Read Diospa Simin Qelqa 1 JUAN 2 Bible Online

1 JUAN 2 - Diospa Simin Qelqa bible

1 JUAN 2

¹Wawallaykuna, chaykunatan qelqamuykichis ama huchallikunaykichispaq. Pipas huchallikun chayqa, kanmi Yayaq ñawpaqenpi abogadonchis, paymi chanin Jesucristo.

²Paymi huchanchiskunata pampachachiwananchispaq wañurqan, manataqmi ñoqanchispa huchallanchismantachu, aswanpas lliw runakunaq huchankumantawanmi wañurqan.

³Diospa kamachikuy siminkunatachus kasukunchis chayqa, yachanchismi payta reqsisqanchista.

⁴Pipas nin: Ñoqaqa Diosta reqsinin, nispa, ichaqa manataq kamachikusqankunata kasukunchu chayqa, llullan, manataqmi Diospa cheqaq-kayninqa sonqonpi kanchu.

⁵Diospa siminta kasukuqmi ichaqa cheqaqtapuni tukuy sonqowan Diosta munakun. Chaypin yachanchis paywan hukllachasqa kashasqanchista.

⁶“Dioswan hukllachasqan kashani” niqqa, imaynatan Jesucristo kawsarqan, chay hinatan kawsanallantaq.

⁷Munasqay wawqe-panaykuna, manan mosoq kamachikuytachu qelqamuykichis, aswanpas qallariymantapacha yachasqaykichis ñawpa kamachikuytan. Chay ñawpa kamachikuyqa uyarisqaykichis willakuymi.

⁸Chaywanpas chay kamachikuyqa mosoqllan kashan, chaymi Jesucristoq kawsayninpipas qankunaq kawsayniykichispipas cheqaq kasqanta rikuchin. Laqhayaqqa ñan chinkapushanña, cheqaq k'anchaytaq k'anchashanña.

⁹Pipas “k'anchaypin kashani” nishaspa iñiqmasinta cheqnikushan chayqa, laqhayaqllapiraqmi kashan.

¹⁰Pipas iñiqmasinta munakuqmi ichaqa k'anchaypi kawsashan, manataqmi paypiqa ima misk'achiypas kanchu.

¹¹Iñiqmasinta cheqnikuqmi ichaqa laqhayaqpi kawsanpas purinpas, manataqmi yachanchu maymanchus rishasqantapas, ñawinta tutayaq ñawsayachisqanrayku.

¹²Wawallaykuna, qankunamanmi qelqamuykichis, Jesucristoq sutinpi huchaykichiskunata Dios pampachasqanrayku.

¹³Tayta-mamakuna, qankunamanmi qelqamuykichis, qallariypipas kasqapuniña chay Cristota reqsisqaykichisrayku. Wayna-sipaskuna, qankunamanmi qelqamuykichis, saqrata atipasqaykichisrayku. Wawakuna, qankunamanmi qelqamuykichis, Yayata reqsisqaykichisrayku.

¹⁴Tayta-mamakuna, qankunamanmi qelqamuykichis, qallariypipas kasqapuniña chay Cristota reqsisqaykichisrayku. Wayna-sipaskuna, qankunamanmi qelqamuykichis, kallpayoq kasqaykichisrayku, Diospa simin sonqoykichispi kasqanrayku, saqratapas atipasqaykichisrayku.

¹⁵Ama kay pachata munakuychischu, amallataq chaypi kaqkunatapas munakuychischu. Pipas kay pachapi kaqkunata munakuqqa manan Yayata munakunchu.

¹⁶Kay pachaq kaqninkunaqa kaykunan: aychaq millay munayninkuna, ñawiq rikusqan millay munapakuykuna, kay pacha kawsaypi hatunchakuykuna ima, chaykunaqa manan Dios Yayamantachu paqarimun, aswanpas kikin kay pachamantan.

¹⁷Kay pachaqa tukukapushanmi, tukuy imaymana mana chanin munayninkunapiwan. Diospa munayninta ruwaqmi ichaqa wiñaypaq kawsanqa.

¹⁸Wawallaykuna, p'uchukay tiempoqa ñan chayamushanña, uyarirqankichismi Cristo contra sayariqpa hamunanta, chaymi kunanpas askhaña Cristoq contran sayariqkuna rikhurimunku, chayraykun yachanchis p'uchukay tiempo chayamushasqanta.

¹⁹Paykunan ñoqanchis ukhumanta lloqsipurqanku, ichaqa manan iñiq-masinchiskunapunichu karqanku, iñiq-masinchis kaspankuqa, ñoqanchiswanchá kashankuman karqan. Paykunaqa lloqsipurqanku mana mayqenninkupas iñiqmasinchischu kasqankuta yachanapaqmi.

²⁰Qankunamanqa Criston Santo Espirituta qorqasunkichis, chaymi llapaykichis cheqaq-kayta reqsinkichis.

²¹Cheqaq-kayta reqsiqman hinan qelqamuykichis, qankunaqa allintapunin chayta reqsinkichis, cheqaq-kaymantaqa manataqmi ima llullakuypas paqarimunmanchu.

²²¿Pitaq llullari? Pichus Jesusta “manan Cristochu” niqmi llullaqa. Chay runan Cristoq contranpi sayariqqa, paymi Yayatapas Churitapas negaqqa.

²³Pipas Churita negaqqa manan Yayawan hukllachasqachu kashan. Pipas Churita reqsiqmi ichaqa Yayawan hukllachasqa kashan.

²⁴Chayrayku, qallariymantapacha uyarisqaykichis Diospa siminta sonqoykichispi waqaychaychis, chay hina kaqtinqa qankunapas Yayawan Churiwan hukllachasqan kashankichis.

²⁵Chaymi wiñay kawsayqa, chaytan Jesucristoqa prometewarqanchis.

²⁶Chaykunatan qelqamuykichis qankunata q'otuyta munaqkuna hawa.

²⁷Ichaqa, Jesucristomanta chaskisqaykichis Santo Espiritun qankunapi kashan, chaymi mana hukpa yachachinanraqchu kankichis, aswanpas kikin Santo Espiritun lliwta yachachisunkichis, yachachikuyninqa manataqmi llullachu, aswanpas cheqaqpunin. Chhaynaqa, imaynan Santo Espíritu yachachirqasunkichis chayman hina Cristowan hukllachasqa kawsaychis.

²⁸Kunanqa wawallaykuna, Cristowan hukllachasqa kaychis, pay rikhurimuqtin ñawpaqenpi ama manchapakuspa p'enqakunanchispaq.

²⁹Qankunaqa yachankichismi Jesucristoq chanin kasqanta, chayrayku yachallaychistaq pikunachus chaninkaqta ruwaqkunaqa Diospa wawankuna kasqankutapas.