Read Diospa Simin Qelqa 3 JUAN 1 Bible Online

3 JUAN 1 - Diospa Simin Qelqa bible

3 JUAN 1

¹Ancha munakusqay Gayo, ñoqa kurak umalli runan qelqamuyki, qanta cheqaqtapuni munakuspa.

²Munasqa wawqéy, ñoqaqa tukuy imapipas allillanpuni qhalillapuni kanaykipaqmi Diosmanta mañapushayki, yachanin espiritual kawsayniykiqa allinpuni kashasqanta.

³Maytapunin kusikushani wawqekuna hamuspanku hunt'aqpuni kashasqaykimanta willawaqtinku, qanqa cheqaq-kayman hinapunin kawsashanki.

⁴Ñoqaqa iñiypi wawaykunaq cheqaq-kaypi purisqanta uyarispaymi tukuy imamantapas aswantaqa kusikuni.

⁵Munasqa wawqéy, tukuy imapipas wawqe-panakunata yanapaspaykiqa allintapunin ruwashanki, aswantaqa karu llaqtamanta kaqkunata yanapaspa.

⁶Paykunan iglesiaman willarqanku munakuywan yanapaykusqaykimanta. May allinmi kanqa, Diospa sonqonman chayaqta hinapuni paykunata yanapaykuyqa puriyninkupaq imallatapas qoykuspa.

⁷Paykunaqa Jesucristomanta willamunankupaqmi puririrqanku, manataqmi imatapas Diospi mana iñiq runakunamantaqa chaskirqankuchu.

⁸Chaymi ñoqanchisqa chay hina wawqekunata qorpachananchispuni, ahinapi cheqaq-kay allin willakuykunata willaypi yanapakuq kananchispaq.

⁹Iglesiamanmi huk cartata qelqamurqani, ichaqa Diotrefesmi paykuna ukhupi kamachikuq churakuspa mana chaskiyta munawankuchu.

¹⁰Chayraykun hamuspayqa, contraykupi llullakuspa yanqa rimasqanmanta anyasaq. Payqa manan chay rimasqallanwanqa contentakunchu, aswanpas watukamuq wawqekunatan mana chaskinchu, pikunachus chaskiyta munaqkunatapas hark'anmi, iglesiamantataq qarqon.

¹¹Munasqa wawqéy, qanqa ama mana allin ruwaykunataqa yachaqakuychu, aswanpas allinkaqllatapuni ruway. Allinkaqta ruwaqqa Diospan, mana allinkaqta ruwaqmi ichaqa, Diosta mana reqsinchu.

¹²Demetriomantaqa lliwmi allinta rimanku, kikinpa cheqaq kawsayninpas chaytapunin sut'inchan. Ñoqaykupas ahina kasqantapunin willayku, yachankichistaqmi willasqaykuqa cheqaq kasqanta.

¹³Askhapunin kashan qanta rimapayanayqa, ichaqa manan cartallapichu chaykunataqa qelqamuykiman,

¹⁴aswanpas usqhayllan qanwan tupaykuyta munashani uya-uyapura rimananchispaq.

¹⁵Thak-kay qanwan kachun. Kaypi kaq amigonchiskunan napaykamusunki. Qanpas chaypi kaq amigonchiskunata sapankankuta napaykapuway.