Read Diospa Simin Qelqa 2 PEDRO 3 Bible Online

2 PEDRO 3 - Diospa Simin Qelqa bible

2 PEDRO 3

¹Munasqay wawqe-panaykuna, kaytawanqa iskay cartatañan qankunaman qelqamuykichis. Chay cartakunawanmi yuyarichispa chanin yuyayniykichis rikch'arichiyta munani.

²Ch'uya profetakunaq ñawpaqtaña rimasqanku simikunata yuyariychis, Qespichiqninchis Señorpa kamachikusqanta, apostolkunaq yachachisqasuykichistapas yuyarillaychistaq.

³Chaywanpas ñawpaqtaqa kaytaraq yachaychis: Qhepa p'unchaykunapin millay asipayakuqkuna hamunqaku, kikinkuq millay munayninkuman hinataq kawsanqaku.

⁴Paykunan asikuspa ninqaku: Criston hamunanpaq prometewarqanchis, ¿maytaq hamunchu? Kurak taytakunaq wañukapusqanmantapachan lliw imaymanapas kaqllapuni kashan, imaynan kamay qallariymantaña karqan chay hinallapunin kashan, nispanku.

⁵Paykunaqa yanqan mana yachaqman tukunku, Diospa siminwan ñawpa tiempopi hanaq pacha ruwasqa kasqanta, hallp'a pachapas unu ukhumanta rikhurimusqanta unu patallapitaq kashasqantapas.

⁶Chay unullawantaqmi ñawpa tiempopi kaq hallp'a pachapas millp'usqa lliw tukukapurqan.

⁷Kunan kashaq hanaq pachawan kay pachawanmi ichaqa Diospa kikin siminwan ninapaq waqaychasqa kashan, hinaspan hatun taripay p'unchaypi ninawan ruphaykachisqa kanqa, Diosta mana manchakuq runakunaq muchunan chayamuqtin.

⁸Munasqa wawqe-panaykuna, yachallaychistaq kaytapas: Señorpaqqa huk p'unchaymi waranqa wata hina, waranqa watataqmi huk p'unchay hina.

⁹Señorqa manan prometesqantaqa asuchinchu, imaynan wakinkuna asuchinanpaq yuyanku hinataqa, aswanmi pacienciawan suyasunkichis, mana pitapas chinkananta munaspa, huchata saqespa payman llapa kutirikunankuta munaspa.

¹⁰Señorpa juzganan p'unchayqa qonqayllan chayamunqa, imaynan suwapas qonqaylla hamun hinata. Chay p'unchaymi hanaq pachaqa manchay kunununuywan tukukunqa, chaypi kaqkunapas lliw rawrarispa tukukunqa, kay pachapas chaypi lliw kaqkunapas ruphaykapunqa.

¹¹Chay hinata tukuy ima kaqpas thunisqa p'uchukapunan kashaqtinqa, ¿imaynatataq kawsanaykichisri? Qankunaqa Dios sonqo purispan Diosllapaqña kawsanaykichis,

¹²Diospa p'unchaynin chayamunanta makillaña suyaspa. Chay p'unchaymi hanaq pachaqa ninawan kanaykusqa tukukapunqa, chaypi lliw kaqkunapas rawrarispan unuyapunqa.

¹³Ñoqanchismi ichaqa Diospa prometewasqanchis mosoq hanaq pachata mosoq hallp'a pachatawan suyashanchis, chaykunapiqa tukuy imapas chaninkaman kanqa.

¹⁴Chayrayku, munasqa wawqe-panaykuna, chaykunata suyakushaspaqa, tukuy imapipas k'uchilla kallpachakuychis mana qhelliyoq, mana anyaykuna, paywan thak-kaypi Diospa tarisqan kanaykichispaq.

¹⁵Yuyaychis Señorninchispa paciencianqa qespikunanchispaq kasqanta, imaynan munasqa wawqenchis Pablopas Diospa yachay qosqanwan qelqamurqasunkichis hina.

¹⁶Llapan cartankunapin payqa chaykunamanta rimapayarqasunkichis, wakin cartankunaña sasa entiendey karqan chaypas. Chay cartakunatan mana yachayniyoqkuna iñiyninkupi mana takyasqa kaqkuna q'ewinku, imaynan Diospa Simin Qelqapi wakin cheqaskunata q'ewinku hinata. Chay ruwasqankuwanmi paykunallataq chinkayman ripunqaku.

¹⁷Chayrayku, munasqa wawqe-panaykuna, ñawpaqmantaña chaykunata yachashaspaqa makilla cuidakuychis, paqtan mana chanin runakunaq pantachisqan kawaqchis, hinaspa allin takyasqa kashaspaykichispas urmawaqchis.

¹⁸Aswanpas Qespichiqninchis Señor Jesucristoq munakuyninpi wiñaychis, astawantaq paytaqa reqsiychis. ¡Pay hatunchasqa kachun kunanpas wiñay-wiñaykamapas! Amén.