Read Diospa Simin Qelqa APOCALIPSIS 18 Bible Online

APOCALIPSIS 18 - Diospa Simin Qelqa bible

APOCALIPSIS 18

¹Chaykuna qhepatataq wak angelta rikurqani hatun atiywan hanaq pachamanta uraykamushaqta, lliphllikiyninwantaq kay pachata k'anchaykushaqta.

²Hinaspanmi kallpawan waqyakuspa nirqan: ¡Urmaykunñan, thunikunñan hatun Babilonia llaqtaqa! Supaykunaq tiyananmi kapun, tukuy mana allin espiritukunaq tiyananmi kapun, tukuy qhellikaq cheqnisqa phalaq animalkunaq tiyananmi kapun.

³Llapa suyukunan Babiloniaq wasanchay huchanwan heq'eparqanku, allin poqosqa vinowan machaq hina, paywanmi kay pacha llapa reykunaqa qhelli huchapi purirqanku, kay pachapi qhatuqkunapas Babiloniaq kusikuyllanpi sinchi gastasqanwanmi qhapaqyaykurqanku, nispa.

⁴Hinaqtinmi hanaq pachamanta huk kunkata uyarirqani: Llaqtalláy, chay llaqtamanta lloqsipuychis, ama huchallikuqmasin kanaykichispaq, amataq manchay ñak'arichisqa-masin kanaykichispaqwan.

⁵Huchankunaqa hanaq pachakaman tawqaykukun, Diosqa mana chanin ruwasqankutan yuyarin.

⁶Paymanqa qosqasuykichisman hina kutichipuychis, ruwasqankunaman hina iskay kutita pagapuychis. Hukkunapaq paypa chhaqrusqan vinomantaqa aswan fuertetaraq ukyananpaqqa chhaqrupuychis.

⁷Paytaqa hatunchakusqanman hina sinchi gastasqanman hina ñak'arichiychis, muchuchiychis. Payqa sonqonpin nin: Ñoqaqa reinañan kaypi tiyashani, manan viudachu kani, manataqmi hayk'aqpas wañuqniyoq hinaqa waqasaqchu, nispa.

⁸Chayraykun huk p'unchayllapi manchay ñak'arichiy paypaq chayamunqa: waqay, yarqay, wañuypiwan. Payta juzgaq Señor Diosqa atiyniyoqmi, chaymi ninawan ruphaykachinqa.

⁹Hinan chay warmiwan qhelli huchapi purispa kusikuyllapi kawsaspa sinchi gastaq kay pacha reykunaqa paymanta waqanqaku, mayta llakikunqaku, ruphaykusqan q'osñita rikuspa.

¹⁰Ñak'arisqanmanta manchasqa karullapi sayaykuspankutaq ninqaku: ¡Ay, imaraqmi, hatun Babilonia llaqta! ¡Ay, ikiraqmi, hatun atiyniyoq llaqta! Ñawi ch'ipiq-niyllapin juzgasqa kayniykiqa chayarqamun, nispa.

¹¹Kay pachapi qhatuqkunapas paymantaqa waqanqakun, khuyaytan llakikunqaku, qhatusqankuta manaña pipas rantiq kasqanrayku.

¹²Chay qhatusqankun kaykuna: Qori, qolqe, umiña rumikuna, perlakuna, sumaq lino, sani-puka tela, seda tela, sansaq-puka tela, sumaq q'apaq imaymana rikch'aq kurkukuna. Imaymana rikch'aq ruwasqakuna, marfilmanta, ancha chaniyoq kurkumanta, broncemanta, fierromanta, pachas rumimantawan.

¹³Hinallataq canela, sumaq q'apaqkuna, incienso, mirra, sumaq q'apaq incienso, vino, aceite, ñut'u hak'u, trigo, cargana uywakuna, ovejakuna, caballokuna, carretakuna, kamachi runakuna, runakunaq kawsayninkuna ima.

¹⁴Qhatuqkunan chay llaqtata ninqaku: Ancha munasqayki sumaq frutakunaqa manan kapunñachu, tukuy sumaq kaqkunapas k'ancharishaq kaqkunapas tukukapunñan, manataqmi hayk'aqpas chaykunata tarinkiñachu, nispa.

¹⁵Chaykunata qhatuqkunaqa, chay llaqtaq qhapaqyachisqankunaqa, karullapin sayaykunqaku ñak'arisqanmanta manchakuspa. Paykunaqa waqaspan mayta llakikuspan

¹⁶ninqaku: — ¡Ay, imaraqmi! ¡Ikiraqmi, haqay hatun llaqtaqa! Warmi hinan sumaq linowan, sani-puka telawan, sansaq-puka telawan p'achasqa karqan, qoriwan, umiñakunawan, perlakunawan k'achanchasqa karqan.

¹⁷¡Ñawi ch'ipiq-niyllapin chay sinchi askha qhapaq kaykunaqa ch'usaqyarqapun! nispa. Hinaqtinmi barcota llapa purichiqkunaqa, barcokunapi llapa puriqkunapas, barcopi llank'aqkunapas, lamar-qochapi llapa llank'apakuqkunapas karullapi sayaykurqanku.

¹⁸Hatun llaqtata ruphashasqan q'osñita rikuspataq kunkayoqta nirqanku: ¿Mayqen llaqtataq kay hatun llaqta hinaqa karqan? nispa.

¹⁹Chaymi hallp'ata umankuman hach'ikurqanku, mayta waqaspa llakikuspankutaq kunkayoqta nirqanku: ¡Ay, imaraqmi! ¡Ikiraqmi, chay hatun llaqtaqa! Lamar-qochapi llapa barcoyoqkunaqa kay llaqtaq qhapaq kayninwanmi qhapaqyaykurqanku, kunantaq ñawi ch'ipiq-niyllapi purunyarqapun, nispa.

²⁰Qan ichaqa, hanaq pacha, ¡kusikuy! Diospaq ch'uya kawsaqkuna, apostolkuna, profetakuna ¡kusikuychis! Chay hinata muchuchispa Diosqa chanintapuni ruwapusqasuykichisrayku.

²¹Hinaqtinmi huk kallpasapa angelqa huk rumita molino hatun rumita hina hoqarispa lamar-qochaman wikch'uykuspa nirqan: Chay hatun Babilonia llaqtaqa, chay hina hatun sinchi kallpawan thunisqan kanqa, manataqmi hayk'aqpas rikhurinqañachu.

²²Manañan hayk'aqpas calleykikunapi arpa tocaypas, qena tocaypas, trompeta tocaypas uyarikunqañachu, manataq ima artesanokunapas qanpi kanqañachu, manallataqmi molinoq kutasqan kunrururuypas qanpi uyarikunqañachu.

²³Lámpara k'anchaypas manan astawan qanpi k'anchanqañachu, casarakuy fiestakunapi kusikuykunapas manañan kanqañachu. Qhatuqniykikunaqa kay pachapi qhapaqkunan karqanku, layqakusqaykikunawanmi llapa suyukunata q'oturqanki.

²⁴Qanpin profetakunaq, Diospaq ch'uya kawsaqkunaq yawarninpas, kay pachapi llapa wañuchisqakunaq yawarninpas tarisqa karqan, nispa.