Read Diuxi-tilantongo San Lucas 9 Bible Online

San Lucas 9 - Diuxi-tilantongo bible

San Lucas 9

¹Nu n‑xika kɨu, te n‑nadataka Jesús uxi uu se dakuaꞌa‑ia jan. N‑kida‑ia xa n‑ka kuaꞌa‑s xa kineꞌe koio‑s xaloko xñuꞌu anu ñayiu, te dɨuni n‑kida‑ia xa n‑ka kuaꞌa‑s xa ndadavaꞌa koio‑s ñayiu ka kuꞌu.

²N‑tundaꞌa‑ia‑s xa juña tnuꞌu koio‑s ñayiu nax kada koio‑i xa kɨu tnaꞌa‑i nuu ñayiu ka jandixa xa taxnuni Ianyuux nuu‑i. Dɨuni n‑tundaꞌa‑ia‑s xa ndadavaꞌa koio‑s ñayiu ka kuꞌu.

³Xiaꞌan‑ia nuu‑s: —Maxku kaneꞌe koio‑n xa ndoñuꞌu‑n jɨꞌɨn. Maxku kaneꞌe koio‑n karruti‑n. Maxku kaneꞌe koio‑n jayate‑n. Maxku kaneꞌe koio‑n xa kaxi‑n. Maxku kaneꞌe koio‑n tvini. Maxku kaneꞌe koio‑n ɨnka dijun xa nadama‑n.

⁴Hora na xee‑n ɨɨn veꞌe ɨɨn ñuu, ijan ndoo koio‑n, te maxku dama‑n veꞌe ndoo koio‑n.

⁵Nux ma kunini ñayiu ɨɨn ñuu tnuꞌu jaꞌan‑n te hora na ndee koio‑n ñuu jan kɨdɨ koio‑n xeꞌe‑n xa na kee ñuyaka ñuu‑i xa na jini ñayiu jan xa io kuechi‑i —kuu Jesús, xiaꞌan‑ia.

⁶Juaꞌan koio‑s ñuu xiꞌin ñuu. N‑ka jaꞌan‑s nuu ñayiu nax io xa kada‑i xa nanitaꞌu‑i, te n‑ka ndadavaꞌa‑s ñayiu ka kuꞌu. N‑xiꞌí Sua

⁷N‑teku Herodes, se taxnuni, ntdaa xa kida Jesús, te n‑chi ini‑s chi n‑kutnuꞌu xa n‑nandoto Sua.

⁸Dɨuni n‑kutnuꞌu xa n‑nandoto Elías, te n‑nxee‑s. Dani n‑kutnuꞌu xa n‑ka nandoto dava ka se xanaꞌa n‑jaꞌan tnuꞌu Ianyuux nuu ñayiu.

⁹Te n‑jaꞌan Herodes: —¿Ndee se kuu se kida ntdaa xa teku‑r? Ñadu Sua kuu‑s chi n‑xaꞌnde‑r dɨkɨ‑s. Te n‑juini Herodes xa jini‑s Jesús. N‑xiaꞌan Jesús xa kaxi kueꞌe ñayiu

¹⁰N‑ka naxee se n‑dakuaꞌa ñaꞌa Jesús nuu‑ia. N‑ka najani‑s nax n‑ka kida‑s. Ijan dada ndeka dɨɨn ñaꞌa‑ia juaꞌan yuꞌu ñuu nani Betsaida.

¹¹N‑ka taka ñayiu nuu n‑xo tuu‑ia, te nu n‑ka xini koio‑i xa xá juaꞌan‑ia, xndijun ñaꞌa‑i ka xeꞌen. Nu n‑ka nanitnaꞌa‑i xiꞌin‑ia, n‑kuu vaꞌa anu‑ia nuu‑i, te n‑ka kuvete‑i. N‑jaꞌan‑ia nuu‑i nax io xa kada koio‑i xa kɨu tnaꞌa koio‑i nuu ñayiu ka jandixa xa taxnuni Ianyuux nuu‑i. Dɨuni n‑ndadavaꞌa‑ia ñayiu ka kuꞌu.

