Read Diospa Simin Qelqa 1 SAMUEL 9 Bible Online

1 SAMUEL 9 - Diospa Simin Qelqa bible

1 SAMUEL 9

¹Benjamín ayllupin huk respetasqa qhapaq runa karqan Cis sutiyoq, taytantaq Abiel karqan, ñawpa taytankunataq Zeror, Becorat, Afiapiwan.

²Cispa churintaqmi karqan Saúl sutiyoq hatunkaray sumaq k'acha wayna, pay hinaqa manan pillapas Israel runakuna ukhupi karqanchu, llapan runatapunin hatun-kayninpi altonmanta qhawaykuq.

³Cispa china asnonkunan chinkarqorqan, hinan payqa churin Saulta nirqan: — Wawáy, phaway huk kamachita pusarikuspa asnonchiskunata maskhaq, nispa.

⁴Saultaq puririrqan Efrainpa orqon-orqonta, chaymantataq Salisa hap'iyninta rirqanku. Manapuni chaypipas kaqtintaq, Saalim hap'iyman rirqanku. Chaypipas manapuni tarispan Benjamín hallp'aman haykurqanku, chaypipas manallapunitaq tarirqankuchu.

⁵Hinaspan Zuf hap'iyman chayaspanku, Saulqa kamachinta nirqan: — Haku kutipusun, ñoqanchismantañataqmi asnomantaqa aswantaraq taytayqa llakikunman, nispa.

⁶Kamachitaq nirqan: — Ama ripusunraqchu, aswan haku Diospa profetanman. Payqa haqay llaqtapin tiyan, tukuy runaq reqsisqanmi kanpas. Payqa asnonchis maypichus kashasqantapas willawasunmanmi. Paypaqa tukuy ima nisqanpas hunt'akullanpunin, nispa.

⁷Saultaq kamachita nirqan: — Hakuyá, ichaqa, ¿imallatataq aparikusun Diospa profetanman qoykunanchispaqri? Manan wayaqaypi t'antanchispas kapunñachu, nispa.

⁸Hinan kamachiqa Saulta nirqan: — Kashanraqmi makiypi qolqe, chaytayá Diospa profetanman qoykusunchis purisqanchista sut'inchaykuwananchispaq, nispa.

⁹(Haqay p'unchaykunapin Dios tapukuq runakuna rimaqku, haku “Yuyayninpi rikuq” runaman nispanku, chay p'unchaykunapitaqmi profetakunata sutichallarqankutaq. “Yuyayninpi rikuq”, nispa).

¹⁰Hinan Saulqa nirqan: — Allinmi chhaynaqa, hakuyá, nispa. Pasarqankutaq profetaq tiyasqan llaqtaman.

¹¹Chayman seqashaspankutaq unu aysakuq sipaskunawan tupaspa tapukurqanku: — ¿Chaypichu “Yuyayninpi rikuq” kashan? nispa.

¹²Sipaskunataq paykunata nirqanku: — Arí, haqayneqpin kashan, riychis tariparqoychis, kunallanraqmi chayarqamun. Llaqta runakunan orqo patapi Dios yupaychana cheqaspi sacrificiota haywanqaku, chaymanmi hamusqa.

¹³Kunallan rispan taripankichis, sacrificio haywanaman manaraq wicharqoshaqtin. Chaypi kashaq runakunaqa paypa sacrificiota saminchanantaraqmi suyanqaku, chaymantaraqmi invitasqa runakunapas mikhunqaku, nispa.

¹⁴Paykunataq llaqtaman haykuspa Samuelta rikurqanku orqo pataman rispa paykuna ladoman hamushaqta.

¹⁵Saúl manaraq chayashaqtinmi, Samuelta Señor Diosqa nirqanña:

¹⁶— Paqarin kay horastan Benjamín ayllumanta huk runata kachamusqayki, paytan aceitewan hawiykunki Israel runakunaq reynin kananpaq. Payqa Filistea runakunamantan llaqtayta kacharichinqa, paykunaq mañakamuwasqantan uyarini, ñak'arisqankutataqmi rikuni, chaymi khuyapayani, nispa.

¹⁷Saulta Samuel rikurqoqtintaq Señor Diosqa nirqan: — Kaymi chay nisharqayki chay runaqa, paymi llaqtayta kamachinqa, nispa.

¹⁸Llaqta haykuna punkupi Samuel kashaqtintaq, Saulqa tapuykukurqan: — Wiraqocháy, ama hinachu kay, willaykuway maypin “Yuyayninpi rikuqpa” wasin, nispa.

¹⁹Samueltaq nirqan: — Ñoqan kani, hakuyá orqo patapi yupaychana cheqasman, chaypi mikhumusunchis. Tutamantaña ima munasqaykita tapukuwanki, willasqaykitaq, hinaspa ripunki.

²⁰Ama llakikuychu kinsa p'unchayña chinkaq china asnomantaqa, ñan tarinkuña. Hinaspapas, ¿pitataq Israel runakunaqa sinchita munakunku? ¿Manachu qanta aylluykitawan? nispa.

²¹Saultaq nirqan: — ¿Imanaqtintaq chay hinatari niwanki? Ñoqaqa kani Benjamín ayllumantan, kay aylluqa Israel suyupi llapa ayllukunamanta sinchi huch'uyllan, wawqeykunapas pisipaq qhawasqallan kanku, nispa.

²²Hinan Samuelqa Saulta kamachintawan mikhunanku wasiman pusaykuspa tiyaykachirqan llapan kinsa chunkantinpa aswan allinnin tiyanapi.

²³Samueltaq wayk'uqta nirqan: — Chay waqaychasqaykita kayman apamuy, nispa.

²⁴Chaymi wayk'uqqa chakan aychata apamuspa, Saulpa mikhunanpaq churaykurqan. Samueltaq nirqan: — Kaytan waqaychapurqayki, ñoqan qanpaq waqaychachirqani kay invitasqa runakunawan kunanpuni mikhuykunaykipaq, nispa. Chay p'unchaymi Saulqa Samuelwan mikhurqan.

²⁵Orqo patapi yupaychana cheqasmanta llaqtaman uraykamuqtinkutaq, wasi patapi Saulwan rimarqan.

²⁶Tutallamantan hatarirqanku, Samueltaq wasi patapi kashaq Saulta waqyarqan: — Q'epichakullayña kacharparipunaypaq, nispa. Q'epichakuspataq Samuelwan kuskapacha lloqsirqanku.

²⁷Llaqta hawakama rispankutaq Samuelqa Saulta nirqan: — Kamachiykita niy ñawpashananpaq, nispa. Kamachi ñawpariqtin hinataq, Samuelqa nirqan: — Qanqa qhepariyraq, Diospa niwasqantaraq sut'inchasqayki, nispa.