Read Diuxi-tilantongo San Mateo 4 Bible Online

San Mateo 4 - Diuxi-tilantongo bible

San Mateo 4

¹Ijan dada ndeka Espíritu Ianyuux Jesús juaꞌan nuu ñayo io te ñatu nga juun dau. Ijan n‑kuu Kuiꞌna xa dajaꞌan ñaꞌa‑i xa kada‑ia kuechi.

²Ña tuu nax n‑xaxi‑ia uu diko nduu, uu diko niu. Ijan dada n‑kojon‑ia.

³Te n‑xee Kuiꞌna xa dajaꞌan ñaꞌa ntuku‑i xa kada‑ia kuechi. N‑jaꞌan‑i nuu‑ia: —Nuxa ndaa xa Daꞌya Yɨɨ Ianyuux kuu‑n, juñaꞌa yuú yaꞌa na nduu‑i tila.

⁴N‑jaꞌan Jesús nuu‑i: —Yodotnuni tnuꞌu Ianyuux xa: “Io xa kaxi koio ñayiu na kuaꞌa kundito koio‑i, ko ñadu diko ni xijan io xa kada‑i, chi dɨuni io xa kunini‑i ntdandituꞌu tnuꞌu Ianyuux.”

⁵Ijan dada ndeka Kuiꞌna Jesús juaꞌan Jerusalén xa jandodo ñaꞌa‑i nuu dujun ka dɨkɨ veñuꞌu ñuu ii jan.

⁶Xiaꞌan‑i nuu‑ia: —Nux ndaa xa Daꞌya Yɨɨ Ianyuux kuu‑n jungava nde nuu ñuꞌu jan, chi yodotnuni tnuꞌu Ianyuux: “Taꞌu tniu Ianyuux nuu ángel, ia ka xinokuechi nuu‑ia, xa junuu ñaꞌa‑ia.” Dɨuni yodotnuni tnuꞌu‑ia xa: “Junuu ñaꞌa koio‑ia xa na ñaꞌa tnukueꞌe xeꞌe‑n nuu yuu” —kuu Kuiꞌna, xiaꞌan‑i.

⁷Te xiaꞌan Jesús: —Dɨuni yodotnuni xa: “Maxku kototnuni‑n Ianyuux, Ia kuu Xtoꞌo‑ro.”

⁸Dɨuni ndeka Kuiꞌna Jesús juaꞌan ɨɨn dɨkɨ yuku yo dujun. N‑dandeꞌa‑i Jesús ntdaa ñuu ñuñayiu nuu taxnuni ntdaa se ka taxnuni ntdaa ñuu ijan. N‑dandeꞌa ñaꞌa‑i kueꞌe ñuu vili xndaxio ijan. Yo yaꞌu xa io ijan. Xiaꞌan‑i nuu‑ia:

⁹—Ntdaa xaꞌa taxi‑r nux njuiin xiti‑n nuu‑r te nakuetu‑n nuu‑r.

¹⁰Xiaꞌan Jesús: —Juaꞌan Satanás chi duꞌa yodotnuni tnuꞌu Ianyuux: “Nuu Ianyuux, Ia kuu Xtoꞌo‑ro, njuiin xiti koio. Nakuetu koio te kajan taꞌu koio nuu‑ia. Nuu mee ni‑ia junukuechi koio.”

¹¹Ijan dada n‑dandoo ñaꞌa‑i, te n‑ka xee ángel, ia ka xinokuechi nuu Ianyuux nuu Jesús xa junukuechi‑ia nuu‑ia. N‑kixeꞌe Jesús xa dakuaꞌa‑ia ñayiu

¹²N‑teku Jesús xa yɨndiꞌu Sua vekaa. Xaxeꞌe xijan juan nuꞌu‑ia Nazaret, distrito Galilea,

¹³ko ña n‑ndoo‑ia Nazaret xa kutuu‑ia ijan. N‑nangondita‑ia Capernaum. Capernaum katuu yatni yuꞌu mar yatni nuu xndatuu ñuu nani Zabulón xiꞌin ñuu nani Neftalí.

