Read Diuxi-tilantongo San Marcos 15 Bible Online

San Marcos 15 - Diuxi-tilantongo bible

San Marcos 15

¹Neꞌe datne, n‑ka kida ɨɨn nuu dutu ka taxnuni, xiꞌin sexaꞌnu ka taxnuni nuu ñayiu Israel, xiꞌin se ka tuꞌa vaꞌa tnuꞌu n‑chidotnuni Moisés, xiꞌin ntdaa juxtixia ñayiu Israel. Duku Jesús xndeka ñaꞌa‑s juaꞌan nuu gobernador nani Pilato.

²N‑xijan tnuꞌu Pilato Jesús: —¿Ndoꞌo kuu se kunxaꞌnu ka nuu ñayiu Israel a? N‑jaꞌan Jesús: —Mee‑n jaꞌan.

³Te kueꞌe n‑ka tekuechi dutu ka taxnuni mee‑ia.

⁴Ɨnka vuelta n‑xijan tnuꞌu Pilato nuu‑ia: —¿Ma jaꞌan‑n ni ɨɨn tnuꞌu a? Teku‑n xa kueꞌe xa kueꞌe ka tekuechi ñaꞌa‑s.

⁵Ko ña n‑jaꞌan Jesús ni ɨɨn tnuꞌu. Te ña n‑kuaꞌa Pilato xa kutnuni ini‑s xa duꞌa kuu. “¡Katakaa‑s nuu curuxi!” (Mt. 27:15‑31; Lc. 23:13‑25; Jn. 18:38‑19:16)

⁶Te viko Paxcua dayaa gobernador ɨɨn se yɨndiꞌu vekaa. Davaꞌa nga seyɨɨ ka juini ñayiu.

⁷Vekaa yɨndiꞌu ɨɨn se nani Barrabás. N‑ndundeꞌe‑s xiꞌin se xnetnaꞌa xiꞌin‑s nuu gobierno, te n‑xaꞌni‑s ndɨyɨ.

⁸N‑ka xee kueꞌe ñayiu nuu tuu Pilato, te n‑ka xijan‑i xa kada Pilato nani kida‑s.

⁹Te n‑jaꞌan Pilato: —¿Ka juini‑n xa dayaa‑r se kunxaꞌnu ka nuu ñayiu Israel a?

¹⁰Chi naꞌa‑s xa dutu ka taxnuni xndeka Jesús juaꞌan nuu‑s, xaxeꞌe xa ka kukuedi ini‑s nuu‑ia.

¹¹Ko n‑ka kidajuexa dutu ka taxnuni nuu ñayiu, xa kajan koio‑i xa dayaa Pilato Barrabás.

¹²Ɨnka vuelta n‑xijan tnuꞌu Pilato ñayiu: —¿Te nax kada‑r se ka danani‑n se kunxaꞌnu ka ñayiu Israel?

¹³Ɨnka vuelta n‑ka kana‑i: —¡Katakaa‑s nuu curuxi!

¹⁴N‑xijan tnuꞌu Pilato: —¿Na kuechi n‑kida‑s? Ko kueꞌe ka n‑ka kana xee‑i: —¡Katakaa‑s nuu curuxi!

¹⁵N‑xani ini Pilato xa vaꞌa ka xa kada‑s xa ka juini ñayiu. N‑dayaa‑s Barrabás. N‑taꞌu tniu‑s soldado xa chirrión ñɨɨ jani koio‑s Jesús, te n‑xiaꞌan‑s‑ia nuu‑s, xa katakaa ñaꞌa koio‑s.

¹⁶Xndeka soldado Jesús juaꞌan nde nukeꞌe vetniu nani pretorio. Ijan n‑ka kana‑s dava ka soldado xyuku ijan.

¹⁷N‑ka dandukutu‑s Jesús daꞌma tndee. N‑ka kidavaꞌa‑s corona tnuyɨkɨ, te n‑ka dakeé‑s dɨkɨ‑ia.

