Read Diospa Simin Qelqa 1 SAMUEL 15 Bible Online

1 SAMUEL 15 - Diospa Simin Qelqa bible

1 SAMUEL 15

¹Chaymantan Samuelqa Saulta nirqan: — Señor Diosmi ñawpaqta kachamuwarqan qanta Israelpi rey kanaykipaq aceitewan hawiykunaypaq. Chayrayku, uyariy Señor Diospa rimasqanta.

²Tukuy-atiyniyoq Señor Diosmi nin: Egiptomanta Israel runakuna hamushaqtinkun Amalec runakuna hark'arqanku, chaymantan kunan paykunata ñak'arichisaq.

³Chayrayku, kunan phawaykuspa Amalec runakunata wañuchimuy, llapan kaqninkunatapas ch'usaqyachimuy. Ama khuyapayaykuspataq wañuchimunki llapa qharita, warmita, erqekunata, qholla wawakunatapas, hinallataq wakakunata, ovejakunata, camellokunata, asnokunatapas, nispa.

⁴Saultaq Telaim llaqtaman runakunata huñuspa yuparqan, chaypin iskay pachak waranqa chakipi soldadokuna karqan, Judamanta soldadokunataq chunka waranqa karqan.

⁵Chaykunapiwanmi Saulqa Amalecpa llaqtankama rispa, ch'aki mayuq kasqanpi pakakurqanku maqanakunankupaq.

⁶Cen runakunatataq Saulqa nirqan: — Qankunaqa kay Amalecpa llaqtanmanta ripuychis, ama paykunawan kuska wañuchisqa kanaykichispaq. Qankunaqa Egiptomanta Israel runakuna hamushaqtinkun khuyapayaykurqankichis, nispa. Chaymi Cen runakunaqa chay llaqtamanta ripurqanku.

⁷Hinan Saulqa wañurachirqan Amalec runakunata Havilamanta qallarispa Egipto suyu inti lloqsimuy lado Shur ch'inneqkama.

⁸Amalec runakunaq reynin Agagtataq presota hap'irqorqanku, llapan runakunatañataq espadawan wañurachirqanku.

⁹Saultaq soldadonkunapiwan Agagta mana wañuchirqankuchu, manallataq allichachaq ovejakunata, wakakunata, wira torillokunata, borregokunatapas wañuchirqankuchu, ch'usaqyachirqankuqa llapan mana imapaq valeq kaqkunallatan.

¹⁰Chaymi Señor Diosqa Samuelta nirqan:

¹¹— Yanqapunin Saultaqa reyta churaykurqani, kamachisqaykunata mana hunt'aspan waqllirqapun, nispa. Niqtinmi Samuelqa llakikurqan, chay tutataq illariqta Señor Diosman waqyakurqan.

¹²Pacha illarimuytataq Samuelqa Saúl maskhaq purirqan, hinan runakunaqa willarqanku: — Saulqa Carmel llaqtantan muyumun, chaypitaqmi paymanta yuyarina saywata perqaspa Gilgal llaqtaman ripun, nispa.

¹³Chaymanmi Samuelqa chayarqorqan Saulpa kasqanman, Saultaq payta nirqan: — Señor Dios saminchasunki, kayqa Señor Diospa kamachiwasqantaqa hunt'arqamunin, nispa.

¹⁴Samueltaq nirqan: — Chay hinari, ¿ima ovejakunaq waqasqantataq uyarishani? ¿Ima wakakunaq waqasqantataq uyarishani? nispa.

¹⁵Saultaq nirqan: — Soldadokunan Amalec runakunamanta allichaqnin ovejakunata wakakunata ima apamurqanku, Diosniyki Señor Diosman sacrificio haywanankupaq, ichaqa llapantapunin wañuchimurqayku wakin uywakunataqa, nispa.

¹⁶Chaymi Samuelqa nirqan: — ¡Upallay! Aswanpas uyariway, Señor Diospa qayna tuta niwasqantan willasqayki, nispa. Saultaq: — Niway, nirqan.

¹⁷Hinan Samuelqa nirqan: — Qan kikiykin pisipaq qhawarikurqanki, riki. Chay tukuywanpas Israel suyupi kamachikuqpuniraqmi kanki, Señor Diosmi Israelpi rey kanaykipaq aceitewan hawirqasunki.

