Read Diospa Simin Qelqa JUECES 18 Bible Online

JUECES 18 - Diospa Simin Qelqa bible

JUECES 18

¹Chay p'unchaykunapiqa mana reyniyoqmi Israel suyuqa kasharqan. Dan ayllu runapas hallp'ata maskhashallarqantaq tiyanankupaq, paykunaqa manaraqmi Israel ayllukuna ukhupi hallp'ata hap'ikurqankuchu.

²Chayraykun Dan ayllu runakunaqa phisqa allichachaq qharikunata akllarqanku suyuntinta qhawaramuspa qhamiyamunankupaq. Hinaspan Zoramanta Estaolmantawan paykunata kacharparirqanku: Suyuntinta qhawaramuspa qhamiyamuychis, nispa. Chay phisqa runakunataq Efraín orqo-orqopi Micaiaspa wasinkama chayarqanku, chaypitaq chay tuta qorpachakurqanku.

³Micaiaspa wasin qayllapi kashaspankutaq Leví ayllu waynaq rimayninta reqsirqorqanku, hinaspan rirqospa tapurqanku: — ¿Pin pusamurqasunki? ¿Imatan ruwashanki? ¿Imanaqtinmi kaypi kashanki? nispanku.

⁴Waynataq nirqan: — Micaiaswanmi allinta rimanakurqayku, chaymi paypa sacerdoten kashani, nispa.

⁵Paykunataq nirqanku: — Chay hinaqa, Diosta tapuripuwayku, purisqayku allinchus icha mana allinchus kananta yachanaykupaq, nispa.

⁶Sacerdotetaq nirqan: — Allillanmi purisqaykichisqa kashan. Rillaychis, Señor Diosmi waqaychasunkichis, nispa.

⁷Phisqantin runakunan pasapuspa Lais llaqtaman rirqanku. Chay llaqta runakunataq mana piqpa ima nisqan tiyasqaku Sidón llaqta runakuna hina. Paykunaqa mana piwan ch'aqwaspan sumaqpi kawsasqaku, tukuy imankupas hunt'asqa kasqa. Sidón llaqtamantapas karupiraq tiyasqaku, manataq piwanpas rimanakusqakuchu.

⁸Chaymantataq qhamiyaqkuna Zoraman Estaolmanwan kutipuqtinku, wawqenkuna paykunata tapurqanku: — ¿Imaynan kasqa? nispanku.

⁹Paykunataq kutichirqanku: — ¡Kusa hallp'atan tarimuyku! ¡Ama hinalla tiyarayaychischu mana imata ruwaspa! ¡Haku risunchis chay llaqta phawaykuq!

¹⁰Haqayman chayaspaykichismi mana imapas reparaq runakunata tarinkichis. Chay hallp'aqa hatunllañan, tukuy imaymanapas hunt'asqataqmi kasqa, Diosmi chay hallp'ata qowasunchis, nispa.

¹¹Hinan Zoramanta Estaolmantawan soqta pachak allin maqanayoq qharikuna Dan ayllu karpakunamanta lloqsirqanku,

¹²Judá hallp'aman chayaspataq Quiriat-jearim inti haykuy ladopi karpakurqanku, chaymantapachan chay cheqasqa “Danpa karpakunan” nisqa kapun.

¹³Chaymantataq Efraín orqo-orqoman rispa Micaiaspa wasinman chayarqanku.

¹⁴Hinan Lais llaqta qhawamuq phisqantin qhamiyaqkunaqa llaqtamasinkuta nirqanku: — Ima niwaqchistaq, kay wasipiraqsi kashan Diospa munaynin tapuna unku, wasi dioskuna, qolqewan llunch'isqa idolopiwan. ¿Ima ninkichistaq? nispa.

¹⁵Hinaspan phisqantin qhamiyaqkunaqa paykunamanta t'aqarikuspa Micaiaspa wasinpi Leví ayllu waynaq tiyasqanman rirqanku, chayaspataq napaykurqanku.