¹²Nu n‑kundiꞌi ngandii, te n‑ka xetuꞌa ñaꞌa se dakuaꞌa‑ia. Ka xiaꞌan‑s nuu‑ia: —Tundaꞌa‑n ñayiu ya xa na jɨꞌɨn koio‑i ñuu xndatuu yatni xiꞌin ranchu xa na nduku koio‑i nuu ndoo‑i te na jueen‑i xa kaxi‑i chi nuu ñayo io tuu‑ro.

¹³Te xiaꞌan‑ia nuu‑s: —Juñaꞌa koio xa na kaxi‑i. Te ka xiaꞌan‑s nuu‑ia: —Oꞌon ni tila xiꞌin uu ni chaka io a dɨu nga nux na njueen‑ro xa kaxi koio‑i.

¹⁴Xyuku naxa oꞌon mil seyɨɨ ijan xiꞌin ñadɨꞌɨ‑s xiꞌin daꞌya‑s. Nu n‑yaꞌa n‑ka jaꞌan se dakuaꞌa‑ia xijan, te n‑taꞌu tniu‑ia nuu‑s: —Juñaꞌa koio nuu ñayiu xa uu diko uxi uu diko uxi‑i na nkoo koio. Nuu dɨɨn nuu dɨɨn na nkoo koio‑i.

¹⁵Daa n‑ka kida‑s, te n‑ka nukoo ntdaa ñayiu xyuku ijan.

¹⁶N‑tnɨɨ‑ia oꞌon tila jan xiꞌin nduu chaka jan, te n‑nukondeꞌa‑ia andɨu, te n‑xijan taꞌu‑ia nuu Ianyuux. N‑taꞌu dava‑ia tila jan, te n‑xiaꞌan‑ia se dakuaꞌa‑ia xa dakexio koio‑s nuu ñayiu xyuku jan.

¹⁷N‑ka xaxi koio‑i xa nde n‑ka chitu xiti‑i ntdaa‑i. N‑ka nadataka‑s pedazo n‑kendoo, te n‑ka dachitu‑s uxi uu yɨka. N‑jaꞌan Spedru nuu Jesús xa dɨu‑ia kuu Cristu

¹⁸Ɨnka ntuku vuelta tuu‑ia xiꞌin se dakuaꞌa‑ia, te mee ni‑ia n‑kee dɨɨn xa n‑xijan taꞌu‑ia nuu Ianyuux. Ijan dada n‑xijan tnuꞌu‑ia‑s: —¿Jundu kuu‑r ka jaꞌan ñayiu?

¹⁹Ka xiaꞌan‑s: —Dava ñayiu ka jaꞌan xa Sua Bautista kuu‑n, dava‑i ka jaꞌan xa Elías kuu‑n, dava tuku‑i ka jaꞌan xa xixitna‑ro, se n‑xo jaꞌan tnuꞌu Ianyuux nuu ñayiu kuu‑n. Ka xani ini‑i xa n‑nandoto‑n.

²⁰Te n‑xijan tnuꞌu‑ia‑s: —Ndoꞌo ɨɨn ɨɨn‑n, ¿jundu kuu‑r, ka jaꞌan‑n u? Xiaꞌan Spedru: —Cristu, Ia n‑tundaꞌa ñaꞌa Ianyuux kuu‑n.

²¹Te xiaꞌan‑ia xa maxku jaꞌan koio‑s nuu ñayiu jundu kuu‑ia; mee ni‑s na kunaꞌa koio.

²²Xiaꞌan‑ia: —Io xa kada uꞌu ñaꞌa koio sexaꞌnu ka taxnuni nuu ñayiu país‑ro ruꞌu, Ia kuu ñayiu. Dɨuni io xa kada uꞌu ñaꞌa dutu ka taxnuni xiꞌin se ka tuꞌa vaꞌa tnuꞌu n‑chidotnuni Moisés. Io xa jaꞌan koio‑s xa ña ndoñuꞌu ñaꞌa‑s. Dɨuni io xa kaꞌni ñaꞌa koio‑s te nandoto‑r nuu uni kɨu —kuu‑ia, xiaꞌan‑ia nuu se dakuaꞌa‑ia.

