Read Diuxi-tilantongo San Marcos 11 Bible Online

San Marcos 11 - Diuxi-tilantongo bible

San Marcos 11

¹Te n‑kuyatni Jesús, xiꞌin se dakuaꞌa‑ia, ñuu Jerusalén. N‑xee‑ia xiꞌin‑s ñuu nani Betfagé xiꞌin ñuu nani Betania. Ñuu jan katuu ndiꞌi xeꞌe Yuku Yutnu Olivo. Ijan n‑tundaꞌa Jesús uu se dakuaꞌa‑ia juaꞌan‑s.

²N‑jaꞌan‑ia: —Juaꞌan koio ñuu katuu ichi jɨꞌɨn‑ro. Hora na kɨu‑n ñuu ijan, te jini‑n ɨɨn burru luchi ndijun ijan. Ni ɨɨn ñayiu ta kodo ka‑tɨ. Ndaxi‑n‑tɨ, te kandeka‑n‑tɨ kixi.

³Nux xijan tnuꞌu ñayiu jan nakuenda ndaxi‑n‑tɨ, te jaꞌan‑n xa Xtoꞌo‑n ndoñuꞌu‑tɨ te ma kukuee‑ia xa natundaꞌa‑ia‑tɨ.

⁴Juaꞌan‑s, te n‑naniꞌi‑s ɨɨn burru luchi ndijun yatni yeꞌe ijan. Nujuiin‑tɨ ichi yata veꞌe. N‑ka nandaxi‑s‑tɨ.

⁵Dava ñayiu xnii ijan, n‑ka xijan tnuꞌu‑i: —¿Nakuenda ka ndaxi‑n burru de? ¿Nax ka kida‑n?

⁶N‑ka jaꞌan‑s nax n‑taꞌu tniu Jesús, te n‑ka xejoon‑i xa kandeka‑s‑tɨ jɨꞌɨn.

⁷Xndeka‑s‑tɨ juaꞌan nuu Jesús. N‑ka xajan‑s doo‑s yata‑tɨ, te n‑yodo‑ia‑tɨ.

⁸Te kueꞌe ñayiu, n‑ka xajan‑i doo‑i ichi nuu n‑xika‑ia. Dava‑i n‑xaꞌnde ndaꞌa yutnu kuii, te n‑ka xajan‑i‑tnu nuu ichi. Duꞌa n‑ka xio‑i xañuꞌu nuu Jesús.

⁹Xee n‑ka kana ñayiu xndodo nuu nuu Jesús. Te dɨuni xee n‑kana ñayiu xndijun Jesús. N‑ka jaꞌan‑i: —¡Hosanna! ¡Na kada Ianyuux xa kutuu vaꞌa se vaxi yaꞌa! ¡Xiꞌin xa taxnuni Ianyuux vaxi‑s!

¹⁰¡Na kada Ianyuux xa taxnuni se vaxi yaꞌa, ná n‑taxnuni taxaꞌnu tnetnu‑ro David! ¡Hosanna! ¡Na kutaꞌu‑ro Ianyuux!

¹¹N‑kɨu Jesús Jerusalén, te n‑kɨu‑ia veñuꞌu. N‑xini‑ia ntdaa xa io ijan, te xá vax kunee. Xijan kuu xa n‑kee‑ia, juaꞌan‑ia xiꞌin n‑uxi uu se dakuaꞌa‑ia ñuu nani Betania. N‑jaꞌan uꞌu Jesús nuu yutnu higo (Mt. 21:18‑19)

¹²Kɨu kuu uu n‑ndee‑ia xiꞌin se dakuaꞌa‑ia Betania, te n‑kojon‑ia.

¹³N‑xini xika‑ia ɨɨn yutnu higo. Io ndaꞌa kuii‑tnu. N‑kuyatni‑ia‑tnu, xa niꞌi‑ia xavidi‑tnu xa kaxi‑ia. Na n‑xee‑ia xeꞌe yutnu, ña n‑niꞌi‑ia ni ɨɨn xavidi‑tnu. Meni ndaꞌa‑tnu io. Chi ta juun ka ndeꞌa‑tnu.

¹⁴N‑jaꞌan‑ia nuu yutnu jan: —Maxku juun ka ni ɨnka xavidi. Maxku kaxi ka ni ɨɨn ñayiu xavidi‑n nɨkava nɨkuita. Te n‑ka teku se dakuaꞌa‑ia nax n‑jaꞌan‑ia. N‑kineꞌe Jesús se ka xeen xiꞌin se ka diko (Mt. 21:12‑17; Lc. 19:45‑48; Jn. 2:13‑22)

¹⁵Na n‑naxee‑ia xiꞌin se dakuaꞌa‑ia Jerusalén, n‑kɨu‑ia veñuꞌu kaꞌnu, te n‑kixeꞌe‑ia xa kineꞌe‑ia se ka xeen xiꞌin se ka diko ijan. N‑dajane‑ia mexa se ka dama tvini, xiꞌin silla se ka diko data.

¹⁶Ña n‑xejoon‑ia xa ni ɨnka ñayiu maxku kaneꞌe ndatniu‑i yaꞌa veñuꞌu kaꞌnu.

