Read Diospa Simin Qelqa 1 SAMUEL 17 Bible Online

1 SAMUEL 17 - Diospa Simin Qelqa bible

1 SAMUEL 17

¹Filistea runakunan soldadonkunata maqanakuypaq huñuykurqan Judá hap'iypi Soco llaqtaman, hinaspan Efes-damimpi karpakurqanku Azeca llaqtawan Soco llaqtawan tupaypi.

²Chay hinallataq Saulpas Israel runakunata huñuykurqan, hinaspan Ela wayq'opi karpakurqanku, Filistea runakunawan maqanakunankupaq wakichikuspa.

³Israel runakunawan Filistea runakunawantaq Ela wayq'oq chimpapuranpi kasharqanku.

⁴Chayllamanmi Filistea soldadokunamanta huknin lloqsimurqan Goliat sutiyoq, Gat llaqtamanta allin maqanakuy yachaq. Payqa yaqa kinsa metro hina sayayniyoqmi karqan.

⁵Umanpi casconmi broncemanta karqan, cuerponpas broncemanta unkuwan allin p'achasqa, chaytaq llasarqan phisqa chunka phisqayoq kilota.

⁶Chakinpipas broncemantan escarpinnin karqan, hinallataq q'epirqan huk jabalinata.

⁷Lanzanpa hap'inantaq telarpi bayeta k'uyuna k'aspi hina rakhuyoq karqan, fierromanta ñawch'intaq llasarqan soqta kilo kurakta. Ñawpaqentataq escudon apaysiqnin phawarqan.

⁸Hinaspataq sayaykuspa waqyakamurqan Israelpa soldadonkunata: — ¿Imapaqmi hamunkichis maqanakuqqa? ¿Ñoqaqa manachu Filistea runa kashani, qankunataq Saulpa kamachinkunalla? Akllaychis qankuna ukhumanta allinnin qharita maqanakunaypaq.

⁹Ñoqawan maqanakuspachus atiparqowaspa wañurqachiwanqa chayqa, qankunaq kamachiykichismi kapusaqku. Ñoqataqchus atipaspa wañurqachipusaq chayqa, ñoqaykuq kamachiykun kapunkichis.

¹⁰Qhari kaspaqa, hamuychis maqanakusunchis. ¡Kachamuwaychis huk qharita ñoqawan maqanakunanpaq! nispa.

¹¹Chayta nimuqtintaq, Saulpas llapan Israel runakunapas pasaqta mancharikurqanku.

¹²Judá hap'iy Belén llaqtapin tiyarqan Efrata runa Isaí sutiyoq. Saulpa p'unchayninkunapitaq sinchi yuyaqña karqan. Chay runaq churinkunan pusaq karqan, hukkaqninpa sutintaq David, karqan.

¹³Isaipa kinsantin churinkunaqa Saulwan kuskan maqanakuypi kasharqanku, chaykunan Eliab, Abinadab, Samapiwan karqanku.

¹⁴Davidqa aswan sullk'an karqan, chay kinsantin kurak kaqkunataq Saulta qatikurqanku.

¹⁵Davidqa Saulpa kasqanta rishaqtaq, Belenpi taytanpa ovejan michiqpas kutimushaqtaq.

¹⁶Chay Filistea runaqa tawa chunka p'unchaynintinmi Israel runakunata ch'isin paqar k'amimuq.

¹⁷Taytan Isaimi Davidta nirqan: — Phaway wawqeykikuna watukuq, huk arroba hank'ata chunka t'antatawan aparikuspa, paykunaqa karpa-karpapin kashanku.

¹⁸Waranqa soldado kamachiqpaqtaq chunka quesota aparikuy, hinaspa qhawarqamuy imaynachus kashanku wawqeykikuna chayta. Allillan kashanku chayqa, imallankutapas apamunkipuni yachanaypaq.

¹⁹Paykunaqa Saulwan kuskan, llapan Israel runakunapiwan Ela wayq'opi Filistea runakunawan maqanakushanku, nispa.

²⁰Chaymi Davidqa tutallamanta ovejanta huk michiqman saqeykuspa puririrqan, taytanpa apachisqanta aparikuspa. Davidpa karpa-karpaman chayananpaqtaq, soldadokunaqa maqanakuq lloqsishaspanku kunkayoqta qaparisharqanku.

²¹Sayaykurqankutaq chimpa-chimpapura Israel runakunawan Filistea runakunapiwan.

