Read Diospa Simin Qelqa JUECES 15 Bible Online

JUECES 15 - Diospa Simin Qelqa bible

JUECES 15

¹Sansontaq unaymantaña trigo ichhuy killapi cabrachata aparikuspa warmin watukuq rirqan. Chayaspanmi nirqan: — Pasaykachiway warmiypa puñunan wasiman, nispa. Warminpa taytantaq mana kachaykurqanchu,

²aswanmi nirqan: — “Wikch'upunñachá” nirqaykin, chaymi amigoykiwan casarachipurqani. Chaywanpas kayqa sullk'a ñañachan, kurak ñañanmantaqa aswan munaycharaqtaq kanpas, payllawanña casarakapuy, nispa.

³Sansontaq nirqan: — Kunanmi ichaqa mana huchaychu kanqa Filistea runakunata imanasaqña chaypas, manataqmi hinallachu kankichis, nispa.

⁴Chaymanta pasapuspataq Sansonqa kinsa pachak atoqkunata hap'irqorqan, hinaspataq iskay atoqtakama chupapurata watarqospa chawpinman ichhuta churaykurqan.

⁵Chaymantataq chay ichhuman ninawan hap'iykuchirqan, hinaspataq Filistea runakunaq chakran chawpiman watasqa atoqkunata kacharparirqan. Chay ninataqmi phawarispa ruphaykapurqan sayashaq trigo chakrakunata, winaychasqaña kashaqkunatapas, uvas chakrakunatapas, olivos chakrakunatapas.

⁶Chaymantan Filistea runakunaqa tapupakuspa nirqanku: — ¿Pin kayta kanaykuwanchis? nispa. Wakin runakunataq willarqanku: — Timnat runaq qataynin Sansonmi kanaykamun, warminta amigonman qoykapusqanmanta, nispa. Chaymi Filistea runakunaqa rirqospa chay warmita taytantawan kanaykurqanku.

⁷Chaymantan Sansonqa nirqan: — Chay hinatataq ruwankichis chayqa, ñoqapas manan hinallachu kasaq, qankunamantaqa vengakusaqpunin, nispa.

⁸Chaymantataq waq'a hinaraq Filistea runakunata ñut'urqarirqan, hinaspan Etam qaqa wasiman tiyaq rirqan.

⁹Filistea runakunataq Judá aylluq hallp'anman wichaykuspa chaypi karpakurqanku, hinaspan Lehi[5] llaqtaman phawaykurqanku.

¹⁰Chaymi Judá ayllu runakunaqa paykunata tapurqanku: — ¿Imanaqtintaq ñoqaykuwan maqanakuqri hamunkichis? nispa. Filistea runakunataq nirqanku: — Sansón hap'iqmi hamushayku, imaynatachus ruwamuwasqankuta hina paytapas ruwanaykupaq, nispa.

¹¹Chaymantataq Judá ayllumanta kinsa waranqa runa Etam qaqa wasiman rispa Sansonta nirqanku: — ¿Manachu yachanki Filistea runakunaq kamachinpi kashasqanchista? ¿Imatan chayta ruwamuwankiku? nispa. Sansontaq paykunata nirqan: — Imaynatan ñoqata ruwawarqanku, chhaynatan paykunatapas ruwamurqani, nispa.

¹²Paykunataq nirqanku: — Qan hap'iqmi hamushayku, Filistea runakunaman apanaykupaq, nispa. Sansontaq nirqan: — Sut'inta niwaychis mana wañuchiwanaykichista, nispa.

¹³Hinan nirqanku: — Manan wañuchisqaykikuchu, aswanpas Filistea runakunaman apanallaykupaqmi hap'isqaykiku, nispa, hinaspataq mosoq waskhakunawan t'eqerqospa qaqa wasimanta horqomurqanku.

¹⁴Lehikama chayachimuqtinkutaq, Filistea runakunaqa kusikuymanta qaparkachaspa taripamurqanku, ichaqa Señor Diospa Espiritunmi Sansonta wakmanta kallpacharqan. Hinan Sansonpa rikran t'eqesqankuqa ruphasqa lino hina tukurqan, makin watasqa watanakunapas urmaqarqan.

¹⁵Hinan huk manaraq unay wañusqa asno qhaqllinta hoqarirqospa, waranqa runata wañurqarichirqan.

¹⁶Hinaspataq nirqan: — Asno qhaqllinllawanmi monton-montonta montonarqoni. Asno qhaqllinllawanmi waranqa runata sipirqarini, nispa.

¹⁷Chayta nispan asno qhaqllintaqa chanqarqan, hinan chay cheqasta suticharqan “Qhaqllin Moqo” nispa.

¹⁸Chaymantataq pasaqta unu ch'akiywan Sansonqa hap'ichikurqan, chaymi mañakuspa Señor Diosta nirqan: — Qanmi, Señorníy, paykunata atipachiwarqanki. Kunanri, ¿hinachu unu ch'akiymanta wañusaq mana iñiqkunaq hap'isqan? nispa.

¹⁹Chaymi Señor Diosqa Lehipi ch'aki p'uktumanta unuta phullpuchimurqan, chay unuta ukyaykuspataq Sansonqa qhalicharikurqan. Chayraykun chay cheqasta suticharqan “Waqyakuqpa Pukyun” nispa, chaytaq kunankama kashan.

²⁰Filistea runakuna kamachikushaqtinkun Sansonqa iskay chunka watantin Israel runakunaq uma qollanan karqan.