Read Diospa Simin Qelqa JUECES 10 Bible Online

JUECES 10 - Diospa Simin Qelqa bible

JUECES 10

¹Abimelecpa qhepantataq Efraín orqo-orqopi Samir llaqtapi tiyaq Tola sayarirqan Israel llaqtata qespichinanpaq. Paypa taytanmi karqan Púa, abuelontaq Isacar ayllumanta Dodo.

²Tolataq Israelpa uma qollanan karqan iskay chunka kinsayoq watantin wañukapunankama, hinan Samir llaqtapi p'ampapurqanku.

³Paypa qhepantataq sayarirqan Galaadmanta Jair, paymi Israelpi uma qollana karqan iskay chunka iskayniyoq wata.

⁴Jairpa churinkunataq kinsa chunka karqan, sapankan silla asnoyoqkama karqanku. Galaad suyupin kinsa chunka llaqtanku karqan, hinan chay kinsa chunkantin llaqtakuna Jairpa llaqtankuna nisqa kapurqan.

⁵Chaymantataq Jairqa wañukapurqan, Camón llaqtapitaq p'ampapurqanku.

⁶Israel runakunataq ichaqa wakmanta manapuni Señor Diospa munayninman hinachu ruwarqanku, paykunan yupaycharqanku Baal diosta, Astarte diosata, Siria runakunaq diosninkunata, Sidón runakunaq diosninkunata, Moab runakunaq diosninkunata, Amón runakunaq diosninkunata, Filistea runakunaq diosninkunatapas. Señor Diostataq qonqarparipuspa manaña yupaychapurqankuchu.

⁷Chaymantan Señor Diosqa phiñakuspa paykunata qaraykurqan Filistea runakunaman Amón runakunamanwan.

⁸Chaymantapachan chunka pusaqniyoq wata Filistea runakuna Amón runakunapiwan Jordán mayu inti lloqsimuy lado Amor runakunaq suyun Galaadpi tiyaq Israel runakunata pasaqta pisichaspa saruncharqanku.

⁹Amón runakunaqa Jordán mayutapas chimpamurqankun Judá aylluwan, Benjamín aylluwan, Efraín ayllupiwan maqanakuq. Chaymi Israel runakunaqa sonqo nanay llakichisqa karqanku.

¹⁰Chayraqmi Israel runakunaqa Señor Diosmanta waqyakurqanku: Diosnillayku, ñoqaykun qan contra huchallikuyku, Baal dioskunata yupaychaspan qanta saqerparipuykiku, nispa.

¹¹Chaymi Señor Diosqa kutichirqan: — Egipto runakuna, Amor runakuna, Filistea runakuna,

¹²Sidón runakuna, Amalec runakuna, Madián runakunapiwan qankunata saruncharqasunkichis, qankuna waqyakamuwaqtiykichismi ñoqa qespichirqaykichis.

¹³Chaypiwanpas qankunaqa wak dioskunata yupaychaspan qonqapuwarqankichis, chayrayku kunantawanqa manan qespichiykichismanñachu.

¹⁴Phawaychis, akllakusqaykichis dioskunata waqapayamuychis, paykunawanyá sasachakuyniykichismanta horqochikuychis, nispa.

¹⁵Hinan Israel runakunaqa Señor Diosta nirqanku: — Arí, huchallikuykupunin. Ñoqaykuwan ima munasqaykita ruway, ichaqa hinatayá kunan qespichiwayku, nispa.

¹⁶Hinaspan paykunaqa yupaychasqanku wak dioskunata llapanta wikch'upurqanku, wakmanta Señor Diosta yupaychapunankupaq. Hinan Señor Diosqa Israel runakunaq muchusqanta rikuspa pasaqtapuni llakikurqan.

¹⁷Chaymantataq Amón runakunaqa Galaadpi huñuykukuspa karpakurqanku, Israel runakunapas Mizpapi huñuykukuspa karpakullarqankutaq.

¹⁸Hinan Galaadpi tiyaq Israel runakuna umalli runakunapiwan ninakurqanku: — ¿Mayqenninchistaq Amón runakunawan maqanakuq ñawpaqta rinqa? Chaychá Galaad llaqtantinpa qollanan kapunqa, nispa.