Read Diospa Simin Qelqa JUECES 2 Bible Online

JUECES 2 - Diospa Simin Qelqa bible

JUECES 2

¹Señor Diospa angelninmi Gilgalmanta Boquimman wicharqan, chaypin Israel runakunata nirqan: — Ñoqan Egipto suyumanta horqomurqaykichis, hinaspan pusamurqaykichis ñawpa taytaykichisman prometesqay kay hallp'aman. Paykunatataq nirqani: Rimanakusqanchistaqa manan hayk'aqpas p'akisaqchu,

²qankunaqa amapunin kay suyupi tiyaq runakunawan rimanakunkichischu, aswanpas altarninkunatan thuninkichis, nispa. Qankunan ichaqa mana kasuwarqankichischu. ¿Imanaqtintaq chay hinari kankichis?

³Chayraykun ñoqapas kay runakunata ñawpaqeykichismanta mana qarqosaqchu, aswanmi paykunaqa toqlla hina qankunapaq kanqaku, diosninkutaq misk'achiqniykichis kanqa, nispa.

⁴Señor Diospa angelnin rimayta tukuqtintaq, llapa Israel runakunaqa qaparispa waqaykurqanku.

⁵Chaymi chay cheqasta suticharqanku Boquim[1] nispa. Chaypitaq Señor Diosman sacrificiokunata haywarqanku.

⁶Josuetaq Israel runakunata kacharparipurqan, hinan paykunaqa sapankanku ripurqanku sorteopi chaskisqanku hallp'ankuta hap'ikapuq.

⁷Israel runakunataq Josuepa p'unchayninkunapi Señor Diosta allinta servirqanku, hinallataq Josuemanta qhepakamaraq kawsaq kurak taytakunaq p'unchayninkunapipas. Chay taytakunan Señor Diospa Israelrayku hatuchaq ruwasqankunata rikusqaku.

⁸Chaymantataq Señor Diospa kamachin Nunpa churin Josueqa wañukapurqan pachak chunka watayoq kashaspa.

⁹Hinan Efraín orqo-orqopi Gaas orqoq wichaynin Timnat-heres hallp'anpi p'ampapurqanku.

¹⁰Hinallataq Josuepa wiñaymasin llapan kurak taytakunapas wañukapurqanku, qhepa wiñay runakunataqmi ichaqa Señor Diosta mana reqsirqankuchu, manallataq Israelrayku imaymana Señor Diospa ruwasqantapas yacharqankuchu.

¹¹Chaymantataq Israel runakunaqa Señor Diospa mana munasqan millaykunata ruwarqanku, Baal dioskunata yupaychaspanku.

¹²Egiptomanta ñawpa taytankuta horqomuq Diosninku Señortan qonqapurqanku, hinaspan muyuriqninkupi tiyaq runakunaq diosninkuta yupaychaspa Señor Diosta phiñachirqanku.

¹³Señor Diosta saqerparispataq Baal diosta Astarte diosata servirqanku.

¹⁴Chaymantan Señor Diospa phiñakuyninqa Israel runakunapaq rawrarirqan, hinan kaqninkutapas llat'anaqkunawan ch'utichirqan, muyuriqninkupi tiyaq runakunawantaq atipachirqan, churanakuytapas mana atinankukama.

¹⁵Sapa kuti awqa-tinkuyman riqtinkun, Señor Diosqa awqankuwan atipachillarqanpuni, paykunaman juraspa nisqanman hina. Chaymi paykunaqa hatun llakillapipuni kasharqanku.

¹⁶Chaymantañataq Señor Diosqa Israel runakunaman uma qollanakunata churarqan llat'anaqninkumanta qespichinanpaq.

¹⁷Chaywanpas manapunin chay qollanakunatapas kasurqankuchu aswanmi wak dioskunata yupaychaspanku qhellichakurqanku. Ñawpa taytankuqa Señor Diospa kamachikuyninta kasukuspan kawsarqanku, paykunañataqmi ichaqa manaraq imapi Señor Diosta saqerparipurqanku.

¹⁸Paykunaman sapa kuti uma qollanata churaspan, Señor Diosqa uma qollanata yanapallaqpuni. Chay hinapin qollanakunaq kawsasqan p'unchaykunapi Señor Diosqa awqankumanta Israel runakunata qespichillaqpuni, paykunaq waqasqankuta ñak'arisqantawan khuyapayaspa.

¹⁹Sapa kuti uma qollananku, wañupuqtintaqmi wakmanta huchallikurqanku taytankumantaqa aswan mana allintaraq ruwaspanku. Wak dioskunata servispan yupaycharqanku, millay ruwayninkutapas manapuni qonqaspan k'ulluchaykukurqanku.

²⁰Chaymantan Señor Diospa phiñakuyninqa Israel runakunapaq rawrarirqan, chaymi Señor Diosqa nirqan: Kay runakunan ñawpa taytankuwan rimanakusqayta p'akinku, kamachikuyniykunata mana kasukuspa.

²¹Chaymi ñoqapas Josué wañukapuspa saqesqan kikin suyupiraq tiyaq llaqtakunataqa manapuni qarqosaqchu.

²²Chay llaqtakunawanmi Israel runakunata probasaq, ñawpa taytanku hina kamachikuyniykunata hunt'anqakuchus icha manachus chayta yachanaypaq, nispa.

²³Chay yuyaywanmi Señor Diosqa mana wikch'urqanchu Josuepa mana atipasqan llaqtakunata, aswanmi kaqllapiraq qhepachirqan.