²³Te n‑jaꞌan‑ia nuu ntdaa ñayiu xyuku ijan: —Ñayiu juini xa nkuitandijun ñaꞌa‑i, na kande ini koio‑i xa ka kukajan ini‑i, te jun ini koio‑i xa kuú‑i ná ñu ini ɨɨn se doko curuxi‑s xa nkuitakaa dika‑s. Ijan dada nkuitandijun ñaꞌa koio‑i.

²⁴Ñayiu ña ka kuu ini‑i xa naa‑i xaxeꞌe‑r, naa daꞌu ni‑i. Ñayiu naa yɨkɨ kuñu‑i xaxeꞌe‑r, kundito koio‑i nɨkava nɨkuita.

²⁵Ñayiu na niꞌi ntdaa xa io nituꞌu ñuñayiu te naa‑i, ñatu nax kineꞌe koio‑i.

²⁶Ñayiu kujanuu xa xndeka tnaꞌa‑r xiꞌin‑i a xa kakuneꞌe‑i xa jaꞌan‑r, dɨuni kujanuu‑r xa kandeka tnaꞌa‑r xiꞌin‑i hora na ndixi mee‑r, Ia kuu ñayiu. Ndii‑r ná ndii Taa‑r Ianyuux, Ia ii. Ndii‑r ná ndii ángel, ia ka xinokuechi nuu Ianyuux.

²⁷Xandaa xakuiti ma kuú koio‑n nde na jini dava ndoꞌo ñayiu xtuu yaꞌa, xa taxnuni Ianyuux nuu ñayiu ñuñayiu —kuu Jesús, xiaꞌan‑ia. N‑dama nuu Jesús, te n‑koko daꞌma niꞌno‑ia

²⁸Nu n‑yaꞌa naxa una kɨu, te ndeka dɨɨn‑ia Spedru, Sua, Jacobo juaꞌan koio ɨɨn yuku xa kajan taꞌu‑ia nuu Ianyuux.

²⁹Nɨni xijan taꞌu‑ia n‑dama nuu‑ia, te n‑koko daꞌma‑ia. Ná kuu xa xeyeꞌe kuu xa koko daꞌma‑ia.

³⁰Moisés xiꞌin Elías n‑ka nxee, te n‑ndatnuꞌu‑ia xiꞌin‑s.

³¹N‑ka diñu‑s tuku. Ndatnuꞌu‑ia xiꞌin‑s xa vax kuyatni kɨu ndee‑ia Jerusalén te ndaa‑ia andɨu.

³²Yo n‑kuu nuu Spedru xiꞌin nuu dava ka se xtuu xiꞌin‑s xa kidi, ko ña n‑ka kidi‑s, te n‑ka xini‑s xa koko Jesús xiꞌin nduu se xnii xiꞌin‑ia.

³³Diko nga xa ndaa Moisés xiꞌin Elías andɨu te xiaꞌan Spedru nuu Jesús: —Maestru, naka vaꞌa xa n‑ka kixee‑ro yaꞌa. Na kadavaꞌa koio‑da uni veꞌe yutnu vixi — ɨɨn kuu xiꞌin mee‑n, ɨnka na kuu xiꞌin Moisés, te ɨnka na kuu xiꞌin Elías. Juini daa n‑xani ini Spedru xa kada‑s, ko ña kutnuni ini‑s nakuenda xa daa n‑kuu ini‑s.

³⁴Nɨni duꞌa jaꞌan‑s, te n‑ndixi vikó nuꞌu nde nuu ñuꞌu, te n‑ka daꞌu‑s nuu vikó jan.

³⁵Te n‑jaꞌan Ianyuux xiti vikó jan: —Ia yaꞌa kuu Daꞌya Yɨɨ‑r. N‑kaxí‑r‑ia xa kada‑ia tniu‑r. Kunini koio xa jaꞌan‑ia.

³⁶Nu n‑yaꞌa xa n‑jaꞌan Ianyuux, te mee nga Jesús n‑ndoo xiꞌin‑s. Naꞌa n‑kuu n‑yaꞌa xaꞌa, ijan dada n‑ka najani‑s xa n‑ka xini‑s. N‑ndadavaꞌa Jesús ɨɨn seluchi tnaꞌa kueꞌe xiyɨꞌɨ

³⁷Kɨu kuu uu, n‑nuu‑ia xiꞌin‑s xeyuku jan, te kueꞌe ñayiu n‑ka xetnaꞌa ñaꞌa.