²²Chayaspataq Davidqa q'epinta q'epi qhawaqman saqeykuspa, soldadokuna ukhuman phawaykurqan wawqenkunamanta imaynachus kashasqankuta tapukuq.

²³Paykunawan parlashaqtintaq Gat llaqtayoq Goliat sutiyoq Filistea runaqa lloqsimurqan, ñawpaq p'unchaykuna hina: Qhari kaspaqa hamuychis maqanakusun, nispa. Davidtaq chayta uyarirqan.

²⁴Chay runata rikuspataq Israel runakunaqa mancharikuymanta ayqerikapurqanku.

²⁵Nirqankutaq: — ¿Qhawarinkichischu haqay runata chay hina lloqsimusqanta? Israel imaymana k'amiqmi wakmanta hamun. Haqay runata atipaqmanmi reyqa qonqa qhapaq kaykunata, ususintawanpas, ayllunpa chakrankunamantapas manan impuestota pagachinqachu, nispanku.

²⁶Davidñataq tapupakusharqan chaypi kaqkunata: — ¿Imatataq qonqaku haqay Filistea runata atipaqmanri? ¿Imatataq qonqaku Israelta p'enqachiq runata wañuchiqmanri? ¿Pitaq kanman haqay mana iñiyniyoq runari, kawsaq Diospa soldadonkunata imaymana k'amiqri? nispa.

²⁷Paykunataq nirqanku ñawpaq nisqanku hinatakama, Goliat wañuchiqman imatachus qonanta.

²⁸Chay runakunawan Davidpa parlasqanta uyarispataq kuraknin Eliabqa phiñarikuspa k'amirqan: — ¿Imamanmi hamunki? ¿Pimanmi chay pisi ovejakunatapas saqemunki chay ch'usaq pampapi? Maqanakuq qhawaqmi qanqa phawamunki, qantaqa reqsiykin gustonero kasqaykita, nispa.

²⁹Davidtaq nirqan: — ¿Imatataq ñoqari ruwashani? ¿Manañachu parlarikuyman? nispa.

³⁰Hukman asuykuspataq kaqllatataq tapukurqan, chay runapas wakinkunaq nisqanta hinallatapunin nirqan.

³¹Davidpa chay rimasqantataq Saulman willarqorqanku, paytaq chayta uyarispa waqyarqachirqan.

³²Hinan Davidqa Saulta nirqan: — Ama pipas haqay runataqa manchakuychischu, ñoqa kamachiykin paywan maqanakuq risaq, nispa.

³³Saultaq nirqan: — Manan haqay Filistea runawanqa maqanakuyta atiwaqchu, qanqa erqellaraqmi kanki, chay runan ichaqa wayna-kayninmantapacha maqanakuqpuni, nispa.

³⁴Davidtaq nirqan: — Ñoqa kamachiykiqa taytaypa ovejankunata michiqmi kani. Chayman leonkuna ukumarikuna hamuspa ovejata apashaqtinmi,

³⁵qhepanta phawarispa siminmantapas qechullanipuni, kutirimuwaqtintaqmi qhaqllinmanta hap'ispa sipinaykama p'anaq kani.

³⁶Leonña ukumariña hamuqtinpas kamachiykiqa wañuchillanipunin, ñoqapaqqa chhaynallataqmi haqay mana iñiyniyoq Filistea runapas. ¿Pi hinan payqa kawsaq Diospa soldadonta imaymanata k'aminman karqan?

³⁷Haqay Filistea runaq makinmantaqa Señor Diosmi qechuwanqa, imaynan leonpa sillunmanta ukumariq sillunmantapas qechuwarqan hinata, nispa. Niqtinmi Saulqa nirqan: — Chhaynaqa, riy, Señor Dios yanapasunki, nispa.

³⁸Chaymantataq Saulqa soldado p'achakunawan Davidta p'acharqachirqan, broncemanta casconwan unkunwan ima.

³⁹P'achakusqan pataman espadawanpas warkuykurqan, puriykacharispataq mana atirqanchu, chay hina p'achawan mana hayk'aqpas churakusqanrayku. Chaymi Saulta nirqan: — Manan atinichu puriyta, manan kay hina p'achawan churakurqanichu, nispa. Hinaspan p'achata ch'utirparispa,

⁴⁰tawnachanta aparikuspa, phisqa llusk'a rumichakunata mayumanta hoqariykukurqan, michiq rispa apakunan wayaqachanmantaq churaykurqan. Hinaspa warak'anta aparikuspa, Filistea runaman qayllaykurqan.

