Read Diuxi-tilantongo San Marcos 2 Bible Online

San Marcos 2 - Diuxi-tilantongo bible

San Marcos 2

¹Uni koon ka kɨu, daa n‑xiko Jesús n‑naxee‑ia Capernaum, te n‑ka datekutnuꞌu tnaꞌa ñayiu xa tuu‑ia ɨɨn veꞌe ijan.

²Nunuvii ni n‑ka taka kueꞌe ñayiu veꞌe ijan. N‑chitu‑i yeꞌe. Ña n‑kuaꞌa ka yaꞌa‑i xa kɨu‑i veꞌe. Te n‑jaꞌan‑ia tnuꞌu vaꞌa Ianyuux nuu‑i.

³Ijan n‑ka xee seyɨɨ xndeka se kuꞌu nuu tuu Jesús. Koon tnaꞌa‑s xndido se kuꞌu ndaꞌa kuꞌu xeꞌe.

⁴Ña n‑kuaꞌa kandeka koio‑s se kuꞌu kɨu yeꞌe, chi xaxeꞌe xa chitu ñayiu yeꞌe. Ijan n‑ka dakaa‑s se kuꞌu dɨkɨ veꞌe. N‑ka xanu‑s itaꞌu dɨkɨ veꞌe nuu tuu Jesús. Nuu nune jan n‑ka juneꞌe‑s yuu ñuꞌu se kuꞌu.

⁵Na n‑xini Jesús xa ka jandixa‑s‑ia, n‑jaꞌan‑ia nuu se kuꞌu jan: —Daꞌya, xá n‑taxkanu ini‑r kuechi‑n.

⁶Ijan xtuu se ka tuꞌa vaꞌa tnuꞌu n‑chidotnuni Moisés. N‑ka xani ini‑s:

⁷“¿Nakuenda duꞌa jaꞌan‑s? Kuiꞌa jaꞌan‑s Ianyuux. Idini Ianyuux kuaꞌa xa taxkanu ini‑ia kuechi‑ro.”

⁸Ko naꞌa Jesús nax ka xani ini‑s, te n‑xiaꞌan‑ia: —¿Nakuenda duꞌa ka xani ini‑n?

⁹Ñatu uꞌu xa jaꞌan‑r nuu se kuꞌu ya xa taxkanu ini‑r kuechi‑s. Te ñatu uꞌu xa jaꞌan‑r xa ndokoo‑s te ndoneꞌe‑s yuu‑s te kaka‑s.

¹⁰Ko juini‑r xa jini koio‑n xa taxnuni Se kuu ñani tnaꞌa ñayiu nuu ñayiu ñuñayiu. Xijan kuu xa dandeꞌa ñaꞌa‑r xa kuaꞌa‑r xa taxkanu ini‑r kuechi ñayiu. Te n‑jaꞌan‑ia nuu se kuꞌu:

¹¹—Jaꞌan‑r nuu mee‑n. Ndokoo. Ndoneꞌe yuu‑n. Te juan nuꞌu veꞌe‑n.

¹²Hora ijan ni n‑ndokoo‑s. Nuu ntdaa ñayiu jan n‑ndoneꞌe‑s yuu‑s, te n‑kee‑s veꞌe, te juan nuꞌu‑s veꞌe‑s. Te n‑ka yuꞌu‑i ntdaa‑i, te n‑ka xiaꞌan‑i xa n‑kutaꞌu‑i nuu Ianyuux. N‑ka jaꞌan‑i: —¡Nuncas ña n‑xini‑ro xa n‑kuu vitna! N‑jaꞌan Jesús se nani Leví xa kunduu‑s xiꞌin‑ia (Mt. 9:9‑13; Lc. 5:27‑32)

¹³Ɨnka vuelta n‑xikonuu Jesús yundute kaꞌnu. Ijan n‑ka taka kueꞌe ñayiu nuu tuu‑ia, te n‑dakuaꞌa‑ia‑i.

¹⁴Na n‑yaꞌa‑ia ijan, n‑xini‑ia Leví, daꞌya Alfeo. Nukoo‑s veꞌe nuu keyaꞌu tvini impuestu. N‑jaꞌan Jesús nuu Leví: —Na kunduu‑ro. N‑ndojuiin Leví, te juaꞌan‑s xiꞌin‑ia.

¹⁵Te n‑yaꞌa xa n‑xaxi Jesús dita veꞌe Leví. N‑xaxi‑ia xiꞌin kueꞌe seyɨɨ ka tnɨɨ tvini impuestu, xiꞌin kueꞌe ɨnka se ka kida xa uꞌu. Se dakuaꞌa Jesús xtuu ijan tuku. Chi kueꞌe‑s n‑ka kunduu xiꞌin‑ia.