¹⁸N‑ka kixeꞌe‑s xa kada kee‑s viva‑ia. N‑ka kida bula ñaꞌa‑s: —¡Viva, se kunxaꞌnu ka nuu ñayiu Israel!

¹⁹Vara n‑ka jani‑s dɨkɨ‑ia, te n‑ka tudɨɨ‑s‑ia. N‑ka xe juiin xiti‑s nuu‑ia, ná kuu xa koo koio‑s xañuꞌu nuu‑ia. Ko ña ndaa, chi ka kida bula‑s‑ia.

²⁰Na n‑yaꞌa xa loko n‑ka xakundee‑s‑ia, n‑ka tava‑s daꞌma tndee, te xiꞌin daꞌma mee‑ia n‑ka nadandukutu ñaꞌa‑s. Ijan xndeka‑s‑ia juaꞌan, xa katakaa‑s‑ia nuu curuxi. N‑ka xatakaa‑s Jesús (Mt. 27:32‑44; Lc. 23:26‑43; Jn. 19:17‑27)

²¹N‑ka kidajuexa‑s ɨɨn seyɨɨ, xa kuido‑s curuxi Jesús. Nani‑s Simón, se ñuu nani Cirene kuu‑s. Taa Alejandro xiꞌin Rufo kuu‑s. Juan ndixi‑s ichi yuku.

²²Xndeka‑s‑ia juaꞌan nde nuu nani Gólgota. Gólgota juini kachi Nuu Yɨkɨ Dɨkɨ Ndɨyɨ.

²³N‑ka xiaꞌan‑s vinu daka xiꞌin yuku nani mirra, xa koꞌo‑ia. Ko ña n‑juini‑ia.

²⁴N‑ka xatakaa‑s‑ia. Te n‑ka tava‑sɨ suerte, xa jini‑s nuu ndeda‑s niꞌi daꞌma‑ia.

²⁵Kaa ɨɨ́n datne kuu hora n‑ka xatakaa‑s‑ia.

²⁶Nuu ɨɨn pedazu tabla, n‑ka chidotnuni‑s xa n‑ka tekuechi‑s‑ia: “Se kunxaꞌnu ka nuu ñayiu Israel.” N‑ka tenee‑s letreru jan dɨkɨ curuxi.

²⁷Dɨuni n‑ka xatakaa‑s uu ñaduꞌu. Ɨɨn‑s nuu curuxi diñi kuaꞌa‑ia, te ɨnka‑s nuu curuxi diñi datni‑ia.

²⁸Duꞌa n‑xetnaꞌa tnuꞌu Ianyuux: “Nani n‑ka kida‑s se ka kida kuechi, dani n‑ka kida‑s Jesús.”

²⁹Kuiꞌa n‑ka jaꞌan ñayiu ka yaꞌa ichi ijan. Ka dakuiko dɨkɨ‑i, xa ka xakundee‑i‑ia. Ka xiaꞌan‑i: —¡Aa! ¡Se kanu veñuꞌu, te ndadavaꞌa‑s nuu uni kɨu!

³⁰¡Dakaku mee‑n! ¡Ta nuu nuu curuxi!

³¹Dutu ka taxnuni du. Xiꞌin se ka tuꞌa vaꞌa tnuꞌu n‑chidotnuni Moisés, n‑ka xakundee‑s‑ia. N‑ka jaꞌan ɨɨn‑s nuu ɨnka‑s: —N‑dakaku‑s ɨnka ñayiu, ko ña kuaꞌa‑s xa dakaku‑s mee‑s.

³²Na nuu Cristu curuxi. Se kunxaꞌnu ka nuu ñayiu Israel, na nuu‑s curuxi xa kundeꞌa‑ro, te jandixa‑ro‑s. Dɨuni uu se n‑takaa xiꞌin‑ia, kuiꞌa n‑ka jaꞌan‑s‑ia tuku. N‑xiꞌí Jesús (Mt. 27:45‑56; Lc. 23:44‑49; Jn. 19:28‑30)

³³Kaa x‑uu xiꞌin nde kaa uni kaa xañini, n‑kunee ñuñayiu.

