Read Diuxi-tilantongo San Lucas 4 Bible Online

San Lucas 4 - Diuxi-tilantongo bible

San Lucas 4

¹N‑keé Espíritu Ianyuux Jesús nuu n‑nane‑ia nuu ndute xika Deꞌva Jordán, te n‑jaꞌan Espíritu Ianyuux nuu‑ia xa na jɨꞌɨn‑ia nuu ñatu nga juun dau, te ñayo io.

²Ijan n‑xo tuu‑ia uu diko kɨu. Ntdaa kɨu ijan n‑kuu Kuiꞌna xa dajaꞌan ñaꞌa‑i xa kada‑ia kuechi. Ni ɨɨn xa ña tuu nax n‑xaxi‑ia uu diko kɨu ijan. Ijan dada yo n‑kojon‑ia.

³N‑jaꞌan Kuiꞌna nuu‑ia: —Nux ndaa xa Daꞌya Yɨɨ Ianyuux kuu‑n juñaꞌa yuú yaꞌa na nduu‑i tila.

⁴Te n‑jaꞌan Jesús nuu‑i: —Yodotnuni tnuꞌu Ianyuux xa: “Ñadu diko ni xa kaxi koio ñayiu kundito‑i.”

⁵Ijan te ndeka ñaꞌa Kuiꞌna juaꞌan ɨɨn nuu dujun, te nuniꞌno ni n‑dandeꞌa ñaꞌa‑i ntdaa ñuu ñuñayiu nuu ka taxnuni se ka taxnuni.

⁶Te xiaꞌan‑i nuu‑ia: —Ntdandituꞌu xaꞌa taxi‑r, te tetutniu ñaꞌa‑r xa taxnuni‑n ntdandituꞌu ñuñayiu yaꞌa. Ndadakaꞌnu ñaꞌa ñayiu ya mee‑n chi mee‑r n‑taxi Ianyuux ntdaa xaꞌa, te ñayiu kuu ini mee‑r juñaꞌa‑r.

⁷Nux njuiin xiti‑n nuu‑r te nakuetu‑n nuu‑r, te xaxii‑n kuu ntdandituꞌu xaꞌa.

⁸Xiaꞌan Jesús nuu‑i: —Yodotnuni tnuꞌu Ianyuux xa: “Nuu Ianyuux, Ia kuu Xtoꞌo‑ro, njuiin xiti koio, te nakuetu koio. Nuu mee ni‑ia junukuechi koio.”

⁹Dɨuni ndeka ñaꞌa Kuiꞌna juaꞌan xa jandodo ñaꞌa‑i nuu dujun ka dɨkɨ veñuꞌu Jerusalén. Te xiaꞌan‑i nuu‑ia: —Nux ndaa xa Daꞌya Yɨɨ Ianyuux kuu‑n, jungava nde nuu ñuꞌu jan

¹⁰chi yodotnuni tnuꞌu Ianyuux xa: “Taꞌu tniu Ianyuux nuu ángel, ia ka xinokuechi nuu‑ia, xa junuu ñaꞌa‑ia.”

¹¹Dɨuni yodotnuni tnuꞌu‑ia: “Junuu ñaꞌa koio‑ia xa na ñaꞌa tnukueꞌe xeꞌe‑n nuu yuú” —kuu Kuiꞌna, n‑xiaꞌan‑i.

¹²Te xiaꞌan Jesús nuu‑i: —Dɨuni yodotnuni tnuꞌu‑ia: “Maxku kototnuni‑n Ianyuux, Ia kuu Xtoꞌo‑ro.” N‑kixeꞌe Jesús xa kada‑ia tniu‑ia

¹³Nu n‑yaꞌa xa n‑xitotnuni Kuiꞌna Jesús, te n‑dandoo ñaꞌa‑i, te ña n‑naxee ka‑i nde kɨu n‑ngondita‑i ɨnka vuelta.

¹⁴Ñuꞌu Espíritu Ianyuux Jesús, te n‑kuaꞌa‑ia xa kada‑ia tniu‑ia. N‑xiko‑ia juan ndixi distrito Galilea. Yo n‑ka xo najani ñayiu Galilea xa n‑kida‑ia.

¹⁵N‑xo dakuaꞌa‑ia ñayiu Israel xiti veñuꞌu kuechi‑i, te n‑ka xo najuen tnuꞌu‑i‑ia. N‑ka dangondita ñayiu Nazaret Jesús

¹⁶N‑xiko‑ia, n‑naxee‑ia Nazaret, ñuteyu‑ia. Nani n‑xo xeꞌen‑ia veñuꞌu kuechi ntnaꞌa sabado nuu n‑xo tuu‑ia, dani n‑xo xeꞌen‑ia veñuꞌu luchi ñuu‑ia. N‑xee ntuku kɨu sabado, te juaꞌan‑ia veñuꞌu luchi jan, te n‑nukoo‑ia. Ijan dada n‑ndojuiin‑ia xa kaꞌu ndodo‑ia tnuꞌu Ianyuux yodotnuni nuu ñayiu xyuku ijan,

