Read Diospa Simin Qelqa 1 SAMUEL 2 Bible Online

1 SAMUEL 2 - Diospa Simin Qelqa bible

1 SAMUEL 2

¹Anataq mañakuspa nirqan: — Señor Diosníy, tukuy sonqoymantan kusikushani, qanmi mosoq kallpa qoqniy kanki. Kunanqa kanmi simiypas awqaypaq, chayraykun qespichiwasqaykimanta kusikushani.

²Señor Diosníy, manapunin qan hina ch'uyaqa kanchu, manan huk diosqa kanchu, manan qan hina hatun Qaqaqa kanchu.

³Upallaychis, umata hoqarispa sinchi rimaqkuna, ch'inllaña kaychis, kallpawan rimaqkuna, Señor Diosmi tukuy imaymana yachaqqa, paymi tukuy ruwasqakunata chaninchaqqa.

⁴Kallpasapakunaq p'eqtantan p'akin, mana kallpayoqkunatataq kallpachan.

⁵Askha mikhunayoqkunan qonqaylla mana kapuqtin llank'apakapushanku, yarqasqa mana imayoqkunataq hunt'asqa mikhunayoq rikhuripurqanku, mana wachakuq warmipas qanchiskaman wachakapun, askha wawayoqtaqmi mana wachakuqman tukupun.

⁶Señor Diosmi kawsay qechuqpas kawsay qoqpas, payllataqmi wañuy pachaman uraykachiqpas, chaymanta kawsarichimuqpas.

⁷Señor Diosmi wakinta wakchayachin, wakintataq qhapaqyachin, wakinta huch'uyyachin, wakintataq hatunyachin.

⁸P'enqaypi kashaq wakchatapas qhapaqyachinmi, mana imayoqtapas wakcha kayninmanta horqonmi, kamachikuqkunawan kuska tiyananpaq, paykunawan kuska yupasqa kananpaq. Señor Diosmi pachaq takyananta ruwaqqa, chay patamanmi kay pachata churaykurqan.

⁹Diosmi pay sonqo runankunata waqaychan, mana allin runataq kaq tutayaqpi chinkapun. Manan pipas pay kikillanpa kallpanwanqa atipanchu,

¹⁰Señor Diosmi awqankunata lliwta ñut'unqa, hanaq pachamantan paykuna pataman t'oqyamunqa. Señor Diosqa teqsimuyuntintan juzganqa. Reynintan ichaqa kallpachanqa, akllakusqantan atipachinqa, nispa.

¹¹Elcanan Ramá llaqtapi wasinman kutipurqan, wawataq Eliwan kuska Señor Diosta servispa qhepapurqan.

¹²Elipa churinkunataq Diosta mana manchakuq millay karqanku.

¹³Pipas Señor Diosman sacrificiota haywayta munaspa aychata t'impuchishaqtinmi, sacerdoteq kamachinqa kinsa puntayoq trinche apaykusqa hamuq,

¹⁴chayllaraq aycha t'impushaqtinmi, chay trinchewan mankaman sat'iykuspa wakin aychata sacerdotepaq aparikuq. Paykunaqa chay hinallatapunin Siloman hamuq llapa Israel runakunawan ruwasharqanku.

¹⁵Hinallataq manaraq wiranta rupharqoshaqtin, chay kamachiqa haywaqkunaman aycha mañakuq hamuq: Qoway hanku aychallata sacerdoteq q'aspachikunanpaq, t'impusqa aychataqa manan munanchu, nispa.

¹⁶Chaymi pillapas: Wirantaraqyá ruphachun, chaymantaqa apashankichá, niqtinqa: Manan, kunanpunin munani qowanaykita, mana chaytaqmi qechurqosqayki, nispa niq.

¹⁷Chay hinan Señor Diospa qhawarinanpaq waynakunaq huchanqa sinchipuni karqan, Señor Diospaq qosqa ofrendakunata mana kaqpaq hap'isqankurayku.

¹⁸Chaykaman Samuelqa Señor Diosta linomanta unkuyoq servisharqan.

¹⁹Sapa watallan Anaqa p'achata ruwaspa apamuq, qosantin sacrificio haywaq Silo llaqtaman wichaspanku.

²⁰Chaypin Eliqa Elcanata warmin Anatawan saminchaykuq: Señor Diosyari kunanqa kay wawaq rantinpi askhataraq qosunkichis, nispa. Paykunataq wasinkuman kutipurqanku.

