Read Diospa Simin Qelqa APOCALIPSIS 11 Bible Online

APOCALIPSIS 11 - Diospa Simin Qelqa bible

APOCALIPSIS 11

¹Chaymantataq tupuna varaman rikch'akuq soqosta qowarqan, hinaspa niwarqan: Sayariy, hinaspa tupuy Diospa wasinta, chaypi kashaq altartawan, hinallataq chaypi yupaychaqkunatapas yupay.

²Yupaychana wasiq hawa ladon patiotaqa aman tupunkichu, mana judío runakunaman qosqan chayqa. Paykunan ch'uya llaqtata tawa chunka iskayniyoq killata sarunchanqaku.

³Ñoqataq iskay testigoykunata kachasaq yana ch'illu p'achawan churaykusqata, paykunan waranqa iskay pachak soqta chunkayoq p'unchayta simiyta profetizanqaku.

⁴Chay iskay testigoykunaqa iskaynin olivo sach'apiwan iskaynin candeleropiwanmi, chaykunan kay pacha kamaq Diospa ñawpaqenpi kashan.

⁵Pipas paykunata imanaytapas munan chaytaqa, paykunaq siminmanta nina lloqsimuspan awqankuta rupharparin. Pipas paykunata imanaytapas munaqqa, chay hinatan wañunqa.

⁶Chay testigokunaqa atiyniyoqmi kanku, hanaq pachata wisq'anankupaq, profetizashasqanku p'unchaykuna mana paramunanpaq. Atiyniyoqllataqmi kanku unuta yawarman tukuchinankupaq, imaymana sinchi ñak'ariykunawan kay pachapi tiyaq runakunata sapa kuti munasqankuman hina muchuchinankupaq.

⁷Paykuna willayta tukuqtinkutaq chinkay-chinkay ukhumanta lloqsimuq manchana wak'a animal paykunawan maqanakunqa, atipaspataq wañuchinqa.

⁸Ayankutaq chutarayanqa Señorninchista chakatasqanku hatun llaqta plazapi. Chay llaqtan rikch'anachiy simipiqa Sodoma otaq Egipto nisqa.

⁹Hinan llapa llaqtakunamanta, ayllukunamanta, tukuy t'aqa rimaqkunamanta, suyukunamantapas runakuna kinsa p'unchay kuskanninta ayanku chutarayaqta qhawapayashanqaku, manataq p'ampasqa kananta munanqakuchu.

¹⁰Kay pachapi tiyaqkunataq paykunaq wañusqanmanta anchatapuni kusikunqaku, chaymi regalokunata apachinakunqaku, chay muchuchiqninku iskaynin profetakunaq wañusqankurayku.

¹¹Chay kinsa p'unchay kuskannin qhepatataq ichaqa Diospa kachamusqan kawsay samay chay iskaynin ayaman haykurqan, hinan sayarirqanku, chaymi paykunata rikuqkunaqa sinchita mancharikurqanku.

¹²Chaymantataq chay iskaynin testigokunaqa hanaq pachamanta kunkayoq waqyakamuqta uyarirqanku: ¡Wichamuychis kayman! nispa nishaqta. Hinan paykunaqa phuyupi hanaq pachaman wicharipurqanku, awqankupas rikushaqtin.

¹³Chay ratopachan sinchitapuni pacha chhaphchikurqan, chaymi llaqtamanta chunkakaq t'aqa thunikurqan, qanchis waranqa runakunataq wañurqanku. Wakin mana wañuqkunataq sinchita mancharikuspa hanaq pacha Diosta yupaycharqanku.

¹⁴Iskaykaq anananaymi pasarqonña, kinsakaq anananaytaqmi qayllaykamushanña.

¹⁵Qanchiskaq angelmi trompetanta tocarqan, hinan hanaq pachapi kunkayoq rimasqakuna uyarikurqan: Kay pachapi kamachikuq-kaymi Señorninchispaña Cristonpaña kapun, paymi wiñay-wiñaypaq kamachikunqa, nishaq.

¹⁶Hinan Diospa qayllanpi iskay chunka tawayoq tiyanankupi tiyashaq kurak runakunaqa pampakama k'umuykukuspa Diosta yupaycharqanku:

¹⁷Tukuy-atiyniyoq Señor Diosniyku, qanmi kanki kunan kaqpas, ñawpa kaqpas, hatun atiyniykiwan kamachikuyta qallarisqaykimantan graciasta qoykiku.

¹⁸Suyukunan phiñakurqanku, ichaqa phiñakuyniykin chayarqamunña, wañusqakunata juzganayki p'unchaymi chayarqamunña. Premiota qonayki p'unchaymi chayarqamunña: kamachiyki profetakunaman, ch'uya kawsaqkunaman, sutiykita manchakuqkunaman, huch'uyña hatunña kaqtinkupas. Chayarqamullantaqmi kay pacha waqllichiqkunata wañuchinayki p'unchaypas, nispa.

¹⁹Hinan hanaq pachapi kashaq Dios yupaychana wasi kicharikurqan, chaymi Dioswan rimanakuy arca rikukurqan. Chaymi lliphllikirqan, kunununurqan, q'aqyaqerqan, pacha chhaphchikurqan, manchay chikchipas chayarqan.