Read Diuxi-tilantongo San Marcos 7 Bible Online

San Marcos 7 - Diuxi-tilantongo bible

San Marcos 7

¹Nuu tuu Jesús, n‑ka xee se fariseu xiꞌin se tuꞌa vaꞌa tnuꞌu n‑chidotnuni Moisés. N‑ka kee‑s Jerusalén xa jɨꞌɨn‑s nuu tuu Jesús.

²N‑ka xini‑s xa dava se dakuaꞌa Jesús ka xaxi tila hora ñatu io ndoo ndaꞌa‑s. Ña n‑ka nandaꞌa‑s xa kuneꞌe ii‑s. Te xijan n‑ka tekuechi ñaꞌa se fariseu.

³Chi se fariseu xiꞌin ntdaa ñayiu Israel, ña xaxi‑s nux ña nandaꞌa‑s xa kuneꞌe ii‑s. Ka kida‑s ná io ná juaꞌan ntdaa xa n‑xetniu taxaꞌnu tnetnu‑s.

⁴Hora xeꞌen‑s nuyaꞌu, te io xa kuchi ñɨɨ‑s antecas xa kaxi‑s. Te kueꞌe ka io ɨnka xa xetniu‑s. Najini‑s vasu‑s, tndoꞌo‑s, kɨdɨ kaa‑s, yuu‑s, xa neꞌe ii‑s.

⁵N‑ka xijan tnuꞌu se fariseu xiꞌin se tuꞌa vaꞌa tnuꞌu n‑chidotnuni Moisés: —¿Nakuenda ña ka jandixa se dakuaꞌa‑n tnuꞌu n‑taꞌu tniu taxaꞌnu tnetnu‑ro? ¿Nakuenda xa ña io ndoo ndaꞌa‑s te ka xaxi‑s?

⁶N‑jaꞌan Jesús: —Vaꞌa n‑kakuneꞌe ñaꞌa Isaías mee‑n. Na n‑xian tnuꞌu‑s tnuꞌu Ianyuux nuu ñayiu, n‑kakuneꞌe‑s se io ɨɨn xa jaꞌan‑s ko ɨnka xa kida‑s:Jaꞌan ñayiu yaꞌa xa xemani ñaꞌa‑i mee‑r,ko ña ndaa, chi ñatu jandixa ñaꞌa anu‑i.

⁷Ñatu xiniñuꞌu xa ndadakaꞌnu ñaꞌa‑i.Meni xa taꞌu tniu seyɨɨ dakuaꞌa‑i ñayiu.

⁸N‑ka dandoo‑n tnuꞌu taꞌu tniu Ianyuux, te kida‑n xa xetniu seyɨɨ. Ka najini‑n tndoꞌo‑n, vasu‑n, te ntdaa ɨnka xa ɨɨn nuu kuu, ko ñatu ka kida‑n xa juini Ianyuux.

⁹ʼÑatu ka chinuu‑n xa taꞌu tniu Ianyuux, xa kada naꞌi ka‑n xa xetniu mee‑n.

¹⁰Chi n‑jaꞌan Moisés: “Koo xañuꞌu nuu taa‑n, nuu dɨꞌɨ‑n.” N‑jaꞌan‑s: “Ɨɨn ñayiu, nux kuiꞌa jaꞌan‑i taa‑i, dɨꞌɨ‑i, io xa kaꞌni‑n‑yɨ.”

¹¹Ko jaꞌan mee‑n xa ɨɨn seyɨɨ kuaꞌa xa ndundeꞌe‑s nuu taa‑s, dɨꞌɨ‑s, te jaꞌan‑s: “Ma kuaꞌa‑da xa chindee ñaꞌa‑da, chi ntdaa xa nevaꞌa‑da Corbán kuu.” (Corbán juini kachi: “Xaꞌa kuu ɨɨn xa n‑doko‑da nuu Ianyuux.”)

¹²Te ñatu ka xejoon‑n xa kada‑s ni ɨɨn xaxeꞌe taa‑s, dɨꞌɨ‑s.

¹³Te ka taꞌu tniu‑n nuu ñayiu xa kada mee‑i ná kida mee‑n. Xá n‑ka dandoo‑n tnuꞌu taꞌu tniu Ianyuux. Te kueꞌe ɨnka xa ɨɨn nuu xiꞌin xijan ka kida‑n.

¹⁴Ɨnka vuelta n‑jaꞌan Jesús nuu ntdaa ñayiu ijan. N‑xiaꞌan‑ia: —Kunini koio‑n ntdaa‑n, te kutnuni ini koio‑n.

¹⁵Ni ɨɨn xa keé xiti ñayiu ma kada xa ñatu neꞌe ii ñayiu jan. Xa kee anu ñayiu, kida xa ñatu neꞌe ii‑i.

¹⁶Xandaa kuu xa io doꞌo‑n. Io xa kunini‑n.

¹⁷N‑dandoo‑ia ñayiu, te n‑kɨu‑ia veꞌe, te n‑ka xijan tnuꞌu se dakuaꞌa‑ia nax juini kachi tnuꞌu jan.

¹⁸N‑xiaꞌan‑ia: —¿Dani mee‑n tuku, ñatu ka kutnuni ini‑n a? ¿Ta kutnuni ka ini‑n xa ɨɨn xa xaxi ɨɨn ñayiu ma kuaꞌa xa kada xa ma kuneꞌe ii‑i a?

