Read Diuxi-tilantongo San Lucas 22 Bible Online

San Lucas 22 - Diuxi-tilantongo bible

San Lucas 22

¹Vax kuyatni viko Paxcua. Viko Paxcua ka xaxi ñayiu tila ña kɨu levadura.

²N‑ka nduku ini dutu ka taxnuni xiꞌin se ka tuꞌa vaꞌa tnuꞌu n‑chidotnuni Moisés nuu janda kada koio‑s xa kaꞌni‑s Jesús, ko ña n‑kuu chi n‑ka xo yuꞌu‑s nuu ñayiu n‑ka xo nataka ijan.

³N‑keé Satanás anu Judas, se nani Iscariote, ɨɨn se n‑kuu uxi uu se n‑dakuaꞌa ñaꞌa Jesús.

⁴Te n‑xe ndatnuꞌu‑s xiꞌin dutu ka taxnuni xiꞌin soldado xndee veñuꞌu Jerusalén nuu janda kada‑s xa tnɨɨ koio‑s Jesús.

⁵N‑ka kuvete se ijan. Te n‑ka kendoo‑s xiꞌin Judas xa juñaꞌa‑s tvini.

⁶Te n‑nduku ini Judas xa kada‑s xa tnɨɨ juxtixia Jesús nuu ñayo ñayiu xyuku. N‑xaxdini Jesús xiꞌin uxi uu se dakuaꞌa‑ia

⁷N‑xee kɨu kiꞌna nuu viko ka xaxi ñayiu tila ña kɨu levadura. Kɨu ijan ka xaꞌni ñayiu tkolelu xa kaxi‑i kuñu‑tɨ viko Paxcua.

⁸N‑tundaꞌa Jesús Spedru xiꞌin Sua xa jɨn kada tuꞌa koio‑s xa kaxdini‑ia xiꞌin‑s ɨɨn ñuu io yatni nuu xtuu‑ia xiꞌin‑s. Xiaꞌan‑ia: —Juan kada tuꞌa koio xa kaxdini‑ro viko Paxcua.

⁹Te ka xiaꞌan‑s nuu Jesús: —¿Ndexu juini‑n xa kada tuꞌa koio‑da?

¹⁰Te xiaꞌan ntuku‑ia nuu‑s: —Hora na kɨu koio‑n ñuu ijan, nitnaꞌa‑n xiꞌin ɨɨn se ndido yoo ndute. Nkuitandijun koio‑n‑sɨ te kɨu‑n veꞌe ndɨu‑s.

¹¹Te juñaꞌa koio‑n nuu se kuu xtoꞌo veꞌe jan: “Jaꞌan maestru‑da: ¿Ndexu io cuartu nuu kaxdini‑r xiꞌin se dakuaꞌa‑r viko Paxcua?”

¹²Ijan dada dandeꞌa ñaꞌa‑s ɨɨn cuartu kaꞌnu piso kuu uu nuu io mexa, silla, traxti du. Ijan kada vaꞌa koio‑n xa kaxdini‑ro.

¹³Juaꞌan koio‑s. Nu n‑ka xee‑s ijan, te n‑ka xini‑s ntdaa xa n‑jaꞌan Jesús. Te n‑ka kida tuꞌa‑s xa kaxdini koio‑s xiꞌin‑ia.

¹⁴Nu n‑xee hora, te n‑nukoo Jesús xiꞌin se dakuaꞌa‑ia.

¹⁵Te xiaꞌan‑ia nuu‑s: —Yo vichi n‑kuu anu‑r xa kaxi kaꞌnu‑ro tila viko Paxcua kiꞌna ka; ijan dada ndaꞌu yaꞌa‑r.

¹⁶Xandaa xakuiti ma kaxi ka‑r kuñu tkolelu viko Paxcua ɨnka vuelta. Nde kɨu kaxi kaꞌnu koio‑ro nuu taxnuni Ianyuux, ijan dada kaxi‑r kuñu‑tɨ.

¹⁷N‑tnɨɨ‑ia taxa ñuꞌu ndudi uva, te n‑jaꞌan‑ia xa n‑kutaꞌu‑ia nuu Ianyuux, te xiaꞌan‑ia nuu‑s: —Tnɨɨ koio, te dakexio nuu tnaꞌa.