³⁴Te kaa uni kaa xañini, n‑kana xee Jesús: —Eloi, Eloi, ¿lama sabactani? (Juini kachi: Taa‑da Ianyuux, Taa‑da Ianyuux, ¿nakuenda n‑dandoo ñaꞌa‑n?)

³⁵N‑ka teku dava se xnii ijan nax n‑jaꞌan‑ia, te n‑ka jaꞌan‑s: —Kunini koio‑n, kana‑s Elías.

³⁶Te xino ɨɨn‑s, te vinagri n‑dandoyo‑s ɨɨn xa ndatachi. N‑tetnɨɨ‑s dɨkɨ tnuyoo, te n‑xiaꞌan‑s‑ia xa koꞌo‑ia. N‑jaꞌan‑s: —Da na koo naꞌi‑s. Na jini‑ro nux kixi Elías, xa nuneꞌe ñaꞌa‑s nuu curuxi.

³⁷Ko n‑kana xee Jesús, te n‑xiꞌí‑ia.

³⁸Hora ijan ni, n‑ndata dava daꞌma ndiꞌu veñuꞌu Jerusalén. Nde dɨkɨ xiꞌin nde xeꞌe daꞌma, n‑ndata.

³⁹Te yatni curuxi, nujuiin daa ɨɨn centurión. Se taxnuni nuu soldado romano kuu‑s. N‑xo ndeꞌa‑s‑ia, hora n‑kana xee‑ia te n‑xiꞌí‑ia, te n‑jaꞌan‑s: —Xandaa kuu xa se yaꞌa n‑kuu Daꞌya Yɨɨ Ianyuux.

⁴⁰Ijan xndeꞌa xika ñadɨꞌɨ tuku. Nuu ñadɨꞌɨ jan tnaꞌa María, ñadɨꞌɨ ñuu nani Magdala, xiꞌin ɨnka María kuu dɨꞌɨ Jacobo se luchi ka xiꞌin José. Ñá nani Salomé du.

⁴¹Na n‑xo tuu Jesús Galilea, n‑ka kunduu ñadɨꞌɨ jan xiꞌin‑ia, te n‑ka chindee‑ña‑ia. Kueꞌe ɨnka ñadɨꞌɨ tuku. N‑ka xee‑ña xiꞌin‑ia Jerusalén. N‑ka kuxi‑s yɨkɨ kuñu ndi Jesús (Mt. 27:57‑61; Lc. 23:50‑56; Jn. 19:38‑42)

⁴²Te xañini, na vax kunee, ka kida tuꞌa ñayiu xa xee kɨu ndetatu.

⁴³Te José, se ñuu nani Arimatea, n‑xee‑s nuu tuu Pilato. Juxtixia vaꞌa kuu José. Ndetu‑s xa taxnuni Ianyuux nuu ñayiu. N‑xajan‑s anu‑s, te juaꞌan‑s nuu Pilato, te n‑xijan‑s yɨkɨ kuñu ndi Jesús.

⁴⁴Ña n‑kuaꞌa Pilato xa jandixa‑s xa yachi n‑xiꞌí‑ia. N‑kana‑s centurión, te n‑xijan tnuꞌu‑s nahora n‑xiꞌí Jesús.

⁴⁵Na n‑teku‑s tnuꞌu centurión, te n‑xejoon‑s xa kandeka José yɨkɨ kuñu ndi Jesús juaꞌan.

⁴⁶N‑xeen José daꞌma vaꞌa, te n‑nuneꞌe‑s yɨkɨ kuñu ndi Jesús nuu curuxi. N‑duku niꞌna‑s‑ia daꞌma jan, te n‑dakeé ñaꞌa‑s xiti ɨɨn yau kava. Dada n‑dakuiko tutuu‑s ɨɨn toto kaꞌnu, toto tkute, xa kundiꞌu yuyau.

⁴⁷Te ndeꞌa María Magdalena xiꞌin María, dɨꞌɨ José, ndexu n‑xajan‑s‑ia.