Read Diospa Simin Qelqa 1 SAMUEL 24 Bible Online

1 SAMUEL 24 - Diospa Simin Qelqa bible

1 SAMUEL 24

¹Filistea runakunata qatiykachasqanmanta kutimuqtintaq, Saulman willaykurqanku Davidpa En-gadi ch'inneqpi kashasqanta.

²Chaymi Saulqa akllarqan llapan Israelmanta kinsa waranqa qharita, hinaspan Davidta runankunantinta maskhaq rirqanku k'ita cabrakunaq purinan qaqa-qaqa k'awchikamaraq.

³Purishaspankutaq chayarqanku oveja puñuna astanakunaman. Chaykuna qayllapitaq hatun qaqa wasi karqan, Davidtaq runankunantin chay ukhupi pakakusharqanku, chaymanmi Saulqa hisp'akuq haykuykurqan.

⁴Kayqá kunanmi hunt'akun Señor Diospa nisqasuyki: Makiykimanmi awqaykita hap'iykachisqayki ima munasqaykita ruwanaykipaq, nispa. Hinan Davidqa ch'inlla sayarirqospa, Saulpa capan ch'ullpata wit'urqorqan.

⁵Chaymantañataq Davidqa wit'urqosqanmanta pasaqta llakirqokurqan.

⁶Chaymi runankunata nirqan: — Kayqa Señor Diospa akllakusqan reymi, Dios waqaychawachun wiraqochay reyta mana allin ruwanaymanta, nispa.

⁷Chay hinata nispan Davidqa runankunata hark'arqan, Saulta mana hap'inankuta munaspa. Saultaq chay qaqa wasimanta lloqsispa ñanninta ripurqan.

⁸Qhepanta hinallataq Davidqa qaqa wasimanta lloqsirqamuspa kunkayoqta waqyakurqan: — ¡Señorníy! ¡Reyníy! nispa. Saúl qhepanta qhawarikuqtintaq, Davidqa huch'uyyaykukuspa pampakama k'umuykukurqan,

⁹hinaspa nirqan: — ¿Imaraykun “Davidmi mana allinniykita yuyaykun” niqkunata uyarinki?

¹⁰Reyníy, kunanqa qan kikiykin yachakunki. Haqay qaqa wasipi qanta makiyman Señor Dios hap'ichishawaqtinpas, ñoqaqa manan qan wañuchiyta munanichu, aswanpas qantan khuyapayaykuyki: Kayqa Señor Diospa akllakusqan reymi, nispa.

¹¹Qhawariy, papáy, capaykiq ch'ullpantan hap'ishani. Qaqa wasiman haykumuqtiykin qanta mana wañuchiykichu, capaykiq ch'ullpallantan wit'urqoni. Kunanqa yachankin manapuni imamantapas awqayki kasqayta, manallataq qan contra ima mana allintapas ruwasqayta. Qanllapunin ichaqa wañuchiyta munawanki.

¹²Señor Diospuni iskayninchista chaninchachun, qanpa mana allin ruwasqaykimantataq Señor Dios ñak'arichisunki. Ñoqan ichaqa manapuni qan contra makillaytapas haywarisaqchu.

¹³Ñawpa rimaypin nin: “Mana allin-kayqa millaykunamantan paqarimun”, nispa, chayraykun ñoqaqa manapuni makillaytapas qan contra haywarisaqchu.

¹⁴Hinaspapas, ¿piqpa qhepantan Israelpa reynin lloqsimurqanki? ¿Pitan qatiykachashanki? Wañusqa alqotan, huk pikitan, chaymi ñoqaqa kani.

¹⁵Chayrayku, kikin Señor Dios chaninchachun, nichuntaq mayqenninchischus huchayoq kasqanchista. Paytaq ñoqata allinta qhawariwaspa makiykimanta horqowachun, nispa.

¹⁶Nimuyta tukuqtintaq Saulqa nirqan: — ¿Manachu qanqa waway David kashanki? nispa. Hinaspan waqaykurqan.

¹⁷Hinaspataq nimurqan: — Qanqa chaninpunin kanki, ñoqataq pantashasqani, mana allinta ruwashaqtiy allinwan kutichiwanki.

¹⁸Kunantaqmi rikuchiwanki ñoqaq allinniy munasqaykita, Señor Diosña makiykiman ñoqata hap'ichishasuqtiykipas, manan wañuchiwarqankichu.

¹⁹¿Pitaq awqan runata tarishaspa hinallata qhawaykunman? Señor Diosña qanman allinta kutichipusunki khuyapayaykuwasqaykimanta.

²⁰Kunanmi ichaqa, aswan cheqaqta yachani qan rey kanaykita, Israel suyupas qanwanqa allinta purinanta.

²¹Chayrayku, Señor Diospa sutinpi juraykapuway amapuni ñoqaq mirayniyta aylluytapas ch'usaqyachinaykita, nispa.

²²Chaymi Davidqa jurarqan, Saultaq wasinta ripurqan. Davidñataq runankunantin pakakunankuman kutipurqanku.