Read Diospa Simin Qelqa 1 PEDRO 5 Bible Online

1 PEDRO 5 - Diospa Simin Qelqa bible

1 PEDRO 5

¹Kunanqa, qankuna ukhupi kaq umalli runakunatan valekuykichis. Ñoqapas qankuna hina umalli runallataqmi kani, Cristoq ñak'arisqankunamantapas testigon kani, qhapaq-atiyninpi Cristo rikhurimuqtinmi paywan kuska kasaq.

²Qankunaman hap'ichisqa kashaq Diospa ovejankunata allintapuni michiychis, makilla qhawaspa, ama kamachisqa hinachu, aswanpas sumaq munakuywan, ama qolqeraykullachu, aswanpas tukuy sonqo llank'aychis.

³Ama michisqaykichista munaychakuq hinachu, aswanpas paykunapaq yachaqakunankupaq hina kaychis.

⁴Hinan michiqkunaq Qollanan rikhurimuqtin, sumaq k'anchashaq coronata chaskinkichis, chayqa mana hayk'aq tukukuqmi.

⁵Hinallataq qankunapas, wayna-sipaskuna, umalli runakunata kasukuychis, llapaykichistaq huch'uyyaykukuspa yanapanakuychis. Diospa Simin Qelqan nin: “Diosqa hatunchakuqkuna contran sayarin, huch'uyyaykukuqkunatataqmi munakuyninwan saminchaykun”, nispa.

⁶Chayrayku, huch'uyaykukuychis yanapananpaq atiyniyoq Diospa qayllanpi, tiempo chayamuqtin pay hatunchanasuykichispaq.

⁷Tukuy llakikuyniykichista Diosman saqeychis, paymi qankunataqa cuidashasunkichis.

⁸Allin yuyayniyoq kaychis, makillapuni cuidakuychis, awqaykichis saqraqa qaparishaq león hinaraqmi tukuyneqta purishan pillatapas oqoykunanpaq maskhaspa.

⁹Saqraq contranpi qaqatapuni sayaychis, iñiyniykichispipas allintapuni takyaychis, chay kikin llakikuykunallapitaq kay pachantinpi kaq iñiq-masiykichiskunapas muchushasqankuta yachaspa.

¹⁰Tukuy imapi khuyapayakuq Diosmi Jesucristowan hukllachasqa kaqtinchis waqyawarqanchis wiñay qhapaq-atiyninpi paywan kananchispaq, payqa huk chhikanta muchusqaykichis qhepatañan hunt'asqata ruwasunkichis, kallpachasunkichis, qaqatataq takyachisunkichispas.

¹¹Paypaq qhapaqchaypas hatun kamachikuypas wiñay-wiñaypaq kachun. Amén.

¹²Iñiypi hunt'aq wawqe Silvanowanmi kay pisilla qelqasqa cartata apachimuykichis, qankunata kunaykunaypaq, imaynachus Diospa cheqaq munakuynin kasqanta sut'inchaspa. Chay khuyakuyninpi allintapuni sayashaychis.

¹³Babilonia[2] llaqtapi kaq akllasqa-masiykichis Diospa iglesianmi napaykamusunkichis, hinallataq iñiypi churiy Marcospas.

¹⁴Ch'uya munakuywan much'aykunakuspa napaykunakuychis. Llapallaykichis Jesucristopi iñiqkunawan thak-kay kachun.