Read Diospa Simin Qelqa 1 SAMUEL 20 Bible Online

1 SAMUEL 20 - Diospa Simin Qelqa bible

1 SAMUEL 20

¹Davidmi Ramá llaqtapi kaq Naiotmanta ayqekapurqan, Jonatanpa kasqanman chayaspataq nirqan: — ¿Imatataq ruwarqani? ¿Mayqentaq huchallikusqay? ¿Ima huchatataq taytayki contra ñoqari ruwarqani wañuchiwananpaq maskhawananpaqri? nispa.

²Hinaqtinmi Jonatanqa nirqan: — ¡Diosqa manan munanqachu! ¡Manan wañuchisunkichu! Taytayqa manan imatapas mana willawaspaqa ruwayta yachanchu hatuntapas huch'uytapas, ¿chaychu kunan mana willawanman qan wañuchinanta? Manan hinachu kanqa, nispa.

³Davidtaq kutichirqan: — Taytaykiqa allintan yachan munanakusqanchista, chaymi mana willasunkichu mana llakikunaykita munaspa. Señor Diosraykun qanraykun jurani wañuy patallapiña kashasqayta, nispa.

⁴Hinan Jonatanqa Davidta nirqan: — Qanraykuqa imatapas ruwasaqmi. ¿Ima ruwanaytataq munanki? nispa.

⁵Davidtaq Jonatanta nirqan: — Paqarinqa Mosoq Killa Fiestan riki, chaypiqa reywanpunin mikhuyta yachani, chay hinaqa, ama hinachu kay, minchha ch'isikama pampapi pakakuq risaq.

⁶Taytayki watukuwaqtinqa ninki: Belén llaqtanta rirqonanpaqmi Davidqa valeykukuwan, llapan ayllunkunan sapa wata sacrificiota haywanku, nispa.

⁷Niqtiyki: Allinmi rin, ninqa chayqa, sut'i kanqa mana wañunay. Phiñakunqataqchus chaymi ichaqa, yachasun mana allin ruwayta yuyaykuwasqanta.

⁸Chay hinaqa, ama hinachu kay, kamachiykiq valekusqayta ruwaykuwaypuni, ñataq qanwan ñoqawan Señor Diospa qayllanpipas amigontin kananchispaq rimanakurqanchis chayqa. Ichaqa ñoqataqchus huchallikuni chayqa, qan wañurqachipuway, manan munaymanchu taytaykimanraq apawanaykitaqa, nispa.

⁹Jonatantaq ichaqa nirqan: — Manan imapas kasunkichu. ¿Ñoqari manachu willaykiman taytay ima mana allintapas yuyaykusqantari? nispa.

¹⁰Chaymi Davidqa nirqan: — ¿Pitaq willawanqa taytaykiq phiñarikusqantari? nispa.

¹¹Hinan Jonatanqa: — Haku campota rirqosunchis, nirqan. Iskayninkutaq rirqanku.

¹²Chaypitaq Davidta Jonatanqa nirqan: — Israelpa Diosnin Señormi yachan, minchha p'unchay kay horasta taytay imatachus qanmanta yuyaykushasqanta reparanayta. Qanmanta allintataq rimanqa chayqa, willaqtan kachamusqayki.

¹³Ichaqa, taytay qanta mana allin ruwaytapuni yuyaykushaqtin, mana willamusqaykichu allillan ayqekapunaykipaq chayqa, Señor Dios sinchitapuni ñak'arichiwachun. Señor Diostaq qanwanpuni kachun, taytaywanpas kasharqan hinata.

¹⁴Qhepa p'unchayman kawsasaqraq chayqa, imaynatan Señor Dios khuyapayarqasunki chhaynallatataq ñoqatapas khuyapayawanki. Wañukapusaqña chaypas,

¹⁵wawaykunataqa qhawaripullawankipunin, hinaña Señor Dios chinkachinqa llapan awqaykikunata ch'ulla-ch'ullamanta chaypas.

¹⁶Chayta mana hunt'aqtiykitaq, Señor Dios aylluykimanta cuentata mañachun, nispa. Chay hinatan Jonatanqa Davidpa ayllunwan rimanakurqan.

¹⁷Chaymantapas Jonatanqa pay kikinta hinapuni munakusqanraykun wakmanta Davidta jurachirqan Jonatán munakusqanta hunt'ananpaq.

¹⁸Jonatantaq nirqan: — Paqarinqa Mosoq Killa Fiestan riki, tiyanayki ch'usaq kaqtinmi, qanta watukusunkiku.

¹⁹Minchhakaq p'unchaymi ichaqa aswantaña watukusunkiku. Chayrayku, phaway, qayna pakakusqaykipi pakakamuy, rumi tawqasqa cheqaspi.

²⁰Ñoqataqmi kinsa kutita wach'imusaq imatapas wach'ishaq hina kasqayki cheqasman.

²¹Chaymantataqmi kamachiyta kachamusaq wach'isqay maskhaqta, hinaspan qan hamunayki kaqtinqa nimusaq: ¡Kayneqpin kashan, hoqarispa hamuy! nispa, niqtiyqa ama llakikuspallan hampunki, Señor Diosmi yachan mana imapas kanasuykita.

