Read Diospa Simin Qelqa JUECES 14 Bible Online

JUECES 14 - Diospa Simin Qelqa bible

JUECES 14

¹Timnat llaqtata rispataq Sansonqa Filistea sipasta rikurqamurqan.

²Wasinman kutimuspataq tayta-mamanta nirqan: — Timnat llaqtapin huk Filistea sipasta qhawakamuni, chay sipasta rimaykampuwaychis casarakunaypaq, nispa.

³Tayta-mamantaq ichaqa nirqan: — ¿Imaraykutaq mana iñiq Filistea sipaswanri casarakuyta munanki? ¿Manachu ayllunchispipas llaqtanchispipas warmiri tarikun? nispa. Sansontaq taytanta nirqan: — Manan, chay sipastapunin munani, horqonpuwaypuni, nispa.

⁴Tayta-mamanqa manan yacharqanchu Sansontaqa Señor Diospuni chayta ruwachishasqanta, Señor Diosmi maskhasharqan imaynapi Filistea runakunawan maqanakuyta.

⁵Chaymantataq Sansonqa tayta-mamantin Timnat llaqtata rirqanku, Timnat uvas chakra-chakraman chayaykushaqtintaq, huk uña león qaparikuspa pay cheqasman hamusharqan.

⁶Hinan kaq ratopacha Señor Diospa Espiritunqa sinchi kallpata Sansonman qorqan, chaymi makillanwan leonta kunkanmanta p'itirqorqan uña cabrachata hinalla, chay ruwasqantataq tayta-mamanman mana willarqanchu.

⁷Chaymantataq sipas rimapayaq rirqan, sipasqa aswantaraqmi sonqonta suwasharqan.

⁸Huk pisi p'unchaykunamantataq Sansonqa kutirqan chay sipasman casarakunanpaq. Ñanta rishaspataq polqarirqan sipisqan león qhawaq, sipisqan leonpa sonqonpitaq wanqoyrukuna wachaykuspa misk'ita ruwaykapusqa.

⁹Chay misk'ita aparikuspan payqa mikhun-mikhun ñanta rirqan. Tayta-mamanman tariparqospataq chay misk'ita qoykurqan, hinan paykunaqa mikhurqanku, manataq willarqanchu wañusqa leonmanta horqomusqantaqa.

¹⁰Taytanmi sipaspa wasinta rirqan, chaypitaq Sansonqa hatun mikhuyta wakichirqan, chhaynatapunin waynakunaqa ruwayta yachaqku.

¹¹Sansonta rikuspataq Filistea runakunaqa kinsa chunka waynakunata pusamurqanku Sansonwan kanankupaq.

¹²Chay waynakunatataq Sansonqa nirqan: — Kunanmi qankunata watuchisqaykichis, kay qanchis p'unchay ukhupi watunkichis chayqa, ñoqan qosqaykichis linomanta kinsa chunka p'achata, kinsa chunka allichachaq p'achatawan.

¹³Mana watuyta atinkichis chaytaq, qankuna sapankaykichis linomanta huk p'achatakama huk allichachaq p'achatawan qowankichis, nispa. Paykunataq nirqanku: — Watuchiwayku, llapaykun uyarisqaykiku, nispa.

¹⁴Hinan Sansonqa watuchirqan: — Imasmari, imasmari, ¿imataq kanman? Mikhukuqmantan mikhuna lloqsimun, kallpayoqmantan misk'i paqarimun, nispa. Paykunaqa kinsa p'unchay ukhupipas manan watuyta atirqankuchu,

¹⁵tawakaq p'unchaypitaq Sansonpa warminta nirqanku: — Chay watuchikuymanta q'otullawan qhariykita tapuykuy, mana chaytaqmi qanta taytaykiq aylluntawan ninawan kanaykusqaykiku. ¿Icha mink'akamuwankiku ch'utichiwanaykikupaqchu? nispa.

¹⁶Chaymi warminqa Sansonta waqapayaspa nirqan: — ¡Qanqa manan munakuwasqankichu, aswanmi cheqnikuwasqanki! Llaqta-masiykunata watuchishaspa, ñoqamantaq mana sut'inchawankichu, nispa. Paytaq nirqan: — Manan taytaymanpas mamaymanpas willanichu, ¿chaychu qanmanraq willaykiman? nispa.

¹⁷Sansonpa warmintaq sapa p'unchay waqapayarqan qanchis p'unchaynintin hatun mikhuy kashaqtin, qanchiskaq p'unchaymi ichaqa sinchita mat'iykuqtin warminman willapurqan. Warmitaq rirqospa llaqtamasinkunaman willamurqan.

¹⁸Chay p'unchay manaraq inti haykushaqtintaq, Timnat runakunaqa Sansonta nirqanku: — Chay misk'iqa mielmi, chay kallpayoqqa leonmi, nispa. Sansontaq nirqan: — ¡China wakaywan mana llank'aspaqa, manan watuchisqayta yachawaqchischu karqan! nispa.

¹⁹Chaykuna qhepatataq Señor Diospa Espiritun Sansonman hunt'aykurqan, hinaspan payqa Ascalón llaqtaman uraykuspa kinsa chunka runata wañurachimurqan, chaykunaq p'achanta ch'utimusqantataq watuqkunaman qoykapurqan. Chaymantataq sinchi phiñasqa taytanpa wasinta kutimpurqan.

²⁰Chaykamataq warmintaqa hukwan casarachipurqan, Sansonpa amigon waynawan.