²¹Hinan Señor Diosqa Anamanta yuyarikurqan, chaymi payqa wiksallikurqan, wachakurqantaq kinsa qhari iskay warmi wawakunata. Chaykamataq Samuelqa Señor Diosta servispa hatunña wiñasharqan.

²²Eliqa sinchitañan machuyaykapusharqan, churinkunaq Israel runakunata millay ruwasqantapas uyarishallarqanpunin, Dioswan Tupana Karpa haykuna punkupi llank'aq warmikunawan puñusqankutapas.

²³Chaymi Eliqa paykunata nirqan: — ¿Imaraykun chay hinata ruwankichis? Ñoqamanqa llaqtantin runan willawanku imaymana mana allin ruwasqaykichista.

²⁴¡Wawallaykuna, saqepuychisyá! ¡Llaqtantin runakunaq willakusqanqa sinchi mana allinmi!

²⁵Huk runachus runamasin contra huchallikun chayqa, kanmi Dios payta chaninchananpaq, Señor Dios contrachus huchallikun chayqa, ¿Piñataq paymanta valepakuq kanqa? Nishaqtinpas taytankuq nisqantaqa manan kasurqankuchu, chayraykun Señor Diosqa yuyaykurqanña paykuna wañuchiyta.

²⁶Chaykamataq Samuel waynaqa Señor Diospa qayllanpi wiñasharqan, runakunaqpas allinpaq hap'isqan.

²⁷Diospa profetantaq Eliman hamuspa nirqan: — Señor Diosmi nin: Ñawpa taytayki Aaronmanqa sut'itan rikuchirqani, Egipto rey Faraonpa kamachin kashaqtinku.

²⁸Chaypin llapan Israel ayllukunamantapas paypa ayllunta akllakurqani, sacerdoteykuna kanankupaq, ñawpaqeypi unkuwan churakunankupaq, altarniy patapi sacrificiota haywawanankupaq, inciensotapas q'apachimuwanankupaq. Hinallataq llapan Israelpa ofrenda apamusqankumanta kawsanankupaq qorqani.

²⁹¿Imanaqtintaq qanri ñoqaq kamachikusqay ofrendakunata sacrificiokunatapas mana valeqpaq qhawarinki? ¿Imanaqtinmi ñoqamanta aswanta churiykikunata hatunchanki? ¿Imanaqtinmi llaqtaypa ofrenda apamusqanmanta allinninkunawan wirayachishanki? nispa.

³⁰Chaymi Israelpa Diosnin Señorqa nin: Ñoqan prometekurqani ñawpa taytaykiq ayllunman qanpa aylluykimanpas ñoqata wiñaypaq serviwanankupaq. Kunanmi ichaqa manaña prometekusqayta ruwasaqñachu. Ñoqa hatunchawaqniytaqa hatunchasaqmi, pisichawaqniytapas pisichallasaqtaqmi.

³¹Kunanqa chayamushanñan taytaykiq aylluntapas qantapas chinkachipunay p'unchay, manañan kanqañachu hukllapas yuyaq kanankama kawsaq.

³²Qanmi llakisqa munapayaspa qhawanki Israel llaqtay saminchasqayta, manataqmi qanpa aylluykimantaqa hukllapas yuyaq kanankama kawsaq kanqachu.

³³Chaywanpas saqesaqraqmi aylluykimanta hukninta serviwananpaq, paymi ñawsayapuspa llakikusqanpi tukukunqa, wakintaq kallpallankupiraq kashaqtin wañurqachisqa kanqaku.

³⁴Churiyki Ofniwan Fineespiwanmi huk p'unchayllapi wañupunqaku, kaymi reqsinaykipaq señal kanqa.

³⁵Ñoqan ichaqa huk allin sacerdoteta akllakusaq, tukuy munasqaytan payqa ruwanqa, miraynintaqmi allin sayaq kanqa, aceitewan hawisqa reypa qayllanpipas tukuy p'unchay servinanpaq.

³⁶Aylluykipi qhepaq runakunataqmi llapanku payman k'umuykunqaku, huk pisi t'antata huk pisi qolqetawan mañakunankupaq. Ninqakutaq: Ama hinachu kay, valekuykikun, sacerdoteq ima ruwanallanmanpas churaykuwayku, chay hinapi imallapas mikhunayku kananpaq, nispanku.