²²Phaway haqayneqpin wach'iqa kashan, nispa, niqtiymi ichaqa, ripunki, Señor Dios ripunaykita munasqanrayku.

²³Yuyariy, tukuy kay yuyaykuspa rimasqanchistaqa Señor Diosllanchismi wiñaypaq yachan, nispa.

²⁴Hinan Davidqa campoman pakakuq ripurqan. Mosoq Killa Fiesta chayamuqtintaq, reyqa mikhuq mesapi tiyaykurqan.

²⁵Reyqa perqa k'uchu tiyananpin tiyaykurqan, Jonatantaq reypa ñawpaqenpi tiyaykurqan, Abnerñataq reypa ladonpi, Davidpa tiyanantaq ch'usaq kapusharqan.

²⁶Chay p'unchayqa manan Saulqa ima nirqanpaschu, aswanmi payqa yuyaykurqan: Imachá karqon, ¿manachu ch'uyapas? Yaqapunichá mana ch'uyachu, nispa.

²⁷Paqarisnin iskaykaq p'unchaypas Davidpa tiyananqa ch'usaqllapunin kasharqan, chaymi churin Jonatanta tapuykurqan: — Qayna p'unchaypas, kunan p'unchaypas, ¿imanaqtintaq Isaipa churinqa mana mikhuq hamunchu? nispa.

²⁸Jonatantaq kutichirqan: — Sinchitapunin valeykukuwarqan Belenta rinanpaq.

²⁹Niwarqanmi: Wawqeymi waqyachimuwasqa, hinatayá risaq, aylluymi llaqtaypi sacrificiota haywanqaku. Chayraykun valeykukuykipuni wawqeykunaman ratolla rirqonaypaq, nispa. Chaymi payqa mana ñoqanchiswanchu kashan, reyníy, nispa.

³⁰Hinan Saulqa manchayta phiñarikuspa Jonatanta k'amirqan: — ¡Yaw, mana chanin warmiq wawan! ¿Manachu ñoqaqa yachashani Isaipa churinwan ancha amigontin kanaykichispaq rimanakusqaykichista? Yachakuy allinta hatun p'enqaytan kaytaqa ruwashanki qanpaqpas mamaykipaqpas.

³¹David kawsashallanqapuni chayqa, manan qanpaq rey kayniykipas kawsanaykipas yachakunchu. Chayrayku, ¡pasay, maskhachimuspa pusachimuy, cheqaqtapunin payqa wañunan! nispa.

³²Chaymi Jonatanqa tapuykurqan: — ¿Imatataq ruwarqan, chaytaq wañunqari? nispa.

³³Niqtinmi Saulqa lanzanwan churinta chanqarqorqan wañurqachinanpaq. Chaymi Jonatanqa aswan allinta yacharqapurqan taytanpa Davidta wañuchiytapuni munashasqanta.

³⁴Hinan Jonatanqa sinchi phiñasqa mikhunan mesamanta sayarirqorqan, Davidmantawan taytanpa p'enqayta nisqanmantawan sinchi llakisqa. Chaymi chay iskaykaq p'unchaypi manaña mikhuysirqanñachu.

³⁵Hinan Jonatanqa qhepantin paqar huk erqeta pusaykukuspa campoman lloqsirqan Davidwan rimasqanku horasta.

³⁶Erqetataq nirqan: — Kunanmi wach'isqayta apamunaykipaq phawanki, nispa. Wach'irqantaq erqeq phawashanankama ñawpaqenman chayachiq hina.

³⁷Wach'isqan chayasqanman chayarqoqtintaq, payqa waqyakurqan: — ¡Wach'isqaqa aswan ñawpaqeykipiraqmi kashan! nispa.

³⁸Wakmanta waqyakullarqantaq: — ¡Ama sayaykuspa usqhaylla phaway! nispa. Wach'isqakunata pallarqamuspataq uywaqninman aparqamurqan.

³⁹Manataq imatapas erqeqa repararqanchu, Davidwan Jonatanllawanmi yacharqanku.

⁴⁰Hinaspataq Jonatanqa armanta erqeman qoykurqan: — Phaway apashayña llaqtaman, nispa.

⁴¹Erqe ripuqtintaq Davidqa pakakusqan rumi tawqasqamanta lloqsirqamuspa, kinsa kutikama mat'in pampaman chayanankama Jonatanpa ñawpaqenpi k'umuykukurqan. Chaymantataq iskayninku waqaykukuspa oqllaykunakuspa much'aykunakurqanku, Davidtaq aswan sinchitapuni waqaykurqan.

⁴²Chay qhepatataq Jonatanqa Davidta nirqan: — Señor Diospa sutinpi juraspan nirqanchis: Señor Diosmi testigonchis, hinallataq mirayniykipaqpas mirayniypaqpas wiñaypaq testigo kanqa, nispanchis. Chay hinaqa, ama llakikuspalla ripuy, nispa. Hinan Davidqa ripurqan, Jonatantaq llaqtaman kutipurqan.