¹⁸Xandaa xakuiti ma koꞌo ka‑r ndudi uva ɨnka vuelta nde kɨu na kixeꞌe Taa‑ro Ianyuux xa taxnuni‑ia.

¹⁹N‑tnɨɨ‑ia tila, te dɨuni n‑jaꞌan‑ia xa n‑kutaꞌu‑ia nuu Ianyuux. N‑taꞌu dava‑ia tila jan, te xiaꞌan‑ia: —Kuenda kɨu ñɨɨ‑r kuu xaꞌa xa doko‑r xaxeꞌe‑n. Kaxi koio tila ya, te duꞌa ku kada koio‑n xa ku najaꞌan ñaꞌa koio‑n —kuu‑ia.

²⁰Nu n‑yaꞌa xa n‑xaxdini‑ia xiꞌin se dakuaꞌa‑ia, n‑tnɨɨ‑ia taxa ñuꞌu ndudi uva, te n‑xiaꞌan‑ia‑s. Nani n‑xiaꞌan‑ia‑s tila, dani n‑xiaꞌan‑ia‑s taxa ñuꞌu ndudi uva jan. Te xiaꞌan ntuku‑ia: —Ndudi uva ñuꞌu taxa yaꞌa kuu nɨñɨ‑r katu xaxeꞌe xa kada Ianyuux tratu xee xiꞌin ñayiu.

²¹Kunaꞌa koio xa se kada xa tnɨɨ ñaꞌa juxtixia, xtuu‑ro xiꞌin‑s nuu mexa yaꞌa.

²²Yaꞌa ruꞌu, Ia kuu ñayiu, na n‑xantuu Ianyuux, te naka ndaꞌu yaꞌa se kada xa tnɨɨ ñaꞌa juxtixia.

²³N‑ka nukuita se dakuaꞌa‑ia ka xijan tnuꞌu tnaꞌa‑s xa jini‑s nuu ndeda‑s daa kada. Ntdaa se dakuaꞌa Jesús n‑ka juini xa ku kuu‑s se ndandɨꞌɨ ka

²⁴Dɨuni n‑ka kixeꞌe‑s xa ka ndatnuꞌu‑s nuu ndeda ɨɨn‑s ndandɨꞌɨ ka, te ka jantnaꞌa tnuꞌu‑s.

²⁵Te xiaꞌan Jesús nuu‑s: —Se ka taxnuni nuu ñayiu, ndeꞌe taxnuni‑s. Te ka jaꞌan‑s xa kuu‑s se vaꞌa ka kida.

²⁶Maxku duꞌa ku kuu koio ndoꞌo. Se ndandɨꞌɨ ka, io xa ku kuu‑s ná kuu ɨɨn se kuechi. Se taxnuni, io xa ku kuu‑s ná kuu ɨɨn se xinokuechi.

²⁷¿Jundu ndandɨꞌɨ ka? ¿Ndandɨꞌɨ ka se nukoo nuu mexa xa xaxdeꞌñu‑s a ndandɨꞌɨ ka se xinokuechi xa dakexio‑s ndeyu? Ndandɨꞌɨ ka se nukoo nuu mexa, ko ruꞌu tuku kuu‑r. Kuu‑r ná kuu se xinokuechi nuu‑n.

²⁸Ndoꞌo ɨɨn ɨɨn‑n, kunduu‑ro hora ndaꞌu yaꞌa‑r.

²⁹Nani n‑tetutniu ñaꞌa Ianyuux xa taxnuni‑r, dani tetutnuniu ñaꞌa‑r xa taxnuni‑n.

³⁰Xijan kuu xa kaxkoꞌo koio‑n nuu kutuu‑r xa taxnuni‑r, te kunukoo koio‑n silla nuu taxnuni koio‑n, te ndadandaa koio‑n kuechi daꞌya dana uxi uu xixitna‑ro ka kuu daꞌya yɨɨ Israel. N‑jaꞌan Jesús xa jaꞌan Spedru xa ñatu xini‑s‑ia

³¹Te xiaꞌan‑ia nuu Simón Pedru: —Simón, n‑jaꞌan Satanás nuu‑r xa kada ñaꞌa‑i ɨɨn xa kada ñaꞌa‑i. Kuenda kɨu trɨu yɨꞌɨ paja kɨdɨ‑i xa kada ñaꞌa‑i xijan.