¹⁸Hinaspan qanta Señor Diosqa allinta kamachispa kacharqasunki huchasapa Amalec runakunata hap'ispa llapanta wañuchimunaykipaq.

¹⁹Chayri, ¿imanaqtintaq qanri mana kasukuspa awqanmanta llat'anaspa qechumusqata apakamunki, Señor Diospa ñawpaqenpi mana allinta ruwaspa? nispa.

²⁰Saultaq kutichirqan: — Ñoqaqa allintan ruwashani, Señor Diospa kamachiwasqantapas llapantan hunt'ashani, chaymi Amalec runakunaq reynin Agagtapas presota apamurqani, Amalec runakunatapas llapantan wañuchimurqani.

²¹Soldadokunan ichaqa wañuchinapaq kaq uywakunamanta allichaqninkunata wakata, ovejakunata apamurqanku Gilgalpi Diosniyki Señor Diosman haywanankupaq, nispa.

²²Hinaqtinmi Samuelqa nirqan: — Señor Diospa qayllanpi aswan allinqa kasukuymi ruphachina sacrificiota wak sacrificiotawan haywaymantaqa. Aswan allinqa uyarikuymi, kasukuymi uywakunaq wiran ruphachinamantaqa.

²³Señor Dios contra sayariqqa, watuqwan kuska huchachasqan, idolota yupaychaqwan kuskachasqan, chay llapa mana kasukuqkunaqa. Qanpas manañataq kamachikusqanta kasukunkichu chayqa, paypas rey kanaykitaqa manan munanñachu, nispa.

²⁴Chaymi Saulqa Samuelta nirqan: — Cheqaqtapunin huchallikuni Señor Diospa kamachisqanta qanpa nisqaykitapas mana kasukuspa, llaqta runata manchakuspaymi mañakusqankuta ruwarqani.

²⁵Pampachaykuwaypuni kay huchayta. Haku, kutiysiway Señor Diosta yupaychaykuq, nispa.

²⁶Samueltaq nirqan: — Manan kutiysiykimanchu, Señor Diosmi Israelpi rey kanaykita mana munanñachu, paypa kamachinta mana hunt'asqaykimanta, nispa.

²⁷Samuel ripunanpaq kutirishaqtintaq Saulqa capanmanta hap'ipakuspa ch'ullpanta llik'irqorqan.

²⁸Chaymi Samuelqa kutirimuspa Saulta nirqan: — Ahinallatataqmi Señor Diosqa Israel suyupi rey-kayniyta qanmanta llik'iqapun, hinaspanmi qanmanta aswan allinnin kaq llaqtamasiykiman qopunña.

²⁹Israelpa Qhapaq-atiyniyoq Diosninqa manan llullakuqchu, manataqmi yanqa runachu qhepataña yuyaykukunanpaqpas, nispa.

³⁰Hinan Saulqa nirqan: — Huchallikunipunin, chay tukuywanpas valekuykin Israel kurak runakunaq qayllanpiqa reyta hinapuniraqyá qhawariway. Chhaynaqa, riysiwaypuniraq Diosniyki Señor Diosta yupaychaysimuway, nispa.

³¹Chaymi Samuelqa paypa qhepanta rirqan, Saultaq Señor Diosta yupaychaykurqan.

³²Samueltaq nirqan: — Pusamuway Amalec runakunaq reynin Agagta, nispa. Agagtaq kusisqa Samuelpa ñawpaqenman hamurqan, phiñakuywan wañuchinakuyqa pasarqapunñan, nispa.

³³Samueltaq nirqan: — Imaynan qanpas espadaykiwan askha warmiq wawanta wañurqarichirqanki, kaqllataqmi mamaykipas mana churiyoq kapunqa, nispa Agagta nak'aspa Gilgalpi Señor Diospa ñawpaqenpi kuchurqarirqan.

³⁴Chaymantan Samuelqa Ramá llaqtata ripurqan. Saulñataq Gabaa llaqtapi wasinman kutipurqan.

³⁵Manaña astawanpas Saulta rikuspataq, Samuelqa khuyayta waqarqan. Señor Diostaq llakikurqan Saulta Israel suyuman rey churasqanmanta.