¹⁷te n‑xiaꞌan se xko kida veñuꞌu tutu tuniꞌno n‑kidavaꞌa Isaías, se n‑jaꞌan tnuꞌu Ianyuux nuu ñayiu. N‑nandɨka‑ia tutu jan, te nu n‑naniꞌi‑ia tnuꞌu kaꞌu‑ia, n‑kaꞌu ndodo‑ia nuu ñayiu xyuku ijan:

¹⁸N‑tetutniu ñaꞌa Espíritu Ianyuux xa jaꞌan‑r tnuꞌu‑ia nuu ñayiu ka kundaꞌu.Ɨɨn xavaꞌa kuu xa jaꞌan‑r nuu‑i.Ñuꞌu ñaꞌa Espíritu‑ia.N‑tundaꞌa ñaꞌa‑ia xa jaꞌan‑r nuu ñayiu xyɨndiꞌu nax kada koio‑i xa yaa‑i.N‑tundaꞌa ñaꞌa‑ia xa ndadavaꞌa‑r ñayiu kuaa na kuaꞌa na nukondeꞌa‑i.N‑tundaꞌa ñaꞌa‑ia xa kada‑r xa yaa ñayiu nuu ñayiu kida uꞌu ñaꞌa.

¹⁹N‑tundaꞌa ñaꞌa‑ia xa jaꞌan‑r xa n‑xee kɨu n‑xantuu Ianyuux xa kada‑ia ɨɨn xa kada‑ia.

²⁰Ijan dada n‑natuniꞌno‑ia tutu jan, te n‑najuñaꞌa‑ia se xko kida veñuꞌu, te n‑nukoo‑ia. N‑ka nukondeꞌa ñaꞌa ntdandituꞌu ñayiu xyuku veñuꞌu luchi jan.

²¹Te n‑kixeꞌe‑ia xa jaꞌan‑ia: —Vitna kuu xa n‑xetnaꞌa tnuꞌu Ianyuux yodotnuni, te n‑ka xo nini‑n —kuu‑ia, xiaꞌan‑ia.

²²N‑ka kutnuni ini ñayiu n‑ka teku tnuꞌu n‑jaꞌan‑ia xa tnuꞌu vii tnuꞌu vaꞌa n‑jaꞌan‑ia. Dɨuni n‑ka kutnuni ini‑i xa ɨɨn xavaꞌa kuu. N‑ka xiaꞌan tnaꞌa‑i: —¿Ñadu se yaꞌa kuu daꞌya yɨɨ José a?

²³Te xiaꞌan Jesús nuu ñayiu jan: —Vaa kachi koio‑n nuu‑r: “Na jaꞌan‑r tnuꞌu yaꞌa: Nani dakuaꞌa‑n ɨnka ñayiu, dani dakuaꞌa‑n ñayiu yaꞌa.” Te vaa dɨuni kachi‑n nuu‑r: “Nani n‑kida‑n ñuu Capernaum, dani ndoñuꞌu xa kada‑n ñuteyu‑n chi n‑ka teku‑r xa n‑kida‑n ijan.”

²⁴Xandaa xakuiti xa se jaꞌan tnuꞌu Ianyuux nuu ñayiu, ñayo ñayiu ñuteyu‑s xe ini ñaꞌa.

²⁵Na n‑xo tuu Elías nación Israel ya, daa n‑ndii uni yodo kuia, te n‑kixi tnama ndeꞌe nituꞌu nación ya. Kueꞌe ñadɨꞌɨ n‑ka xiꞌí yɨɨ n‑xio daa.

²⁶Ña n‑tundaꞌa Ianyuux Elías nuu ɨɨn ñá yaꞌa chi n‑tundaꞌa‑ia Elías nuu ɨɨn ñadɨꞌɨ n‑xiꞌí yɨɨ ñuu nani Sarepta, distrito Sidón.

²⁷Dɨuni n‑xio kueꞌe ñayiu tnaꞌa kueꞌe teꞌyu ñɨɨ nación Israel ya na n‑xo tuu Eliseo, se n‑jaꞌan tnuꞌu Ianyuux nuu ñayiu. Ñayo‑i n‑ndvaꞌa. Mee ni Naamán, se nación Siria n‑ndvaꞌa.

²⁸Yo n‑ka kiti ini ñayiu xyuku veñuꞌu luchi jan xa n‑ka teku‑i tnuꞌu ijan,

²⁹te n‑ka ndojuiin‑i, te n‑ka kineꞌe ñaꞌa‑i yuꞌu ñuu jan. Xndeka ñaꞌa‑i juaꞌan ɨɨn dɨkɨ yuku nuu katuu ñuu‑i xa dajungava ñaꞌa koio‑i,

³⁰ko n‑yaꞌa‑ia meꞌñu‑i ntdaa‑i, te n‑kee‑ia. N‑kineꞌe Jesús xaloko ñuꞌu anu ɨɨn seyɨɨ

³¹Juan nuꞌu‑ia Capernaum. Capernaum kuu ɨnka ñuu katuu distrito Galilea. Ntnaꞌa sabado n‑dakuaꞌa‑ia ñayiu veñuꞌu luchi ñuu ijan.