³²N‑xijan taꞌu‑r nuu Ianyuux xaxeꞌe mee ni‑n na ñaꞌa nujani‑n xa jandixa‑n Ianyuux. Hora na jandixa ntuku‑n Ianyuux ɨnka vuelta, te chindee‑n se ka kunduu xiꞌin‑ro ya xa na jandixa naꞌi‑s‑ia.

³³Te xiaꞌan Spedru nuu‑ia: —Maestru, xa io tuꞌa‑da xa kunduu‑ro, juini na chindiꞌu ñaꞌa ñayiu, juini na kaꞌni ñaꞌa ñayiu xaxeꞌe‑n.

³⁴Te xiaꞌan‑ia: —Na jaꞌan ndaa‑r xa kiꞌna ka jaꞌan‑n uni vuelta xa ña xini ñaꞌa‑n; ijan dada kana ɨɨn liꞌi datne vitna. N‑xee hora ndaꞌu yaꞌa Jesús

³⁵Ijan dada n‑xijan tnuꞌu‑ia‑s ntdaa‑s: —Kɨu na n‑tundaꞌa ñaꞌa‑r xa jɨn dakuaꞌa‑n ñayiu, n‑jaꞌan‑r xa maxku kaneꞌe koio‑n tvini, maxku kaneꞌe koio‑n bolsa‑n; maxku kaneꞌe koio‑n ɨnka tayu ndixa‑n. ¿Nax n‑ka n‑ndoñuꞌu‑n tiempo ijan? Ka xiaꞌan‑s: —Ña tuu nax n‑ka ndoñuꞌu‑da.

³⁶Te xiaꞌan‑ia: —Te vitna, se io tvini, na kaneꞌe‑s tvini‑s jɨꞌɨn. Se io bolsa, na kaneꞌe‑s bolsa‑s jɨꞌɨn. Se ña tuu na espada io, na nadiko‑s cotona‑s, te na jueen‑s.

³⁷Xandaa xakuiti yaꞌa‑r xa io xa yaꞌa‑r xa na jɨn tnaꞌa tnuꞌu Ianyuux xyodotnuni. Duꞌa yodotnuni: “Kani ini koio ñayiu xa n‑kida se n‑kixee kuechi xiꞌin se loko.” Xa yodotnuni xa yaꞌa‑r jɨn tnaꞌa.

³⁸Te ka xiaꞌan se dakuaꞌa‑ia: —Maestru, na uu espada yaꞌa. Te xiaꞌan‑ia: —Xaꞌa ni. N‑xijan taꞌu Jesús nuu nani Getsemaní

³⁹Ijan dada juaꞌan‑ia Yuku Tnu Olivo nani xko kida‑ia, te n‑ka xe kuitandijun ñaꞌa se dakuaꞌa‑ia.

⁴⁰Nu n‑xee‑ia xiꞌin‑s ijan, te xiaꞌan‑ia: —Kajan taꞌu koio nuu Ianyuux xa na chindee ñaꞌa‑ia xa maxku dajaꞌan ñaꞌa Kuiꞌna xa kada‑n kuechi.

⁴¹N‑kee dɨɨn‑ia itaꞌu. Juaꞌan‑ia naxa nuu xee ɨɨn yuú dajɨꞌɨn‑ro. N‑xe juiin xiti‑ia, te n‑xijan taꞌu‑ia nuu Ianyuux:

⁴²—Taa‑ro Ianyuux, nux vatuka xa dakaku ñaꞌa‑n nuu xa uꞌu yaꞌa, dakaku ñaꞌa‑n, ko maxku kada‑n xa juini mee‑da. Kada‑n xa juini mee‑n.

⁴³Te n‑juun ɨɨn ángel, ia xinokuechi nuu Ianyuux, nuu‑ia. N‑xiaꞌan‑ia xandendaku.

