Read Diospa Simin Qelqa JUECES 12 Bible Online

JUECES 12 - Diospa Simin Qelqa bible

JUECES 12

¹Efraín ayllu runakunataq huñunakuspa, Jordán mayuta chimpaspa Zafón llaqtaman rirqanku. Chaypitaq Jefteta nirqanku: — ¿Imanaqtintaq Amón runakunawan maqanakuqri sapallayki rirqanki, riysinaykupaq mana willarikuspaykiri? Kunanmi chaymanta qanta wasiykipi kanaykusqaykiku, nispa.

²Chaymi Jefteqa nirqan: — Ñoqataqa llaqtay runatawanmi Amón runakunaqa sinchita churanakuwarqanku, hinan qankunaman willamurqaykiku, manataq yanapaqniyku hamurqankichischu.

³Chayraykun ñoqalla wañuytapas mana manchakuspa, Amón runakunawan maqanakuq ripurqani, Señor Diostaq paykunata atipachiwarqan. Chayri, ¿imanaqtintaq kunan qankunari ñoqawan maqanakuq hamunkichis? nispa.

⁴Chaymi Jefteqa llapan Galaad runakunata huñurqorqan, Efraín runakunawan maqanakuspataq atiparqan. Efraín runakunan k'amisqaku: — Yaw, Galaad runakuna, qankuna Manasespa hallp'anpi Efrainpa hallp'anpi tiyashasparaqtaqchu, Efraín aylluta wikch'upunkichis, nispa.

⁵Galaad runakunaqa Efraín runakunaq Jordán mayu chimpanankuta soldadokunawan wisq'arqorqanku, maypacha Efraín runa ayqekuspa: Hinallata chimpachiway, niqtinmi, Galaad runakunaqa: ¿Efrainmantachu kanki? nirqanku. Manan, niqtintaq,

⁶paykunaqa nirqanku: Shibolet[4] niy, nispa. Runataq mana chay simita rimayta atispa: Sibolet, nillaq. Chaymi kaq ratopacha payta hap'ispa mayu chimpanapi wañuchiqku. Chaypachan maqanakuypi Efraín runakunaqa tawa chunka iskayniyoq waranqa wañurarqanku.

⁷Jeftetaq soqta watata Israelpi uma qollana karqan, chaymantataq wañukapurqan, p'ampapurqankutaq kaq Galaad hallp'api.

⁸Jeftepa qhepantaqa Belenmanta Ibzanñataqmi Israelpi uma qollana karqan.

⁹Paypa churinkunan kinsa chunka karqan, kinsa chunkallataq ususinkunapas, llapan chay wawankunatataq casarachirqan wak ayllu runakunaq wawankunawan. Ibzanqa qanchis watatan Israelpi uma qollana karqan,

¹⁰wañupuqtintaq Belenpi p'ampapurqanku.

¹¹Paypa qhepantataq Zabulón ayllumanta Elonqa chunka wata Israelpi uma qollana karqan,

¹²wañupuqtintaq Zabulón aylluq hallp'an Ajalón llaqtapi p'ampapurqanku.

¹³Paypa qhepantataq Piratón llaqtamanta Hilelpa churin Abdón Israelpi uma qollana karqan.

¹⁴Paypa churinkunataq karqan tawa chunka, nietonkunataq kinsa chunka, sapankan silla asnoyoqkama karqanku. Israelpitaq uma qollana karqan pusaq wata.

¹⁵Wañupuqtintaq Amalec orqo-orqo Efraín aylluq hallp'an Piratonpi p'ampapurqanku.