allin ruwaytapas, tukuy llullakuytapas, iskay uya kaytapas, envidiakuytapas, tukuy imaymana mana allin rimaytapas wikch'upuychis,

²hinaspa chayllaraq nacesqa wawakuna hina Santo Espirituq qosqan mana chhaqrusqa lecheta anchatapuni munaychis, chaywan wiñaspa qespichisqa kanaykichispaq.

³Qankunaqa yachankichisñan Señorpa sumaq sonqo kasqantaqa.

⁴Señormi kawsaq rumiqa, paytan runakunaqa wikch'urqanku, Diospaqmi ichaqa akllasqa ancha chaniyoq kawsaq rumi. Payman asuykuychis.

⁵Kawsaq rumikunawan hina espiritual wasi perqasqa kanaykichispaq, Diospaq t'aqasqa sacerdotekuna kanaykichispaq, Jesucristowan Diospa sonqonman chayaqtapuni espiritual sacrificiokunata haywanaykichispaqwan.

⁶Chayraykun Diospa Simin Qelqapas nin: “Ñoqan Sión llaqtapi esquina hap'iq rumita churani, akllasqa ancha chaniyoq rumita churani, paypi iñiqqa manan p'enqachisqachu kanqa”, nispa.

⁷Chayrayku, qankuna iñiqkunapaqqa ancha chaniyoqmi chay rumiqa, mana iñiqkunapaqmi ichaqa, Diospa Simin Qelqa hunt'akun. Chaypin nin: “Wasi sayarichiqkunaq wikch'usqan rumin esquina hap'iq kapun”, nispa.

⁸Nillantaqmi: “Paymi misk'ana rumi, paymi urmachiq qaqa”, nispa. Paykunaqa Diospa siminta mana kasukuspankun misk'anku, chaypaq unanchasqapunitaqmi karqankupas.

⁹Qankunan ichaqa Diospa akllakusqan ayllu kankichis, reyta serviq sacerdotekuna, Diospaq t'aqasqa ch'uya runakuna, Diospa rantikusqan llaqta. Diosmi laqhayaqmanta sumaq k'anchayninman waqyaspa akllakurqasunkichis paypa musphana ruwasqankunata willanaykichispaq.

¹⁰Ñawpaqqa manan llaqtanchu karqankichis, kunanmi ichaqa Diospa llaqtan kapunkichis. Ñawpaqqa manan Diosqa khuyapayarqasunkichischu, kunanmi ichaqa Diospa khuyapayasqanña kashankichis.

¹¹Munasqay wawqe-panaykuna, wak llaqtayoqkunata, purikuqkunata hinan, valekuykichis aychaq millay munasqankunataqa amapuni ruwaychischu, chaykunaqa kikin runaq contranpin maqanakushan.

¹²Diospi mana iñiqkuna ukhupi allintapuni kawsaychis. Ahinapin paykunaqa contraykichispi mana allin ruwaqkunamanta hina rimashaspapas, juzgana p'unchay chayamuqtin allin ruwasqaykichista rikuspanku Diosta yupaychanqaku.

¹³Señor-rayku kasukuychis runaq churasqan llapa kamachikuqkunata, Roma suyu reytapas qollana kamachikuq kasqanrayku.

¹⁴Kasukullaychistaq kamachikuqkunatapas, paykunatan reyqa churan mana allin ruwaqkunata muchuchinanpaq, allin ruwaqkunatataq sumaqta rikunanpaq.

¹⁵Diosqa munanmi allinkaqta ruwaspaykichis, mana yuyayniyoq runakunaq thawtisqanta ch'inyachinaykichista.

¹⁶Kamachi-kaymanta kacharichisqa runakuna hina puriychis, ichaqa paqtataq kacharichisqa kaspaykichis mana allinkaqta ruwawaqchis, aswanpas Diospa kamachinkuna hina kawsaychis.

¹⁷Respetaychis lliwta. Munakuychis iñiq-masiykichiskunata. Manchakuychis Diosta. Respetaychis reytapas.

¹⁸Kamachikuna, patronniykichiskunata tukuy manchakuywan kasuychis, ama sumaq khuyapayakuq kaqkunallatachu, aswanpas phiña kaqkunatapas kasukullaychistaq.

¹⁹Pipas Diospa munayninta yachashaspa, mana ima huchanmanta muchuchisqa rikukuspaqa pacienciakuchun, chaymi Diospaqqa ancha sumaq.

²⁰Huchallikusqaykichis hawa muchuchisqa kawaqchis chayqa, ¿ima allintaq kanman, pacienciawanña muchuwaqchis chaypas? Ichaqa allinkaqta ruwaspaykichischus pacienciawan muchunkichis chayqa, Diospaqmi ancha sumaq.

²¹Chaypaqpunin Diosqa waqyarqasunkichis, Cristopas ñoqanchisraykun muchurqan, muchusqanta qhawarispanchis yupinta qatikunanchispaq.

²²Payqa manan huchallikurqanchu, manataqmi pitapas q'oturqanchu.

²³Payqa k'amishaqtinkupas manan k'amipakullarqantaqchu, ñak'arichishaqtinkupas manan amenazarqanchu, aswanmi chaninninpi juzgaq Diosman hap'iykachikurqan.

²⁴Kikin Criston huchanchiskunatapas cruzpi chakatasqa kaspa cuerponpi aparqan, huchakunapaq wañuspanchis chanintapuni kawsananchispaq. Paypa k'irinkunawanmi qhaliyachisqa karqankichis.

²⁵Ñawpaqqa chinkasqa oveja hinan purisharqankichis, kunanmi ichaqa kutimpunkichisña waqaychawaqninchis, michiwaqninchis Cristoman.