Read Diospa Simin Qelqa JUECES 7 Bible Online

JUECES 7 - Diospa Simin Qelqa bible

JUECES 7

¹Hinan Jerobaal nisqanku Gedeonqa paywan kaq runakunapiwan tutallamanta rispanku Harod[3] pukyu patapi karpakurqanku. Madián runakunataq kasharqanku Gedeonpa aswan wichayninkaq wayq'o More moqo chakipi.

²Señor Diostaq Gedeonta nirqan: — Sinchi askhan runaykikunaqa Madián runakunata atipachinaypaqqa, Israel runakunan umata hoqarinkuman: Kallpallaykuwanmi atiparqamuyku, nispanku.

³Kunantaq runaykikunata niy: Manchakuqkuna kay Galaad orqollamantaraq wasiykichisman kutipuychis, nispa. Niqtinmi kutiripurqanku iskay chunka iskayniyoq waranqa runakuna, paywantaq qheparqanku chunka waranqallaña.

⁴Hinan Señor Diosqa Gedeonta nirqan: — Kunanpas askharaqmi runaykikunaqa, chayrayku akllanaypaq unuman pusay. Chaypin nisqayki: Kaymi qanwan rinqa, nispa, hinan chay runa qanwan rinqa. Mayqentachus: Manan rinqachu, nisqayki, chay runaqa manan qanwan rinqachu, nispa.

⁵Hinan chay runakunata unuman pusarqan, chaypin Señor Diosqa Gedeonta nirqan: — Mayqenkunachus alqo hina unuta lapht'anqa, chaytan wakman t'aqanki. Hinallataq mayqenkunachus qonqoriykukuspa ukyanqa, chaytapas wakman t'aqallankitaq, nispa.

⁶Makinwan siminman apakuspa unuta lapht'aqkunan karqan kinsa pachak, wakinnintaq qonqorikuspa ukyarqanku.

⁷Chaymi Señor Diosqa Gedeonta nirqan: — Chay kinsa pachak unu lapht'aq runakunawanmi Israel runakunata qespichisaq, Madián runakunata atipachispa. Wakintaq ripullachunku, nispa.

⁸Hinan Gedeonqa kamachirqan wakinqa karpankuman kutipunankuta, paytaq qheparqan kinsa pachakllawanña. Paykunataq chay ripuqkunaq qoqawantawan qochikurqanku, sapankataq anejo waqra hap'intinkama karqanku. Madián runakunataq karpakusqankumanta aswan uranpiña kasharqanku.

⁹Chay tutapachan Señor Diosqa Gedeonta kamachirqan: — Sayariy, Madián runakunaq karpanman phawaykuy, kunanmi makiykiman hap'iykuchisqayki.

¹⁰Karpa-karpaman uraykuyta manchakunki chayqa, rirqoyraq yanapaqniyki Fura runapiwan.

¹¹Chaypin rimashasqankuta uyarimunki, chaywantaqmi aswanta kallpachakunki phawaykunaykipaq, nispa. Hinan Gedeonqa yanapaqnin Furapiwan uraykurqan awqankuq karpanpa qorpankama maqanayoq soldadokunaq kashasqanman.

¹²Chay wayq'opin Madián runakuna, Amalec runakuna, inti lloqsimuy lado runakunapas langosta hinaraq ch'eqeykusqa kasharqanku, camellonkupas qocha pata aqo hinaraq mana yupay atiy.

¹³Gedeonpa chayananpaqtaq huknin soldado mosqokusqanta hukkaqninman willashasqa: Ñoqaraqsi mosqokushasqani. Cebada t'antan phawarimuspa karpanchisman chayarqamusqa hinaspan huk karpaman takakuspa chayta pasaqta kumparqapusqa, nispa.

¹⁴Hukkaqnintaq kutichirqan: — Chayqa manan imapas kanmanchu, Israel runa Joaspa churin Gedeonpa espadanpunin kanman, Dioschá Gedeonwan Madián runakunata soldadonkunatawan atipachinqa, nispa.

¹⁵Hinan Gedeonqa chayta uyarispa Diosta yupaycharqan. Chaymantan kutirqamuspa Israel runakunata kamachirqan: — ¡Hakuchis! ¡Señor Diosqa Madián runakunata hap'iykachiwanchisñan! nispa.

¹⁶Hinaspan kinsa pachak runanta kinsaman t'aqarqan, sapankamantaq qorqan anejo waqrata tocananpaq, ch'usaq p'uyñutawan, p'uyñu ukhupitaq nina k'anchayta pakasqata apakurqanku.

¹⁷Hinaspan nirqan: — Karpa-karpaman chayaspan makilla ñoqata qhawamuwankichis, imaynatachus ruwasqay kikintan ruwankichis.

¹⁸T'aqaypiwan waqrata tocaqtiykun, qankunapas karpa-karpaq muyuriqninpi tocallankichistaq, hinaspa qaparinkichis: ¡Señor Diospa atiyninwan! ¡Gedeonpa kallpanwan! nispa.

¹⁹Chaymi Gedeonqa pachak runakunapiwan karpa-karpa tupayman chayarqanku manaraq kuska tutata hina, qhawaqkunapas chayllaraq hukchanakushaqtin. Hinan waqrakunata tocarqanku, makinkupi apasqanku p'uyñutapas p'akirqanku.

²⁰Kaqllataq chay wakin t'aqakunapas waqrakunata tocarqanku, p'uyñutapas p'akillarqankutaq. Lloq'e makinkupitaq hap'irqanku nina k'anchayninkuta, paña makinkuwantaq hap'irqanku waqrata, hinaspan qaparirqanku: ¡Señor Diospa atiyninwan! ¡Gedeonpa kallpanwan maqanakusun! nispa.

²¹Karpakunaq muyuriqninpitaq Israel runakuna qaqa sayaykurqanku, Madián soldadokunataq qaparikuspa phawaylla ayqerikapurqanku,

²²kinsa pachaknintin Israel soldadokuna waqrakunata tocarashaqtinkutaq, Señor Diosqa Madián runakunata pantanachirqan paykunapurata sipinachispa. Wakintaq ayqekurqanku Zerera ñan Bet-sitakama, hinallataq Tabat qaylla Abel-meholakama.

²³Chaymi Israel runakunata waqyarichirqan Neftalí ayllumanta, Aser ayllumanta, llapan Manasés ayllumantawan Madián runakunata qatiykachanankupaq.

²⁴Gedeontaq willaqkunata Efraín orqo-orqokunaman kacharparispa nichirqan: — Madián runakunawan maqanakuq uraykamuychis, hinaspa hark'arqariychis mayu chimpanakunata Bet-barakama, kaqllataq Jordán mayupipas Madián runakunaq mana chimparqonanpaq, nispa. Hinan Efraín aylluqa chay kamachikuyta hunt'arqan.

²⁵Hinallataq Madián runakunaq iskay umalli runankunata hap'irqorqanku, Orebta Zeebtawan. Orebtan qaqa patapi wañuchirqanku, chay qaqatan suticharqanku “Orebpa Qaqan” nispa. Kaqllataq Zeebtapas uvas sarunapi wañuchirqanku, chaytapas sutichallarqankutaq “Zeebpa Uvas Sarunan” nispa. Madián runakuna qatiykachasqanku qhepatataq, Gedeonman aparqanku Orebpa umanta Zeebpa umantawan. Paytaq Jordán mayu inti lloqsimuy ladopiña kasharqan.