Read Diospa Simin Qelqa 1 SAMUEL 31 Bible Online

1 SAMUEL 31 - Diospa Simin Qelqa bible

1 SAMUEL 31

¹Filistea runakunan Israel runakunawan maqanakurqanku, hinan Israel runakunaqa atipachikuspa ayqekapurqanku, askhataq Gilboa orqopi wañurqanku.

²Filistea soldadokunataq Saulta churinkunantinta qatiparqanku, hinaspan Jonatanta, Abinadabta, Malquishuatawan wañuchirqanku.

³Sinchita maqanakuspankutaq Saulta chawpinarqorqanku, hinan wach'iqkunaqa payman tariparqospa sinchitapuni k'irirqanku.

⁴Chaymi Saulqa arma apaysiqninta nirqan: — Espadaykita horqokuspayki sat'irqoway, chay mana iñiqkuna manaraq hamushaqtin, paqtan aypamuwaspa sat'irqospa ñoqawan burlakunkuman, nispa. Arma apaysiqnintaq ichaqa mana munarqanchu, sinchita manchakusqanrayku. Chaymi Saulqa payllaña espadanta pampaman sayarqachispa chay pataman wikch'uykukurqan.

⁵Arma apaysiqnintaq wañusqata Saulta rikuspa, paypas Saúl hina ruwaspa wañupullarqantaq.

⁶Chay hinapin Saulqa kinsantin churintin wañupurqan, arma apaysiqninpas, llapan runankunapiwan.

⁷Chhaynallataq Jezreel qheswa wayq'opi tiyaq Israel runakuna, Jordán mayu inti lloqsimuy ladopi tiyaqkunapas Israel soldadokunaq ayqekapusqanta rikuspanku, Saulpa churinkunantin wañusqanta yacharqospanku, paykunapas llaqtankuta wikch'uspa ayqekapurqanku. Chaymi Filistea runakunaqa tiyanankupaq hunt'aykurqanku.

⁸Qhepantin p'unchaytaqmi Filistea soldadokunaqa ayakunaq p'achan ch'utiq rispanku, Saulta kinsantin churintinta Gilboa orqopi wañusqata tarirqanku.

⁹Hinaspan Saulpa umanta qhorurqanku, soldado p'achantapas ch'utirqanku, hinallataq runakunawan willachirqanku Filistea suyuntinpi runakunaman, diosninku yupaychana wasinmanpas.

¹⁰Saulpa armankunatapas Astarte diosankuq wasinman churarqanku, ayantañataq Betsán llaqta perqaman warkuykurqanku.

¹¹Galaadpi Jabes llaqta runakunataq Saulta Filistea runakunaq warkusqanta yacharqospa,

¹²llapan kallpasapankunaqa illariq tuta purispanku Saulpa ayanta churinkunaqtawan hoqarirqanku Betsán llaqta perqapi warkusqamanta. Jabes llaqtaman apakampuspataq chaypi kanaykurqanku.

¹³Tullunkunallatañan p'ampaykapurqanku huk tamarisco mallki chakiman, paykunataq qanchis p'unchaytapacha llakikuymanta ayunarqanku.