¹⁶Chaykamataq soqta pachak allin maqanayoq Dan ayllumanta qharikunaqa hawa punkupi sayamusharqanku.

¹⁷Chay soldadokunawan punkupi sacerdote kashanankamataq phisqantin qhamiyaqkunaqa wasiman haykuspa suwakamusharqanku qolqewan llunch'isqa idolota, wasi dioskunata, Diospa munaynin tapuna unkutawan.

¹⁸Paykuna afanta maskhakushaqtinkun, sacerdoteqa nirqan: — ¿Imatan ruwashankichis? nispa.

¹⁹Paykunataq nirqanku: — ¡Upallay! ¡Simiykita wisq'akuy! Haku ñoqaykuwan, taytayku hinan kanki, sacerdoteykutaq kankipas. ¿Mayqentaq qanpaq allin kanman? ¿Huk runaq sacerdotellan kaychu? Icha, ¿llapan Israelpa huknin ayllunpaq sacerdote kaychu? nispa.

²⁰Chaymi sacerdoteq sonqonqa aswantaraq kusirikurqan, hinaspan pay kikin q'epicharikurqan idolonta, Diospa munaynin tapuna unkuta, wasi dioskunatawan, hinaspan paykunawan ripurqan.

²¹Hinan paykunaqa wawankuta, uywankuta, cargayoq uywankutawan ñawpaqenkuta purichirqanku, hinaspan chaymanta ripurqanku.

²²Dan soldadokuna Micaiaspa wasinmanta karupiña kaqtintaq, Micaiasqa wasi-masinkunata waqyarikuspa Dan soldadokunaman tariparqan.

²³Dan soldadokunata waqyaqtinkun, paykunaqa qhepankuta qhawarikamuspa Micaiasta nimurqanku: — ¿Imananmi? ¿Imanaqtinmi askha runantin hamushanki? nispa.

²⁴Micaiastaq kutichirqan: — Qankunan ruwakusqay diosniyta apamusqankichis, sacerdoteytapas pusarikamusqankichis, ñoqatataq mana imayoqta wikch'umuwankichis. Uyaykichispas kasqaraqtaq, ¿imananmi? nimuwanaykichispaq, nispa.

²⁵Dan soldadokunataq nimurqanku: — ¡Upallay! Paqtataq wakin millay runakuna kutirqamuspa wañuchisunkichisman qantapas runaykikunatapas, nispanku.

²⁶Aswan askha paykunamanta kaqtintaq Micaiasqa wasinman kutikampurqan, Dan soldadokunataq purinankuta ripurqanku.

²⁷Micaiaspa ruwakusqanta sacerdotentawan apaykukuspataq Lais llaqtaman chayarqanku. Chaypi runakunataq kashasqaku llakhilla mana imata reparaspa, hinan Dan soldadokunaqa chay runakunata wañurachirqanku, llaqtankutapas ninawanmi kanaykurqanku.

²⁸Manan pillapas paykuna hark'aykukuqqa kasqachu, Sidón llaqtamantapas sinchi karupiraqmi tiyasqaku, manataq mayqen llaqtawanpas rimanakusqakuchu. Chay llaqtaqa Bet-horonwan tupay wayq'opin karqan. Dan runakunataq wakmanta llaqtata perqaspa chaypi tiyakapurqanku.

²⁹Hinaña chay llaqtaq sutin Lais karqan chaypas, paykunaqa Israelpa churin Dan ñawpa taytankuq sutinwanmi sutichaykurqanku.

³⁰Chaymantaq Dan runakunaqa suwakamusqanku idolota churaykurqanku, Moisespa churin Gersonpa wawan Jonatantataq sacerdoteta churakurqanku. (Chaymantapachan Jonatanpa mirayninqa Dan runakunaq sacerdoten kapurqan, karu suyuman kamachipaq apasqa kasqanku p'unchaykama).

³¹Ahinapin Micaiaspa ruwasqan idoloqa chaypi kasharqan, Diosta yupaychana wasipas Silopi kashaqtin.