¹⁶Te n‑ka xini se tuꞌa vaꞌa tnuꞌu n‑chidotnuni Moisés xiꞌin se fariseu, xa n‑xaxi Jesús xiꞌin se kida xa uꞌu xiꞌin se tnɨɨ tvini impuestu. N‑ka jaꞌan‑s nuu se dakuaꞌa‑ia: —¿Nakuenda xaxi‑s te xiꞌi‑s xiꞌin se ka tnɨɨ tvini impuestu xiꞌi‑n se ka kida xa uꞌu?

¹⁷N‑teku Jesús nax n‑ka jaꞌan‑s, te n‑jaꞌan‑ia: —Se io vaꞌa, ñatu ndoñuꞌu‑s doctor. Se ka kuꞌu, ndoñuꞌu‑s doctor. Ñatu vaxi‑r xa jaꞌan‑r se xani ini xa ña tuu na kuechi‑s. Vaxi‑r xa jaꞌan‑r se naꞌa xa io kuechi‑s, xa kutuu koio‑s xiꞌin mee‑r. ¿Nakuenda ña ka xaxi‑s? (Mt. 9:14‑17; Lc. 5:33‑39)

¹⁸Se ka kunduu xiꞌin Sua Bautista, xiꞌin se fariseu, ɨɨn kɨu ña ka xaxi‑s. Ña ka xaxi‑s xaxeꞌe xa xneꞌe ii‑s. Te n‑ka xee ɨnka seyɨɨ nuu tuu Jesús, te n‑ka xijan tnuꞌu‑s: —¿Nax kuu xa ña ka xaxi se ka kunduu xiꞌin Sua, te dani se ka kunduu xiꞌin se fariseu, ko se ka kunduu xiꞌin mee‑n, ka xaxi‑s?

¹⁹Te n‑xiaꞌan Jesús: —Hora io viko tnundaꞌa, se n‑jaꞌan noviu ka xaxi‑s, chi tuu noviu xiꞌin‑s. Ka xaxi‑s xiꞌin noviu, hora tuu noviu.

²⁰Ko vax kuyatni kɨu xa kandeka ñayiu noviu jɨꞌɨn. Kɨu ijan ma kaxi ka se ka kunduu xiꞌin noviu.

²¹ʼNuu daꞌma tuꞌu ni ɨɨn mayo dandee daꞌma xee. Nux duꞌa kada‑i, nandɨyɨ daꞌma xee, te ndata ka daꞌma tuꞌu.

²²Te ni ɨɨn mayo kuaꞌa tnaa‑i ndɨdɨ́ xee ñɨɨ tuꞌu. Nux duꞌa kada‑i, dandava ndɨdɨ́ xee ñɨɨ tuꞌu, te tɨu ndɨdɨ́, te tɨu ñɨɨ. Io xa tnaa‑ro ndɨdɨ́ xee ñɨɨ xee. N‑ka tnundodo‑s yoko trɨu kɨu ndetatu (Mt. 12:1‑8; Lc. 6:1‑5)

²³Ɨɨn kɨu ndetatu ñayiu Israel, n‑yaꞌa Jesús nuu kaa trɨu. Se ka kunduu xiꞌin‑ia, n‑ka kixeꞌe‑s xa tnundodo‑s yoko trɨu xa kaxi‑s.

²⁴Te n‑ka jaꞌan se fariseu: —¡Kundeꞌa xa ka kida se dakuaꞌa‑n! Tnuꞌu taꞌu tniu Moisés jaꞌan xa ma kadatniu‑ro kɨu ndetatu.

²⁵Ko n‑jaꞌan Jesús: —¿Nuncas ña n‑kaꞌu‑n nax n‑kida David, na n‑kundaꞌu‑s te n‑ka kojon‑s xiꞌin se ka kunduu xiꞌin‑s a?

²⁶Kɨu ijan se nani Abitar n‑kuu dutu taxnuni ka nuu ñayiu Israel, te n‑kɨu David veñuꞌu Ianyuux, te n‑xaxi‑s tila ii kandodo xiti veñuꞌu jan. Jaꞌan tnuꞌu n‑chidotnuni Moisés xa maxku duꞌa kada ñayiu. Meni dutu ka xaxi tila ii. Ko n‑xaxi David tila ijan, te n‑xiaꞌan‑s tila xa kax koio se ka kunduu xiꞌin‑s tuku.

²⁷ʼN‑kidavaꞌa Ianyuux kɨu ndetatu xaxeꞌe ñayiu, xa ndetatu‑i. Io xa kuneꞌe ii‑ro kɨu ndetatu, ko dɨuni io xa kutnuni ini‑n xa ndandɨꞌɨ ka ñayiu dada kɨu ndetatu.

²⁸Taxnuni Se kuu ñani tnaꞌa ñayiu nuu ntdaa xa io. Te dɨuni taxnuni‑ia kɨu ndetatu ñayiu.