⁴⁴Yo vichi n‑kukoꞌyo ini‑ia. Vichi n‑yɨ ini‑ia xa yaꞌa‑ia, te n‑xijan taꞌu ka‑ia nuu Ianyuux xiꞌin nde yɨkɨ nde tuchi‑ia, te n‑kixi ñaꞌa tnee. Ná xatu nɨñɨ‑ro, daa n‑xatu tnee‑ia nuu ñuꞌu.

⁴⁵Nu n‑yaꞌa xa n‑xijan taꞌu‑ia nuu Ianyuux, te n‑ndojuiin‑ia. N‑xiko‑ia. Juan nuꞌu‑ia nde nuu xtuu ndruni se dakuaꞌa‑ia. N‑xini‑ia xa ka kidi‑s xaxeꞌe xa ndeꞌe n‑ka tnau ini‑s xaxeꞌe‑ia.

⁴⁶Te xiaꞌan‑ia nuu‑s: —¿Nakuenda ka kidi‑n u? Ndokoo koio. Kajan taꞌu koio nuu Ianyuux xa maxku dajaꞌan ñaꞌa Kuiꞌna xa kada koio‑n kuechi. N‑ka tnɨɨ‑s Jesús te xndeka ñaꞌa‑s juaꞌan

⁴⁷Nɨni jaꞌan‑ia xijan, n‑xee Judas, se n‑xo kandeka tnaꞌa xiꞌin se dakuaꞌa‑ia. Kueꞌe se ndeka‑s n‑xee nuu‑ia xiꞌin se dakuaꞌa‑ia. N‑xetuꞌa Judas Jesús te n‑teyuꞌu‑s‑ia.

⁴⁸Te n‑jaꞌan Jesús nuu‑s: —Judas, ¿n‑teyuꞌu ñaꞌa‑n xa datuu ñaꞌa‑n ruꞌu, Ia kuu ñayiu, te kada‑n xa tnɨɨ ñaꞌa koio‑s a?

⁴⁹N‑ka tuu ini se dakuaꞌa‑ia xa yaꞌa, te ka xiaꞌan‑s: —Maestru, ¿jantnaꞌa koio‑da xiꞌin‑s xiꞌin espada u?

⁵⁰Ijan n‑xaꞌnde ɨɨn se dakuaꞌa‑ia doꞌo kuaꞌa se xinokuechi nuu dutu taxnuni ka.

⁵¹Xiaꞌan Jesús nuu se duꞌa n‑kida: —Na yaꞌa naꞌi xa io xa yaꞌa. Te n‑tnɨɨ‑ia doꞌo se xinokuechi jan, te n‑natenee‑ia.

⁵²N‑jaꞌan‑ia nuu dutu ka taxnuni nuu soldado kidatniu nuu‑s xiꞌin nuu sexaꞌnu ka taxnuni nuu ñayiu Israel n‑ka xee ijan: —¿Nakuenda xneꞌe‑n espada xiꞌin karruti n‑ka kixee xa tnɨɨ ñaꞌa koio‑n xa kuenda kɨu ñaduꞌu kuu‑r?

⁵³Ndɨkɨu ndɨñuu n‑xo dakuaꞌa‑r ñayiu veñuꞌu Jerusalén, te ijan n‑ka xo yuku‑n. Ñayo‑n n‑tnɨɨ ñaꞌa hora ijan, ko vitna n‑xee hora kada koio‑n xa kada‑n. N‑xee hora kada koio xaloko xa kada‑i —kuu Jesús, xiaꞌan‑ia. N‑jaꞌan Spedru xa ña xini‑s Jesús

⁵⁴Te n‑ka tnɨɨ‑s‑ia. Xndeka‑s‑ia juaꞌan veꞌe dutu taxnuni ka. Xika xika ni n‑xe kuitandijun Spedru‑ia.

⁵⁵Juaꞌan‑s veꞌe dutu jan. Dava‑s n‑ka tɨu ñuꞌú dava dava nukeꞌe dutu, te n‑ka nukoo‑s yunuꞌu. Dɨuni n‑nukoo Spedru yunuꞌu jan.