³⁸Nuu ñayiu ijan yɨtnaꞌa ɨɨn se tnaꞌa. Xee n‑kana‑s: —Maestru, ɨɨn xa juini‑da. Koto tnaꞌa‑n daꞌya yɨɨ‑da nuu nax tnaꞌa‑s chi idii ni‑s io.

³⁹Xko keé xaloko anu‑s, te danaa kana‑s, te kava ñaꞌa‑i. Nduyutnu‑s, te xido t‑iñu yuꞌu‑s, te datnukueꞌe ñaꞌa‑i. Ña juini‑i xa dayaa ñaꞌa‑i.

⁴⁰N‑xiaꞌan‑da se dakuaꞌa‑n xa na kineꞌe koio‑s‑yɨ, ko ñayo‑s n‑ka ndaku.

⁴¹Te n‑jaꞌan Jesús nuu ñayiu xyuku ijan: —Ndoꞌo, ñayiu io vitna, ña ka kukanu ini ñaꞌa vaꞌa‑n. Unu loko‑n. ¿Nadaa ka kɨu ndoñuꞌu xa kutuu‑ro? ¿Kuiti nadaa ka kɨu nadaa ka ñuu kundee ini‑r? Ijan dada n‑jaꞌan Jesús nuu taa seluchi jan: —Juan kueka daꞌya‑n.

⁴²Nɨni juan tuꞌa seluchi jan Jesús n‑dajane ñaꞌa xaloko jan nuu ñuꞌu, te n‑kava ñaꞌa‑i. Xido t‑iñu yuꞌu‑s, te n‑nduyutnu‑s. N‑kudeen Jesús nuu xaloko jan, te n‑ndadavaꞌa‑ia seluchi jan. Ijan dada n‑nakueka ñaꞌa taa‑s.

⁴³Nu n‑ka xini ñayiu n‑ka xo ndeꞌa xijan xa taxnuni Ianyuux nuu Kuiꞌna, n‑ka nakuetu koio‑i nuu‑ia. N‑ka yuꞌu‑i, te kueꞌe xa n‑ka xani ini koio‑i. Nɨni ka ndatnuꞌu ñayiu jan xa n‑yaꞌa, xiaꞌan Jesús nuu se dakuaꞌa‑ia:

⁴⁴—Maxku ndunaa koio‑n xa n‑jaꞌan‑r xa vax kuyatni kɨu kada ɨɨn se kada xa tnɨɨ ñaꞌa juxtixia ruꞌu, Ia kuu ñayiu.

⁴⁵Ñayo se dakuaꞌa‑ia n‑kutnuni ini nakuenda xa daa n‑jaꞌan‑ia chi n‑kida Ianyuux xa ma kutnuni ini koio‑s. Ñayo‑s n‑kuyɨɨ xa kajan tnuꞌu‑s‑ia. Ndeda ñayiu ku kuu ñayiu ndandɨꞌɨ ka

⁴⁶Nɨni juan nuꞌu‑ia xiꞌin se dakuaꞌa‑ia Capernaum nuu io‑ia, ka ndatnuꞌu‑s nuu ndeda ɨɨn‑s taxnuni nuu‑s ntdaa‑s, te ka jantnaꞌa tnuꞌu‑s.

⁴⁷N‑tu ini Jesús nax n‑ka xani ini‑s te n‑tnɨɨ‑ia ɨɨn seluchi, te n‑xani‑ia‑s diñi‑ia.

⁴⁸Te xiaꞌan‑ia nuu‑s: —Se ka xe ini seluchi yaꞌa xaxeꞌe xa daa juini‑r kuenda kɨu ka xe ini ñaꞌa‑s ruꞌu. Se ka xe ini ñaꞌa dɨuni xe ini‑s Ia n‑tundaꞌa ñaꞌa. Se xani ini xa ñatu ndandɨꞌɨ‑s nuu dava ka‑n, ndandɨꞌɨ‑s nuu Ianyuux.

⁴⁹Te xiaꞌan Sua nuu‑ia: —Maestru, n‑ka xini‑da ɨɨn se xetniu dɨu‑n xa taꞌu tniu‑s nuu xaloko xa kee‑i anu ñayiu, te ka xiaꞌan‑da nuu‑s xa na nujani‑s xaxeꞌe xa ña ndeka tnaꞌa‑ro xiꞌin‑s.

