Read Diospa Simin Qelqa JUDAS 1 Bible Online

JUDAS 1 - Diospa Simin Qelqa bible

JUDAS 1

¹Jesucristoq kamachin, Jacoboq wawqen ñoqa Judasmi kay cartata qelqamuykichis Diospa waqyasqankunaman. Qankunatan Dios Yaya munakusunkichis, Jesucristotaq waqaychashasunkichis.

²Diosmi anchatapuni khuyapayasunkichis, thak-kaytapas qosunkichis, munakusunkichispas.

³Munakusqay wawqe-panaykuna, maytapunin munarqani llapanchispa qespikuyninchismanta qankunaman qelqamuyta, ichaqa kunanmi kikiymanta obligasqa rikukuni kaykunata qelqamunaypaq: Qankunatan kallpachaykichis iñiypi qaqatapuni sayanaykichispaq, chay iñiytan ch'ulla kutillata Diosqa ch'uya llaqtanman qorqan.

⁴Diosta mana manchakuq wakin runakunan, mana reparachikuq hinalla haykumurqasunkichis. Paykunaqa millay runakunan kanku, chayraykun ñawpaqmantaña huchachanapaq nisqaña karqanku, Diosninchispa khuyapayakuynintapas q'ewispa qhelli kawsayman tukuchinku, sapallan munaychakuq Señor Jesucristotapas negankun.

⁵Yachashankichisña chaypas, munanin huk kutitawan qankunata kayta yuyarichiyta: Señorqa Israel llaqtantan Egipto suyumanta horqomurqan, ichaqa chay qhepatan mana iñiqkunata wañurachirqan.

⁶Hinallataq qallariypi munayniyoq kasqankuwan mana contentakuq angelkunatapas wiñaypaq watasqata laqhayaq ukhupi hatun taripay p'unchaypaq Diosqa waqaychashan, hanaq pacha tiyanankuta saqepusqankurayku.

⁷Kaqllataqmi Sodoma llaqtapas, Gomorra llaqtapas, muyuriqpi llaqtakunantin, chay angelkuna hinallataq qhelli huchapi purirqanku, aychaq sinchi millay munasqankunata ruwaspanku, chay hawa wiñay ninaq muchuchiyninta ñak'arirqanku. Chaykunaqa llapa wanananchispaq ejemplo churasqan kashan.

⁸Chay hinallataqmi chay mosqokuq runakunapas cuerponkuta qhellichanku, atiyniyoq Señorta pisichanku, hanaq pachapi atiyniyoqkunatapas k'aminku.

⁹Kikin Arcangel Miguelpas saqrawan churanakushaspa, Moisespa ayanta qechunakushaspanqa, manan saqrata k'amispa huchacharqanchu, aswanmi nirqan: Señormi anyasunki, nispalla.

¹⁰Chay runakunan ichaqa mana yachashaspa imatapas k'aminku. Paykuna kikinkumanta munasqankupitaq mana yuyayniyoq uywakuna hina, waqllinku, wañuyman rinankupaq.

¹¹¡Ay, imaynaraqmi paykunaqa kanqa! Cainpa ruwasqanta hinan ruwashanku. Qolqeraykun Balaam hina pantaykunku. Coré hina awqa sayarisqankuraykun wañuchisqa kanku.

¹²Iñiqkunapaq wakichisqa mikhuyniykichiskunapipas sinchi p'enqaymi paykunaqa kanku, chaypin qankunawan kuska kusisqa mikhunkupas ukyankupas mana p'enqarikuspa, chaykunaqa paykuna kikillankutan michikunku. Paykunaqa kanku wayraq apaykachasqan mana parayoq phuyu hinan, cosecha tiempopi mana ruruyoq saphinmanta t'irasqa mullpha sach'a hinan.

¹³Paykunaqa lamar-qochaq sinchi phoqchiqesqan hinan kanku, p'enqay ruwasqankuqa qochaq wikch'usqan qhelli phosoqo hinan rikhurin. Paykunaqa mana takyaykuspa phawaykachaq ch'askakuna hinan kanku. Chaymi paykunaqa huchachasqa kashanku, laqhayaq ch'ampi tutayaqpi wiñaypaq kanankupaq.

¹⁴Paykunamantan Adanpa qanchiskaq miraynin Enocpas profetizarqan: “Señortan rikurqani waranqa-waranqa ch'uya angelkunawan hamushaqta,

¹⁵lliwta taripananpaq, hinaspa llapa millay runakunata lliw mana chanin ruwasqankumanta, Diosta mana manchakuspa huchasapakunaq paypa contranpi llapa k'arak simikunata rimasqankumantawan huchachananpaq”, nispa.

¹⁶Chay runakunaqa millay munasqallankuta ruwayta munaspankun chhuchupakunku, qhepallapin rimanku, hinallataq hatunchakuspanku runakunapaq allinta rimaq tukunku imatapas chaskinankuraykulla.

¹⁷Qankuna ichaqa, munakusqay wawqe-panaykuna, yuyariychis Señorninchis Jesucristoq apostolninkunaq ñawpaqmantaña willasqanku simikunata.

¹⁸Paykunan nirqasunkichis: “P'uchukay qaylla tiempokunapiqa kanqan asipayakuqkuna, millay munayninkuman hina puriqkuna”, nispa.

¹⁹Paykunaqa t'aqanachiqkunan kanku, kay pacha kaqpi yuyayniyoqmi kanku, manataqmi Diospa Espiritunqa paykunapi kanchu.

²⁰Qankuna ichaqa, munakusqay wawqe-panaykuna, ancha ch'uya iñiyniykichispi wiñachinakuychis, Santo Espirituq yanapayninwan Diosmanta mañakuychis.

²¹Diospa munakuyninpi allinta takyaychis, Señorninchis Jesucristoq khuyapayakuyninpi, wiñay kawsay qonasuykichista suyakuychis.

²²Wakin iskayrayaqkunata iñiyninkupi yanapaykuychis.

²³Wakinta qespichiychis, ninamanta qechurqoq hina, wakintataq cuidakuspa khuyapayaychis, ichaqa mana chanin kawsayninkupi qhellichasqa p'achatapas cheqnikuychis.

²⁴Chay hinaqa, mana urmaqta waqaychaqniykichis atiyniyoq Diosman, ancha kusikuywan qhapaq qayllanman mana huchachanata asuykachiqniykichis,

²⁵sapallan qespichiqninchis Diosman, qhapaqchaypas, hatunchaypas, hatun kamachikuypas, qhapaq-atiypas, qaynapas, kunanpas, wiñay-wiñaypaqpas Señorninchis Jesucristoq sutinpi kachun. Amén.