¹⁹Ña kɨu xa xaxi‑i nde anu‑i. Diko ni xiti‑i keé‑i. Te dada ndexio ñaꞌa‑i. Te duꞌa n‑jaꞌan Jesús xa ntdaa xa io, kuu xa io ndoo xa kaxi‑ro.

²⁰Te n‑jaꞌan‑ia: —Xa kee anu ñayiu, kida xa ña io ndoo ka anu‑i.

²¹Nde anu‑i vaxi xa xani ini‑i xa uꞌu. Kidi‑i xiꞌin ñayiu ña n‑tnundaꞌa xiꞌin‑i, o dandoo tnaꞌa‑i, o kaꞌni‑i ndɨyɨ.

²²Duꞌu‑i, o kukajan ini‑i xaxii ɨnka ñayiu, o xa uꞌu kida‑i nuu ɨnka ñayiu. Dandaꞌu‑i ñayiu, o kida‑i davaꞌa nga xa juini mee‑i, o xini uꞌu‑i ɨnka ñayiu. Jantnuꞌu‑i ñayiu, o najuen tnuꞌu‑i mee‑i, o kuxee ini‑i.

²³Ntdaa xa uꞌu kee nde anu ñayiu, te kida xa ña io ndoo ka anu‑i. Ɨɨn ñadɨꞌɨ n‑jandixa Jesús (Mt. 15:21‑28)

²⁴Ijan n‑kee Jesús juaꞌan‑ia distrito Tiro, distrito Sidón. Ijan n‑kɨu‑ia ɨɨn veꞌe. Ña n‑juini‑ia xa tekutnuꞌu ñayiu xa tuu‑ia ijan, ko ña n‑kuaꞌa xa kɨvaꞌa‑ia.

²⁵Chi yachi n‑tekutnuꞌu ɨɨn ñadɨꞌɨ xa tuu‑ia ijan. Ñuꞌu tachi uꞌu anu daꞌya dɨꞌɨ‑ña. N‑xee‑ña nuu tuu Jesús, n‑xe juiin xiti‑ña nuu‑ia.

²⁶Te ñadɨꞌɨ jaꞌan tnuꞌu griegu kuu‑ña. Ñatu kuu‑ña ñadɨꞌɨ ñuu Israel, ñadɨꞌɨ Sirofenicia kuu‑ña. Te n‑xijan‑ña nuu Jesús xa kineꞌe‑ia tachi uꞌu anu daꞌya dɨꞌɨ‑ña.

²⁷N‑xiaꞌan‑ia: —Ditna ka kada‑r xa kax koio ñayiu ñuu Israel. Ñatu xiniñuꞌu, nux tnɨɨ‑r xa ka xaxi ñayiu mee‑r, xa dajane‑r nuu ti‑ina.

²⁸N‑xiaꞌan‑ña: —Joon, dito. Ko ti‑ina nukoo kaꞌa mexa, xax koio‑tɨ pedazu kuechi nungoio, hora ka xaxi dichi kuechi io veꞌe.

²⁹N‑xiaꞌan‑ia: —Xaxeꞌe xa duꞌa n‑jaꞌan‑n, juan nuꞌu veꞌe‑n vitna. Xá n‑kee tachi uꞌu anu daꞌya dɨꞌɨ‑n.

³⁰Te juan nuꞌu‑ña veꞌe‑ña. Na n‑naxee‑ña, n‑naniꞌi‑ña daꞌya‑ña. Kaa‑i nuu xito‑i ndetatu‑i, chi xá n‑kee tachi uꞌu n‑ñuꞌu anu‑i. N‑ndadavaꞌa Jesús ɨɨn se ña jaꞌan te doꞌo‑s

³¹N‑kee Jesús distrito Tiro, te n‑yaꞌa‑ia ñuu nani Sidón. Ijan n‑xikonuu‑ia distrito Decápolis, xa xee‑ia nde ndute kaꞌnu nani Mar Galilea.

³²Ijan xndeka ñayiu ɨɨn se kuꞌu nuu tuu‑ia. Se doꞌo kuu‑s, te dɨuni ñatu jaꞌan vaꞌa‑s. N‑ka xijan‑i‑ia xa kajan ndodo‑ia ndaꞌa‑ia se kuꞌu, xa ndadavaꞌa‑ia‑s.

³³N‑dandoo‑ia ñayiu jan, te ndeka dɨɨn‑ia se kuꞌu juaꞌan. Dɨkɨ ndaꞌa‑ia n‑tnɨɨ‑ia yau doꞌo‑s, te xiꞌin dɨkɨ ndaꞌa‑ia n‑xajan‑ia dɨɨ‑ia yaa‑s.

³⁴Nukondeꞌa‑ia andɨu, n‑xenu ini‑ia, te n‑xiaꞌan‑ia: —¡Efata! (Tnuꞌu juini kachi: ¡Na najaan doꞌo‑s!)

³⁵Hora ijan ni n‑ndvaꞌa‑s. N‑teku‑s te n‑ndvaꞌa yaa‑s, te kaxi n‑najaꞌan‑s.

³⁶Te n‑taꞌu tniu Jesús xa maxku najani koio ñayiu jan nax n‑kuu. N‑taꞌu tniu‑ia xa maxku jaꞌan koio‑i, ko kueꞌe ka n‑ka jaꞌan‑i.

³⁷N‑ka yuꞌu‑i te n‑ka kuvete‑i. N‑ka xiaꞌan nuu tnaꞌa‑i: —Vaꞌa kida‑ia ntdaa. Kida‑ia xa nukonini ñayiu doꞌo, te kida‑ia xa najaꞌan ñayiu ñatu jaꞌan.