Read Diospa Simin Qelqa 1 PEDRO 3 Bible Online

1 PEDRO 3 - Diospa Simin Qelqa bible

1 PEDRO 3

¹Qankunapas, casarasqa warmikuna, qosaykichista kasuychis. Ahinapin Diospa siminpi mana iñiq mayqen qosapas mana rimapayasqalla iñinqa warminpa allin purisqanta, ch'uya kawsasqanta manchakuyniyoq kasqanta,

²sumaq respetowan kawsasqanta rikuspa ima.

³Sumaqchakuyniykichisqa ama hawaman rikukuqllachu kachun, chukcha ñaqch'akuyniykichispas ama k'achanchasqachu kachun, ama qoriwan k'achanchasqachu, amataq p'achallaykichischu sumaqchasqa kachun,

⁴aswanpas sonqoykichis sumaqchasqaqa kachun llamp'u sonqo-kaywan, sumaq sonqo-kaywan. Chay hina sumaqchakuymi mana tukukuqqa, Diospa ñawpaqenpipas ancha chaniyoqqa.

⁵Diosman hap'ipakuq ñawpa tiempo ch'uya warmikunaq sumaqchakuyninpas chay hinan karqan. Paykunaqa qosankutan kasukuqku.

⁶Chay hinatan Sarapas Abrahamta kasurqan, chaymi payta, “wiraqocháy” nirqan. Qankunapas allinkaqtachus ruwankichis, manataq imatapas manchakunkichischu chayqa, Saraq ususinkunan kankichis.

⁷Kaqllataq qankunapas qosakuna, esposaykichiswan allin yuyaywan kawsaychis p'akikuq vasota hina rikuspa sumaqta respetaychis, khuyakuyninpi Diospa qosqan wiñay kawsayta chaskiq-masiykichis kasqanrayku. Ahinapin Diosmanta mañakuyniykichisqa mana hark'asqachu kanqa.

⁸Kunantaq, llapallaykichis huk sonqolla kawsaychis, llakipayanakuspa, qankunapura munanakuspa, khuyapayanakuspa, llamp'u sonqo kaspaykichis ima.

⁹Ama mana allinmanqa mana allinllawantaq kutichiychischu, k'amisuqtiykichisqa ama k'amillaychistaqchu, aswanpas saminchaychis, Diosqa waqyarqasunkichis hukkunata saminchanaykichispaqmi.

¹⁰Diospa Simin Qelqan nin: “Pipas kawsayta munakun, sumaq p'unchaykunatataq rikuytapas munan chayqa, ama qallunqa mana allinkaqta rimachunchu, ama siminpas llullakuchunchu.

¹¹Mana allinkaqmanta t'aqakuchun, hinaspa allinkaqta ruwachun, hukkunawan sumaq kawsayta maskhachun, hinaspa chaypi purichun.

¹²Señorqa chanin runakunatan qhawashan, mañakusqankutapas makillan uyarishan. Ichaqa mana allin ruwaqkunaq contranpin kashan”, nispa.

¹³¿Pitaq mana allinta ruwasunkichisman, allinkaqtapuni ruwashaqtiykichisqa?

¹⁴Chaninkaqta ruwasqaykichisraykuchus muchuchisunkichis chayqa, ¡kusisamiyoqmi kankichis! Chayrayku, ama paykunataqa manchapakuychischu, amataq llakipakuychispaschu.

¹⁵Aswanpas Cristota sonqoykichispi yupaychaychis, Señorninchispuni kasqanta reqsispa. Suyakuyniykichismanta pipas tapuqniykichisman allinta kutichinaykichispaqqa wakichisqallapuni kashaychis, hinaspa kutichiychis llamp'u sonqowan respetowan.

¹⁶Allintapuni kawsaychis concienciaykichis allin kananpaq, ahinapin Cristopi iñiqkuna hinapuni allin kawsasqaykichismanta k'amiqniykichiskunaqa mana allin rimasqankumanta p'enqakunqaku.

¹⁷Dios munaqtinqa, aswan allinmi allinkaqta ruwaspa ñak'arinaykichisqa, mana allinkaqta ruwaspa ñak'arishanaykichismantaqa.

¹⁸Cristopas huk kutillatan huchanchiskunarayku wañurqan. Payqa chanin kashaspanmi mana chaninkunarayku wañurqan, Diosman pusanasuykichispaq. Cuerpopin wañuchisqa karqan, espiritupitaq kawsarichimpusqa karqan.

¹⁹Chay kikin espiritullapitaqmi preso kashaq[1] espiritukunamanpas rispa willamurqan.

²⁰Paykunan ñawpa tiempopi mana kasukurqankuchu, chay tiempopi arcata Noé wakichishaqtinmi Diosqa pacienciawan suyasharqan. Chay arcapin pusaq runakunalla unumanta qespichisqa karqanku.

²¹Chay unuqa bautismo unumanmi rikch'akun, bautismoqa manan aychaq millay kayninta ch'uyanchanchu, aswanpas Diosmanta ch'uya sonqoyoq kayta mañakuymi, chay hinapin bautismoqa Jesucristoq kawsarimpusqanwan qespichiwanchis.

²²Jesucriston hanaq pachaman wicharipuspa Diospa paña ladonpi kashan, paytan angelkunapas, kamachikuqkunapas, atiyniyoqkunapas kasukunku.