Read Diospa Simin Qelqa RUT 2 Bible Online

RUT 2 - Diospa Simin Qelqa bible

RUT 2

¹Noemipa qosan Elimelecpa ayllunmantan huk qhapaq runa karqan, Booz sutiyoq.

²Rut-taq Noemita nirqan: — Valekuykin chakrata kachawanaykita, pichus hinallata qhellachiwanqa chaypa qhepanpi cebadata qhellakamunaypaq, nispa. Hinan Noemiqa nirqan: — Riy, ususíy, nispa.

³Chakrata rispataq ichhuqkunaq qhepanpi qhellarqan, chay chakraqa Elimelecpa parienten Boozpan karqan.

⁴Chayllamanmi kikin Boozqa Belenmanta chayamurqan, hinaspan ichhuqkunata napaykurqan: — Qankunawan Señor Diosqa kachun, nispa. Paykunataq kutichirqanku: — Qantapas Señor Diosmi saminchasunki, nispa.

⁵Boozmi ichhuchiq capatazta nirqan: — ¿Pitaq chay sipasri? nispa.

⁶Ichhuchiq capataztaq kutichirqan: — Moab suyumanta Noemiwan hamuq sipasmi.

⁷Paymi niwan: — Ama hinachu kay, ichhuqkunaq qhepanpi qhellarichiway, nispa. Tutamantapacha haykumuspan kunankama mana samaykuspa qhellashan, nispa.

⁸Chaymi Boozqa Rut-ta nirqan: — Ususíy, kay chakrallapin qhellakunki, aman kaymanta wakman rinkichu, kaypin ichhuqniykunawan kuska kanki.

⁹Ichhusqankuta allinta qhawanki, hinaspa ichhuqkunaq qhepanta rinki. Ñoqan ichhuqniykunata kamachiniña ama imaninasuykipaq. Ch'akisuqtiykipas urpukunaman asuykuspa ichhuqkunaq wisimusqan unuta ukyakunki, nispa.

¹⁰Hinan Rutqa pampakama k'umuykukuspa nirqan: — ¿Imanaqtintaq khuyapayawanki? ¿Imanaqtintaq sumaqta qhawariwanki, ñoqa wak llaqtayoq kashaqtiy? nispa.

¹¹Booztaq nirqan: — Qosaykiq wañukapusqan qhepata tukuy imaymanata suegraykipaq ruwasqaykitan willawarqanku, hinallataq tayta-mamaykitapas nacesqayki llaqtatapas saqerparisparaq mana reqsisqayki llaqtaman hamusqaykitapas.

¹²Señor Diosmi chay ruwasqaykimanta kutichipusunki, Israelpa Diosninmi hunt'asqata qopusunki, paypa waqaychasqan kanaykipaq hamusqaykirayku, nispa.

¹³Rut-taq nirqan: — Wiraqocháy, sumaqtan qhawariykuwanki, sonqochaykuwanki, kamachiykiman sumaqta rimaykuwaspayki, manaña huknin kamachiyki kashaqtiypas, nispa.

¹⁴Booztaq mikhuna horata Rut-ta nirqan: — Asuykamuy, mikhusunchis, kay t'antata vinagreman challpuykuy, nispa. Hinan payqa ichhuqkunawan kuska tiyaykurqan, Booztaq payman cebada hank'atapas haywallarqantaq. Rutqa saksanankaman mikhurqan, puchuqtataq alzakurqan.

¹⁵Chaymantataq Rutqa qhellaq sayarirqan. Booztaq kamachinkunata kamachirqan: — Phichakuna ukhumantapas qhellakullachun, amataq payta hark'aychischu.

¹⁶Marq'aykunamantapas huk maki cebadata paypaq urmachillankichistaqmi, hinaspa saqenkichis chayta qhellakunanpaq, amataq phiñarinkichischu, nispa.

¹⁷Rutmi chakrapi tutayanankama qhellarqan, hinaspan pallasqanta waqtarqan, hinan iskay chunka kilo cebada karqan.

¹⁸Chayta aparikuspan llaqtata ripurqan, suegranmantaq qhellamusqanta rikuchirqan, alzakamusqantapas haywallarqantaq.

¹⁹Suegrantaq payta nirqan: — ¿Maypitaq kunan qhellamurqanki? ¿Maypitaq llank'amurqanki? Dios saminchapuchun sumaq qhawariqniyki runata, nispa. Hinan payqa suegranman willarqan piqpapichus llank'amusqanta: — Kunan p'unchayqa qhellamuni Booz sutiyoq runaq chakranpin, nispa.

²⁰Noemitaq qhachuninta nirqan: — Boozqa Señor Diospa saminchasqan kachun. Diosqa may khuyapayakuqmi wañuqkunapaqpas kawsaqkunapaqpas, nispa. Chaymantataq Noemiqa Rut-ta nirqan: — Boozqa qaylla parientenchismi, paypa ruwananqa tukuy imapi yanapawananchismi, nispa.

²¹Rut-taq nirqan: — Payqa nillawantaqmi, ichhuqniykunaq qhepanpi qhellakuy cosechay lliw tukukunankama, nispa.

²²Hinan Noemiqa qhachunin Rutman kutichirqan: — Aswan allinmi, ususíy, Boozpa ichhuqninkunawan kanki chayqa, paqtan hukpa chakranpiqa imanasunkikumanpas, nispa.

²³Chaymi Rutqa paykunawan qhellarqan cebada ichhuy, trigo ichhuy tukukunankama. Suegranwantaq tiyasharqan.