Read Diospa Simin Qelqa 1 SAMUEL 29 Bible Online

1 SAMUEL 29 - Diospa Simin Qelqa bible

1 SAMUEL 29

¹Filistea umallikunataq llapan soldadokunantin Afec llaqtapi huñuykukurqanku, Israel soldadokunataq Jezreel llaqta pukyu patapi karpakuspa kasharqanku.

²Filistea ejército umallikuna pachak-pachak t'aqawan waranqa-waranqa t'aqawan pasashaqtinkun, qhepallataña Aquiswan Davidpas soldadonkunantin hamushallarqantaq.

³Chaymi ejército umallikunaqa Aquista tapuykurqanku: — ¿Imatan munan kay Hebreo runakuna? nispanku. Hinan Aquisqa nirqan: — Israelpa reynin Saulpa oficialnin Davidmi kayqa, unayñan ñoqawan tiyakushan, manataqmi ima mana allintapas kunankama ruwanchu, nispa.

⁴Hinan Filistea ejército umallikunaqa Aquista phiñarikuspa nirqanku: — ¡Kachapuy kay runata maypichus tiyachisqaykiman! Ama ñoqanchiswan maqanakuyman richunchu. Kuskan maqanakuypichá awqanchis tukunman, hinaspataq soldadonchiskunaq umankuta qhoruspa reyninwan chaskichikuspa munaykachikapunman.

⁵¿Manachu kayqa David, tususpapas takirqanku: Saulmi waranqa runata wañuchimun, Davidtaq chunka waranqa runata wañuchimun, nispa? nispanku.

⁶Chaymi Aquisqa Davidta waqyarispa nirqan: — Señor Diosmi yachan qanqa hunt'aq runa kasqaykita. Ñoqapaqqa may allinmi maqanakuyman rinaykiqa kakushan, manan tarinichu ima mana allintapas ñoqawan purisqaykipi hamusqaykimantapacha kunankama. Ejército umallikunapaqmi ichaqa mana allinchu kanki.

⁷Chayrayku, aswan kutikapullay kusisqalla, paykunata ama phiñachinanchispaq, nispa.

⁸Davidtaq Aquista nirqan: — ¿Ima mana allintataq ñoqari ruwarqani? ¿Ima mana allin ruwasqaytataq tarinki qanwan kasqay p'unchaykunapi? ¿Chaytaq mana awqaykiwan maqanakuymanchu? nispa.

⁹Chaymi Aquisqa nirqan: — Ñoqapaqqa kusapunin kanki Diospa angelnin hinaraq, ichaqa Filistea ejército umallikunan mana munankuchu maqanakuyman ñoqaykuwan rinaykita.

¹⁰Chayrayku, qanpas qanwan hamuq Saulpa kamachinkunapas paqarin kutipunkichis chayraq illarimushaqtin, nispa.

¹¹Chaymi Davidqa runankunallantin paqarisnintin ripurqanku Filistea suyuman, Filistea soldadokunataq Jezreel llaqta cheqasman wicharqanku.