⁵⁶N‑kutnuni nuu Spedru, te n‑xini ñaꞌa ɨɨn ñá xinokuechi nuu dutu jan te n‑nukondeꞌa vaꞌa‑ña‑s. Te n‑jaꞌan‑ña nuu ñayiu xtuu ijan: —Dani te yaꞌa, kunduu‑te xiꞌin te ijan.

⁵⁷N‑jaꞌan Spedru xa ñatu n‑kunduu‑s xiꞌin Jesús. Xiaꞌan‑s: —Ña xini‑da‑s.

⁵⁸Nunuvii ni n‑kuu te n‑xini ñaꞌa ɨɨn se tnaꞌa nuu ñayiu xtuu ijan. N‑jaꞌan‑s: —Dani ndoꞌo kunduu‑n xiꞌin‑s ntdaa‑s. Te n‑jaꞌan Spedru: —Ñaꞌa, ñatu kunduu‑da xiꞌin‑s.

⁵⁹N‑yaꞌa naxa ɨɨn hora, te n‑jaꞌan ɨnka‑s nuu ñayiu xyuku ijan: —Xandaa xakuiti kunduu se yaꞌa xiꞌin‑s chi se Galilea kuu‑s.

⁶⁰Te n‑jaꞌan Spedru: —Ña kutnuni ini‑da nuu nax jaꞌan‑n. Ni ta ndɨꞌɨ ka jaꞌan Spedru tnuꞌu ijan, te n‑kana ɨɨn liꞌi.

⁶¹Ijan dada n‑ngonenuu Jesús, te n‑nukondeꞌa‑ia Spedru, te n‑najaꞌan‑s xa n‑jaꞌan‑ia nuu‑s: “Kiꞌna ka jaꞌan‑n uni vuelta xa ña xini ñaꞌa‑n; ijan dada kana ɨɨn liꞌi.”

⁶²N‑kee dɨɨn‑s, te vichi n‑tnau ini‑s, te ndeꞌe n‑ndaꞌi‑s. N‑ka xakundee‑s Jesús

⁶³Se xndee Jesús, n‑ka xakundee‑s‑ia, te n‑ka kani‑s‑ia.

⁶⁴N‑ka duku‑s daꞌma nuu‑ia, te n‑ka jaꞌan‑s: —Jaꞌan jundu janñaꞌa —ka kuu‑s, ka xiaꞌan‑s.

⁶⁵Te yo kuiꞌa n‑ka jaꞌan‑s‑ia. Xndeka‑s Jesús juaꞌan nuu se kunuu ka ndadandaa kuechi

⁶⁶Nu n‑tuu kɨu kuu uu te n‑ka taka sexaꞌnu ka taxnuni nuu ñayiu Israel xiꞌin dutu ka taxnuni xiꞌin se ka tuꞌa vaꞌa tnuꞌu n‑chidotnuni Moisés, te n‑ka xe ndeka‑s Jesús nuu ntdaa se ka kuu juxtixia Israel.

⁶⁷Te n‑jaꞌan‑s nuu‑ia: —Jaꞌan: “¿Mee‑n kuu Cristu a ñaꞌa?” Te n‑jaꞌan‑ia nuu‑s: —Nux na jaꞌan‑r, ma jandixa koio‑n.

⁶⁸Nux na kajan tnuꞌu ñaꞌa‑r ɨɨn xa kajan tnuꞌu ñaꞌa‑r, mayo‑n jaꞌan.

⁶⁹Vax kuyatni xa nkoo ruꞌu, Ia kuu ñayiu, diñi kuaꞌa Ianyuux nuu taxnuni‑ia.

⁷⁰Te ka xiaꞌan‑s ntdaa‑s: —¿Xijan juini kachi xa mee‑n kuu Daꞌya Yɨɨ Ianyuux a? Te xiaꞌan‑ia nuu‑s: —Joon.

⁷¹Te ka xiaꞌan tnaꞌa‑s: —Ñatu ka ndoñuꞌu‑ro se kixi xa jaꞌan‑s nax kuu kuechi‑s chi mee‑s n‑tekuechi mee‑s. N‑ka teku‑ro vitna.