³²N‑ka yuꞌu ñayiu n‑ka teku xa n‑jaꞌan‑ia jan, te n‑kunuu tnuꞌu‑ia chi n‑ka kutnuni ini‑i xa n‑tundaꞌa ñaꞌa Ianyuux.

³³Veñuꞌu luchi jan tuu ɨɨn se ñuꞌu ñaꞌa xaloko, te xee n‑kana‑s. Xiaꞌan‑s nuu Jesús:

³⁴—Dito, ¿nax juun ñaꞌa‑n? ¿Vaxi‑n xa danaa ñaꞌa‑n a? Xini‑da jundu kuu‑n. Daꞌya Yɨɨ Ianyuux kuu‑n.

³⁵Te n‑kudeen Jesús nuu xaloko ñuꞌu anu se ijan. Xiaꞌan‑ia: —Kadɨ yuꞌu‑n. Ta kee anu‑s —kuu‑ia, xiaꞌan‑ia nuu‑i. Te n‑dajane xaloko jan se ijan meꞌñu ñayiu xyuku ijan. N‑ndua‑s, ko ña tuu nax n‑kuu‑s, te n‑kee xaloko jan anu‑s.

³⁶Te yo ndeꞌe n‑ka yuꞌu ntdaa ñayiu xyuku jan. Xiaꞌan tnaꞌa‑i: —Ñayo n‑xani ini xa duꞌa kada ɨɨn se yaꞌa xa taꞌu tniu‑s nuu xaloko, te kee‑i.

³⁷Te n‑ka teku ntdaa ñayiu io nɨkaduku Capernaum xaꞌa. N‑ndadavaꞌa Jesús didido Simón

³⁸N‑kee‑ia veñuꞌu luchi jan, te juaꞌan‑ia veꞌe Simón. Tnaꞌa didido Simón kaꞌni ndeꞌe, te n‑ka jaꞌan ñayiu xyuku ijan nuu‑ia xa na ndadavaꞌa ñaꞌa‑ia.

³⁹N‑xe juiin ndeyu‑ia nuu kaa‑ña, te n‑kudeen‑ia nuu kaꞌni ndeꞌe ñuꞌu ñaꞌa, te n‑ndiko ñaꞌa kaꞌni. Hora ijan ni n‑ndokoo‑ña, te n‑xiaꞌan‑ña xa n‑xaxi ñayiu xyuku ijan. N‑ndadavaꞌa Jesús kueꞌe ñayiu

⁴⁰Nɨni juan keé ngandii, xndeka ñayiu ñuu ijan ñayiu ka tnaꞌa nudɨɨn kueꞌe n‑ka xee nuu‑ia. N‑xajan ndodo‑ia ndaꞌa‑ia‑i, te n‑ndadavaꞌa‑ia‑i ntdaa‑i.

⁴¹Dɨuni n‑ka kee ñaꞌa kueꞌe xaloko. Xee ka kana‑i. Ka xiaꞌan‑i nuu‑ia: —Mee‑n kuu Daꞌya Yɨɨ Ianyuux. Te n‑kudeen‑ia nuu‑i. Xaxeꞌe xa naꞌa mee‑ia xa xnaꞌa xaloko jan xa mee‑ia kuu Cristu, n‑taꞌu tniu‑ia xa maxku jaꞌan koio‑i xijan. N‑dakuaꞌa Jesús tnuꞌu Ianyuux ñayiu distrito Galilea

⁴²N‑tuu kɨu kuu uu, te n‑kee‑ia. Juaꞌan‑ia ɨɨn nuu ñatu nga juun dau, te ñayo io. N‑ka nanduku ñaꞌa ñayiu, te n‑ka naniꞌi ñaꞌa‑i. N‑ka juini‑i xa na ndoo ka‑ia ijan, te maxku ndee ni‑ia.

⁴³N‑jaꞌan‑ia nuu‑i: —Io xa jɨꞌɨn‑r ɨnka ntuku ñuu xa jaꞌan‑r nuu ñayiu ijan nax io xa kada‑i xa kɨu tnaꞌa‑i nuu ñayiu ka jandixa xa taxnuni Ianyuux nuu‑i. Xaxeꞌe xaꞌa n‑tundaꞌa ñaꞌa‑ia xa vaxi‑r —kuu‑ia, xiaꞌan‑ia.

⁴⁴Daa ni n‑dakuaꞌa naꞌi ka‑ia ñayiu n‑ka xo nataka xiti veñuꞌu kuechi Israel.