¹⁷N‑kixeꞌe‑ia xa dakuaꞌa‑ia ñayiu ijan. N‑xiaꞌan‑ia: —¿Ñadu yodotnuni xa veꞌe Ianyuux kuu veꞌe nuu kuaꞌa ntdaa ñayiu xa kajan taꞌu‑i nuu‑ia u? Ko mee‑n ka kida xa veꞌe Ianyuux kuu ná kuu yau ñaduꞌu.

¹⁸N‑ka tekutnuꞌu dutu ka taxnuni, xiꞌin se ka tuꞌa vaꞌa tnuꞌu n‑chidotnuni Moisés, nax n‑jaꞌan Jesús, te n‑ka nduku‑s mudu xa kaꞌni‑s‑ia. Chi n‑ka yuꞌu‑s nuu‑ia, xaxeꞌe xa n‑dakuaꞌa‑ia kueꞌe xa kueꞌe ñayiu, te n‑ka tna ini‑i tnuꞌu‑ia.

¹⁹Na n‑kunee, te n‑kee Jesús, xiꞌin se dakuaꞌa‑ia, ñuu Jerusalén. Xá n‑yichi yutnu higo (Mt. 21:20‑22)

²⁰Neꞌe datne, n‑ka nayaꞌa ntuku‑s nuu nukoo yutnu higo jan, te n‑ka xini‑s xa nde yoꞌo‑tnu n‑yichi.

²¹N‑najaꞌan Spedru tnuꞌu Jesús, te n‑xiaꞌan‑s‑ia: —¡Maestru, jira! N‑kida uꞌu‑n yutnu higo ya, te n‑yichi‑tnu.

²²N‑jaꞌan Jesús: —Io xa jandixa koio‑n Ianyuux.

²³Xandaa kuu xa jaꞌan‑r. Nux jaꞌan ɨɨn ñayiu nuu yuku yaꞌa, xa na dita Ianyuux yuku ya te na dakeé‑ia nuu ndute kaꞌnu, te duꞌa koo. Io xa maxku jaꞌan‑i xiꞌin anu‑i, nux duꞌa koo a ñaꞌa. Io xa jandixa‑i xa koo ná n‑jaꞌan‑i, te duꞌa koo.

²⁴Xijan kuu xa, jaꞌan‑r xa ntdaa xa xijan taꞌu‑n, io xa jandixa‑n xa xá n‑tnɨɨ‑n xa xijan‑n, te tnɨɨ‑n.

²⁵Hora xijan taꞌu‑n, io xa taxkanu ini‑n ndeda ɨɨn ñayiu n‑kida xa uꞌu nuu mee‑n. Te dada taxkanu ini ñaꞌa Taa‑r, Ianyuux tuu andɨu, ntdaa kuechi mee‑n.

²⁶Ko nux ma taxkanu ini mee‑n nuu ñayiu, te ma taxkanu ini Taa‑r, Ianyuux tuu andɨu, kuechi mee‑n tuku. ¿Jundu n‑taxnuni xa n‑kida Jesús ntdaa xa n‑kida‑ia? (Mt. 21:23‑27; Lc. 20:1‑8)

²⁷Ɨnka vuelta n‑naxee Jesús xiꞌin se dakuaꞌa‑ia Jerusalén. Xikonuu‑ia xiti veñuꞌu kaꞌnu. Ijan n‑ka xee dutu ka taxnuni, xiꞌin se ka tuꞌa vaꞌa tnuꞌu n‑chidotnuni Moisés, xiꞌin sexaꞌnu ka taxnuni nuu ñayiu Israel.

²⁸N‑ka xijan tnuꞌu‑s‑ia: —¿Jundu n‑taxnuni xa kida‑n ntdaa xa kida‑n? ¿Jundu xiꞌin xa taxnuni kida‑n xaꞌa?

²⁹N‑jaꞌan Jesús: —Dani mee‑r, kajan tnuꞌu ñaꞌa‑r ɨɨn tnuꞌu. Nux na jaꞌan koio‑n, te jaꞌan mee‑r jundu n‑taxnuni xa duꞌa kida‑r.

³⁰—N‑xijan tnuꞌu‑ia‑s— ¿Jundu n‑tundaꞌa Sua Bautista? ¿Ianyuux a ñayiu a? Kachitnuñaꞌa‑n.

³¹Se ijan n‑ka kixeꞌe xa xijan tnuꞌu‑s: —Nux jaꞌan‑ro xa n‑tundaꞌa Ianyuux Sua, te jaꞌan se yaꞌa: “Xijan kuu xa, ¿nax kuu xa ña n‑ka jandixa‑n‑sɨ?”

³²Ko nux jaꞌan‑ro xa n‑tundaꞌa seyɨɨ Sua, te, ¿nax koo? Chi n‑ka yuꞌu‑s nuu kueꞌe xa kueꞌe ñayiu xyuku ijan, chi n‑ka jandixa ntdaa ñayiu xa xandaa kuu xa Sua n‑kuu se xian tnuꞌu tnuꞌu Ianyuux nuu‑i.

³³Xijan kuu xa n‑ka xiaꞌan‑s nuu Jesús: —Ña ka xini‑r. N‑jaꞌan Jesús: —Dani mee‑r, ma jaꞌan‑r jundu n‑taxnuni xa kida‑r xaꞌa.