Read Diuxi-tilantongo San Mateo 2 Bible Online

San Mateo 2 - Diuxi-tilantongo bible

San Mateo 2

¹N‑kaku Jesús ñuu nani Belén, distrito Judea, daa n‑taxnuni se kuu Herodes. Nu n‑kaku‑ia, n‑ka kixi se ka xinitnuni xa ndeꞌa‑s chudini Jerusalén. Xika n‑ka kixi‑s. N‑ka kee‑s do nuu kane ngandii.

²N‑ka xijan tnuꞌu‑s nuu ñayiu Jerusalén: —¿Ndexu n‑kaku seluchi taxnuni nuu ñayiu Israel? N‑ka xini‑da ɨɨn chudini n‑kee do nuu kane ngandii, te ndeka ñaꞌa‑tɨ vaxi. Xaxeꞌe xijan n‑ka kixee‑da xa ndadakaꞌnu koio‑da‑s —ka kuu‑s, ka xiaꞌan‑s.

³Nu n‑teku se kunxaꞌnu nani Herodes xiꞌin ñayiu Jerusalén xa n‑ka jaꞌan se ijan, te n‑ka chi ini‑s.

⁴Xijan kuu xa n‑nadataka Herodes ntdaa dutu ka taxnuni xiꞌin se ka tuꞌa vaꞌa ley n‑chidotnuni Moisés, te n‑xijan tnuꞌu‑s nuu ndexu kaku Cristu.

⁵Te ka xiaꞌan‑s: —Kaku‑ia Belén, distrito Judea chi duꞌa n‑jaꞌan Ianyuux, te duꞌa n‑chidotnuni se n‑jaꞌan nuu ñayiu xa n‑jaꞌan Ianyuux:

⁶Ndoꞌo xa ka kuu‑n ñayiu io ñuu Belén distrito Judea,nduu‑n ñayiu ndandɨꞌɨ ka dada dava ka ñayiu ñuu io distrito Judea,chi ñuu mee‑n kee ɨɨn se taxnuni.Kuenda kɨu se ñunuu tkachi‑s ku kuu‑ia chi junuu‑ia ñayiu Israel.

⁷Ijan dada naꞌi ni n‑kana Herodes se ka xinitnuni xa xndeꞌa‑s chudini, te n‑xijan tnuꞌu‑s nuu na kɨu na hora n‑ka xo ndeꞌa‑s chudini jan.

⁸Te n‑taꞌu tniu‑s xa na jɨꞌɨn koio‑s Belén. Xiaꞌan‑s: —Juaꞌan koio‑n, te juen tnuꞌu vaꞌa koio‑n nuu jundu kuu seluchi jan, te nde io‑s. Na naniꞌi‑n‑sɨ, te nuniꞌno ni kachitnuꞌu ñaꞌa‑n chi juini‑da xa jɨn ndadakaꞌnu‑da‑s tuku.

⁹Nu n‑yaꞌa xa n‑ka xo nini‑s xa n‑jaꞌan se kunxaꞌnu jan, n‑ka kee‑s; ka xeꞌen‑s. N‑ndodo nuu chudini n‑ka xini‑s do nuu kane ngandii juaꞌan nuu‑s. Xaxeꞌe xa n‑ka xo ndeꞌa‑s chudini ndeka ñaꞌa ichi juaꞌan‑s, yo vichi n‑ka kudɨ ini‑s. Nde nuu kaa niu n‑nujuiin‑tɨ.

¹¹N‑ka kɨu‑s veꞌe nuu n‑nujuiin‑tɨ, te n‑ka xini‑s niu jan xiꞌin María, ñá kuu dɨꞌɨ‑ia. N‑ka xe juiin xiti‑s nuu‑ia, te n‑ka ndadakaꞌnu‑s‑ia, te n‑ka najaan‑s xatnu kuechi ñuꞌu xa yo yaꞌu xa juñaꞌa nga‑s‑ia. N‑ka xiaꞌan nga‑s oro xiꞌin duxa estoraqui xiꞌin ɨnka nuu duxa yo yaꞌu.