⁴¹Filistea runataq payman pisimanta-pisi qayllaykamurqan, escudo apaysiqnintaq ñawpaqenta rirqan.

⁴²Davidta qhawarimuspataq Goliatqa rikurqamurqan sumaq rikch'ayniyoq puka uya waynachata, chaymi pisichaspa

⁴³Davidtaqa nimurqan: — ¿Ñoqari alqochu kashani k'aspintin hamuwanaykipaq? nispa. Chaymantapas diosninpa sutinpi Davidta ñakaspa nirqan:

⁴⁴— Hamuy, aychaykitan ankakunaman salqa animalkunamanwan qaraykusaq, nispa.

⁴⁵Chaykunata niqtintaq Davidqa nirqan: — Qanqa hamuwanki lanzayoq, espadayoq, jabalinayoq, ñoqataq ichaqa Tukuy-atiyniyoq Señor Diospa sutinpi hamuyki. Paymi Israel soldadokunaq Diosninqa, paykunatan qanqa: Hamuychis qhari kaspaqa, nispa nimurqanki.

⁴⁶Kunanmi qanta Señor Diosqa makiyman hap'iykachiwanqa, hinaspan qanta wañurqachispa umaykita qhorusqayki. Filistea soldadokunaq ayantapas ankakunamanmi salqa animalkunamanwan qaraykusaq. Ahinapin llapan runa yachanqa Israelpi Dios kasqanta,

⁴⁷hinallataq kay runakunapas yachanqa Señor Diosqa mana espadawanchu mana lanzawanpaschu qespichiq kasqanta. Kay maqanakuyqa Señor Diospa munayninpin kashan, chayraykun qankunata makiykuman hap'iykachiwanqaku, nispa.

⁴⁸Hinaqtinmi Filistea runaqa David ladoman puririmurqan paywan maqanakunanpaq, kaqllataq Davidpas phawarirqan Filistea runawan maqanakuna pataman.

⁴⁹Wayaqachanmanta rumita horqokamuspataq warak'anwan warak'arqan. Rumitaq Goliatpa mat'inpi ch'antikurqan, wañusqataq uyanpamanta kumpakurqan.

⁵⁰Chay hinatan Davidqa Filistea runata atiparqan, mana espadallawan aswanpas rumiwan warak'aspalla wañuchipurqan.

⁵¹Phawarispataq Goliatpa ladonpi sayaykuspa espadanta waqaychananmanta horqorqorqan, chaywantaq sipipaykuspa umanta qhorurqan. Filistea runakunataq allin maqanakuq umallinkuta wañusqata rikuspa ayqekapurqanku.

⁵²Israel runakunawan Judá runakunapiwantaq qaparkachakuspa Filistea runakunaq qhepanta phawarqanku Gat llaqtaman haykuna punkukama, hinallataq wak ladomanpas Ecrón llaqtaq punkunkamaraq. Ñankunapitaq Filistea runakuna wikch'u-wikch'u wañuchisqa karqan, Saaraim llaqtamanta Gat llaqtaman rina ñanpi, kaqllataq Ecrón llaqtaman rina ñanpipas.

⁵³Filistea runakunata qatiykachasqankumanta kutimuspataq, Israel runakunaqa awqankuq karpankunata llat'anarqanku.

⁵⁴Davidtaq Goliatpa umanta Jerusalenman aparqan, armankunatataq karpanman churaykurqan.

⁵⁵Goliatwan David maqanakuq rishaqtinmi, Saulqa ejercitonpa umallin Abnerta tapuykurqan: — ¿Piqpa churinmi haqay wayna? nispa.

⁵⁶Abnertaq nirqan: — Juranin, reyníy, manapunin yachanichu, piqpa churinchá, nispa. Reytaq nirqan: Tapuykunkin piqpa churinchus kasqanta, nispa.

⁵⁷Filistea runa wañuchisqanmantan Davidqa uman aysaykusqa kutimusharqan, hinan Abnerqa payta Saulman pusarqan.

⁵⁸Saultaq tapuykurqan: — Wayna, ¿piqpa churinmi kanki? nispa. Davidtaq kutichirqan: — Ñoqaqa Belén llaqtayoq Isaí kamachiykiq churinmi kani, nispa.