Read Diospa Simin Qelqa 1 JUAN 3 Bible Online

1 JUAN 3 - Diospa Simin Qelqa bible

1 JUAN 3

¹Qhawariychis, may hinatachus Dios Yayaq munakuwasqanchista, paymi niwanchis “wawaykunan kankichis”, nispa. Arí, wawanpunin kanchis. Chayraykun Diospi mana iñiq runakunaqa mana reqsiwanchischu, Diosta mana reqsisqankurayku.

²Munasqay wawqe-panaykuna, Diospa wawankunañan kanchis, ichaqa manaraqmi rikuchiwanchischu imaynachus kananchistaqa. Chaywanpas yachanchismi Jesucristo rikhurimuqtinqa payman rikch'akuq kananchista, paytaqa rikusunchismi imaynachus kasqanta.

³Pipas Jesucristopi suyakushaqqa pay kikintan ch'uyanchakun, imaynan Jesucristopas ch'uya kashan hinata.

⁴Pipas huchallikuqqa Diospa kamachikuy simintan p'akin, huchallikuyqa kamachikuy simi contra sayariymi.

⁵Yachankichismi Jesucristoqa huchanchiskunata qechunanpaq kay pachaman hamusqanta, yachallanchistaqmi payqa mana ima huchayoq kasqanta.

⁶Chhaynaqa, pipas paywan hukllachasqa kashaqqa manan huchallikunchu, pipas huchallikuqmi ichaqa mana Jesucristota rikurqanpaschu reqsirqanpaschu.

⁷Wawallaykuna, ama qankunaqa piwanpas q'otuchikuychischu, chaninkaqta ruwaqqa chaninmi, imaynan Jesucristopas chanin, chay hina.

⁸Huchallapi puriqmi ichaqa saqraq kamachin, saqraqa qallariymantapachan huchallikurqan. Diospa Churinqa hamurqan saqraq ruwasqankunata thuninanpaqpunin.

⁹Pipas Diospa wawanña kaqqa manan huchallapi kawsanmanchu, Diospa kawsaynin paypi kasqanrayku, manataqmi huchallikushallanmanpaschu Diospa wawanña kasqanrayku.

¹⁰Chaywanmi sut'i reqsisqa pikunachus Diospa wawankuna kasqan, pikunataqchus saqraq wawankuna kasqanpas. Pipas chaninkaqta mana ruwaqqa, iñiq-masintapas mana munakuqqa, manan Diospa wawanchu.

¹¹Kaymi qallariymantapacha uyarisqaykichis willakuyqa: Hukkuna hukkunawanmi munanakunanchis.

¹²Ama Caín hinaqa kasunchu, paymi saqraq kasqanrayku wawqenta wañuchirqan. ¿Imanaqtintaq Cainqa wawqenta wañuchirqan? Paypa ruwasqankunan mana chaninchu karqan, wawqen Abelpa ruwasqankunataq ichaqa chanin karqan.

¹³Wawqe-panaykuna, kay pacha runakuna cheqnikusunkichis chayqa, ama musphaychischu.

¹⁴Ñoqanchisqa iñiq-masinchiskunatan munakunchis, chaypin yachanchis wañuymanta kawsayman pasasqanchista. Iñiqmasinta mana munakuqqa wañusqallan kashan.

¹⁵Pipas iñiqmasinta cheqnikuqqa, runa wañuchiqmi. Qankunaqa yachankichismi pipas runa wañuchiqqa mana wiñay kawsayniyoqchu kasqanta.

¹⁶Jesucriston ñoqanchisrayku wañurqan, chaypin yachanchis munakuyqa imaynachus kasqanta, chhaynallataqmi ñoqanchispas iñiq-masinchisrayku wañuytapas mana manchananchischu.

¹⁷Pipas kay pachapi qhapaq kashaspa iñiqmasinta pisichikushaqta rikuspa mana khuyapayanmanchu chayqa, ¿Diospa munakuyninqa sonqonpi kanmanchu? Manan.

¹⁸Wawallaykuna, ama simillawanchu rimayllawanchu munanakusun, aswanpas cheqaq munanakuyninchisqa ruwasqanchiswan sut'ita rikuchikuchun.

¹⁹Chay hinapin yachanchis cheqaq-kaypi kashasqanchista, chaymi Diospa ñawpaqenpiqa mana manchakusunchischu,

²⁰sonqonchisña imamanta huchachawaqtinchispas. Diosqa aswanraqmi sonqonchismantaqa, payqa tukuy imaymanatan yachan.

²¹Munasqay wawqe-panaykuna, sonqonchischus mana huchachawanchis chayqa, mana manchakuspan Diosman asuykunchis.

²²Ñoqanchisqa kamachikusqankunatan kasukunchis, paypa munasqantataq ruwanchispas, chaymi payqa tukuy ima mañakusqanchista qowanchis.

²³Diospa kamachikuyninqa kaymi: Churin Jesucristopin iñinanchis, hukkuna hukkunawantaqmi munanakunanchis, imaynan pay kamachiwarqanchis chayman hina.

²⁴Kamachikuyninkunata kasukuqkunaqa Dioswan hukllachasqan kashanku, Diospas paykunawan hukllachasqataqmi kashan. Qowasqanchis Santo Espirituwanmi yachanchis Diosqa ñoqanchiswan hukllachasqa kashasqanta.