¹²Ijan dada n‑ka kachi xene se ka xinitnuni xa xndeꞌa‑s chudini xa n‑xian tnuꞌu ñaꞌa Ianyuux xa maxku nangondita‑s xa nuꞌu koio‑s nuu Herodes. Te n‑ka xino‑s. Ɨnka ichi juan nuꞌu koio‑s xa juan nuꞌu‑s ñuu‑s.

¹³Nu juan nuꞌu koio se ijan, te n‑kachi xene José xa ɨɨn ángel, ia xinokuechi nuu Ianyuux jaꞌan nuu‑s. N‑jaꞌan‑ia: —Ndokoo. Kandeka niu xiꞌin dɨꞌɨ‑ia juaꞌan Egipto. Ijan kutuu koio‑n nde na kachi tnuꞌu ñaꞌa‑r nde kɨu na ndixi‑n yaꞌa chi nduku Herodes niu xa kaꞌni ñaꞌa‑s.

¹⁴N‑ndokoo‑s. Ndeka‑s niu xiꞌin dɨꞌɨ‑ia juaꞌan Egipto xa n‑ka xino‑s xakuaa ijan.

¹⁵N‑ka xo tuu‑s ijan nde n‑xiꞌí Herodes xa na jɨn tnaꞌa xa n‑jaꞌan Ianyuux nuu se n‑jaꞌan nuu ñayiu xa n‑jaꞌan Ianyuux. Duꞌa n‑chidotnuni‑s: “N‑jaꞌan‑r nuu Daꞌya Yɨɨ‑r xa ndee‑ia Egipto.”

¹⁶N‑tu ini Herodes xa n‑ka dandaꞌu ñaꞌa se ka xinitnuni jan, te yo n‑kiti ini‑s te n‑tundaꞌa‑s soldado‑s juaꞌan Belén xiꞌin ntaka ñuu xndatuu nɨkaduku Belén xa kaꞌni koio‑s seyɨjɨn xiꞌin nde sekuechi io uu kuia. N‑kida‑s cuenta naxa daa yoo n‑yaꞌa xa n‑kixeꞌe xa ndii chudini ndeka se ka xinitnuni jan vaxi, según n‑ka jaꞌan mee se ijan.

¹⁷Duꞌa n‑xetnaꞌa xa n‑chidotnuni Jeremías, se n‑jaꞌan tnuꞌu Ianyuux nuu ñayiu:

¹⁸Teku ñayiu xa yo ndeꞌe ndaꞌi koio ñadɨꞌɨ ñuu Rama.Daꞌya dana Raquel ku kuu koio‑ña.Yo ndeꞌe ndaꞌi koio‑ña xaxeꞌe daꞌya‑ña.Yo ndeꞌe ku tnau ini‑ña xaxeꞌe‑s.Ma ndiko anu‑ña xaxeꞌe xa n‑ka xiꞌí daꞌya‑ña. N‑ka nangondita Jesús xiꞌin tadɨꞌɨ‑ia Nazaret

¹⁹N‑xiꞌí Herodes, te dani tuu José Egipto. Ijan n‑kachi xene‑s xa n‑jaꞌan ɨɨn ángel, ia xinokuechi nuu Ianyuux nuu‑s. Xiaꞌan‑ia:

²⁰—Ndokoo. Kandeka ia luchi xiꞌin dɨꞌɨ‑ia juan nuꞌu Israel chi n‑ka xiꞌí se n‑ka xo nduku ñaꞌa xa kaꞌni ñaꞌa‑s —kuu‑ia, xiaꞌan‑ia.

²¹N‑ndokoo José. Ndeka‑s ia luchi jan xiꞌin dɨꞌɨ‑ia juan nuꞌu Israel.

²²Nu n‑teku José xa Arquelao n‑nujuiin naa nuu taa‑s Herodes xa taxnuni‑s nuu ñayiu distrito Judea, te n‑yuꞌu‑s xa nuꞌu‑s ijan. N‑kachi xene‑s xa n‑jaꞌan Ianyuux nuu‑s xa io kuu distrito Judea. Xijan kuu xa n‑ka xino‑s. Juan nuꞌu‑s distrito Galilea.

²³Te n‑nukotuu‑s Nazaret. Duꞌa n‑xetnaꞌa xa n‑chidotnuni se n‑jaꞌan nuu ñayiu xa n‑jaꞌan Ianyuux xa ku kuu‑ia se Nazaret.