¹⁴N‑naxee‑ia ijan xa na jɨn tnaꞌa tnuꞌu n‑chidotnuni ɨɨn se n‑jaꞌan nuu ñayiu xa n‑jaꞌan Ianyuux. Isaías n‑xo nani‑s. Duꞌa n‑chidotnuni‑s:

¹⁵Kakuneꞌe‑da ñayiu io Zabulón xiꞌin ñayiu io Neftalí.Galilea kuu distrito‑i.Ijan xndaxio ñayiu ñatu kuu daꞌya dana Israel.Ichi xiti distrito nuu io‑i juaꞌan Mar Galilea.Galilea katuu yuꞌu Deꞌva Jordán nuu xika ndute.

¹⁶Jini ñayiu Ia juña tnuꞌu ñaꞌa jundu kuu Ianyuux.Kuenda kɨu nuu nee nuu kuú‑i ka xikonuu‑i,xa ñatu ka kutnuni ini‑i jundu kuu‑ia, kuu tnuꞌu n‑chidotnuni Isaías.

¹⁷Tiempu ijan n‑kixeꞌe Jesús xa dakuaꞌa‑ia ñayiu. N‑jaꞌan‑ia nuu‑i: —Natu ini koio xa n‑ka kida‑n kuechi, chi vax kuyatni kɨu taxnuni Ianyuux nuu ñayiu ñuñayiu. N‑jaꞌan Jesús nuu koon seyɨɨ xa na nkuitandijun ñaꞌa‑s

¹⁸Nɨni xika‑ia yuꞌu Mar Galilea, te n‑xini‑ia se ndeka tnaꞌa xiꞌin ñani‑s. Ɨɨn‑s nani Simón. Dɨuni nani‑s Spedru. Ndrixi nani ɨnka‑s. Ka dakeé‑s ñunu‑s nuu ndute hora ijan, chi se ka tava chaka ka kuu‑s.

¹⁹Te n‑jaꞌan Jesús nuu‑s: —Nkuitandijun ñaꞌa koio, te kada‑r xa dataka‑n ñayiu ná dataka‑n chaka xiꞌin ñunu‑n.

²⁰Hora ijan ni n‑ka dandoo‑s ñunu‑s, te n‑ka xe kuitandijun‑s Jesús.

²¹N‑xini ntuku‑ia ɨnka se ndeka tnaꞌa xiꞌin ñani‑s, te n‑kana‑ia‑s. Ɨɨn‑s nani Jacobo. Ɨnka‑s nani Sua. Ka kuu‑s daꞌya yɨɨ Zebedeo. Xñutuu‑s xiꞌin taa‑s xiti barcu xa ka ndadavaꞌa‑s ñunu‑s.

²²Hora ijan ni n‑ka dandoo‑s taa‑s xiꞌin barcu‑s, te n‑ka xe kuitandijun‑s‑ia. N‑ndadavaꞌa Jesús ñayiu ka kuꞌu

²³Ijan dada n‑xikonuu Jesús nituꞌu distrito Galilea. N‑dakuaꞌa‑ia ñayiu Israel xiti veñuꞌu kuechi ñuu xiꞌin ñuu. N‑jaꞌan‑ia tnuꞌu Ianyuux nuu ñayiu. N‑kakuneꞌe‑ia xa taxnuni Ianyuux nuu ñayiu ñuñayiu. Tnuꞌu vaꞌa kuu. Dɨuni n‑ndadavaꞌa‑ia ñayiu ka tnaꞌa ntdaa nuu kueꞌe. N‑ndadavaꞌa‑ia nuu ka xaxiaꞌan du.

²⁴Nituꞌu nación Siria n‑ka teku ñayiu xa n‑kida‑ia. N‑ka xe ndeka ñayiu ijan ñayiu ka tnaꞌa tɨtnɨ nuu kueꞌe xiꞌin ñayiu ndaꞌu ka yaꞌa xaxeꞌe kueꞌe ka tnaꞌa‑i. Xndeka‑i ñayiu xñuꞌu ñaꞌa xaloko n‑ka xeꞌen. N‑ka xe ndeka‑i ñayiu tnaꞌa kueꞌe xiyɨꞌɨ du. N‑ka xe ndeka‑i ñayiu n‑xiꞌí xeꞌe, te n‑ndadavaꞌa ñaꞌa Jesús.

²⁵N‑ka xe kuitandijun ñaꞌa ñayiu tɨtnɨ ñuu. Ka kuu‑i ñayiu Galilea, ñayiu Decápolis, ñayiu Judea, ñayiu io yatni yuꞌu Deꞌva Jordán xiꞌin ñayiu Jerusalén du.