⁵⁰Te xiaꞌan Jesús nuu‑s: —Maxku dadaꞌan‑n xa daa kida‑s chi ñayiu ña jan tnuꞌu ñaꞌa, iñi xiꞌin‑ro xiꞌin‑i —kuu‑ia, xiaꞌan‑ia. N‑kanandee Jesús Jacobo xiꞌin Sua

⁵¹Vax kuyatni kɨu ndaa Jesús andɨu xa nakueka ñaꞌa Ianyuux. Tiempu ijan idii vuelta n‑xajan‑ia anu‑ia xa jɨꞌɨn ntuku‑ia Jerusalén.

⁵²N‑tundaꞌa‑ia dava se dakuaꞌa‑ia xa na ku juindodo nuu‑s ichi juaꞌan Jerusalén, te n‑ka xee‑s ɨɨn ñuu luchi katuu distrito Samaria xa kada tuꞌa‑s veꞌe nuu ndoo koio‑s xiꞌin‑ia.

⁵³Ñatu n‑juini ñayiu ñuu ijan xa ndoo Jesús ñuu‑i xaxeꞌe xa n‑ka tu ini‑i xa jɨꞌɨn‑ia Jerusalén.

⁵⁴Nu n‑ka xini Sua xiꞌin Jacobo xa ñatu n‑ka juini‑i xa kueka‑i Jesús, te ka xiaꞌan‑s nuu‑ia: —Maestru, ¿vatuka xa kajan taꞌu‑ro nuu Ianyuux xa na dajuun‑ia ñuꞌú nde andɨu na kuaꞌa na naa ñayiu yaꞌa u?

⁵⁵N‑ngonenuu Jesús, te n‑kanandee ñaꞌa‑ia.

⁵⁶Ijan dada juaꞌan‑ia xiꞌin‑s ɨnka ñuu. Se n‑ka juini xa nkuitandijun‑s Jesús

⁵⁷Nɨni xika‑ia xiꞌin‑s juaꞌan, n‑xe juntnaꞌa‑ia xiꞌin ɨɨn se n‑xe juntnaꞌa xiꞌin‑ia. Xiaꞌan se ijan nuu‑ia: —Maestru, nkuitandijun ñaꞌa‑da, te kandijun ñaꞌa‑da jɨꞌɨn juini nde kuu nuu na jɨꞌɨn‑n.

⁵⁸Te n‑jaꞌan Jesús: —Chikuii, io yau kava xyɨꞌɨ‑tɨ. Dani chilidaa, io taka‑tɨ, ko mee‑r, Ia kuu ñayiu, ña tuu na veꞌe‑r. Ñavada io nuu ndetatu‑r —kuu‑ia, xiaꞌan‑ia‑s.

⁵⁹Xiaꞌan‑ia nuu ɨnka‑s: —Neꞌe te nkuitandijun ñaꞌa. Xiaꞌan‑s: —Dito, ¿vatuka xa kiꞌna ka nuꞌu‑da veꞌe‑da te na kuú taa‑da kuxi‑da‑s? Ijan dada nkuitandijun ñaꞌa‑da.

⁶⁰Te xiaꞌan‑ia nuu‑s: —Na kuxi tnaꞌa naꞌi koio ñayiu ña xini jundu kuu Ianyuux. Juan juñaꞌa mee‑n nuu ñayiu nax io xa kada‑i xa kɨu tnaꞌa‑i nuu ñayiu ka jandixa xa taxnuni Ianyuux nuu‑i.

⁶¹N‑jaꞌan ɨnka ntuku‑s nuu‑ia: —Maestru, nkuitandijun ñaꞌa‑da, ko vatuka xa kiꞌna ka na jɨn nu koto‑da janda ndoo ñayiu io veꞌe‑da, te juñaꞌa‑da nuu‑i: “Kutuu koio, te kixee‑r” —kuu‑s, xiaꞌan‑s.

⁶²Te n‑jaꞌan‑ia nuu‑s: —Se n‑kixeꞌe xa kidatniu‑s xiꞌin nkutu, te ngonenuu‑s ichi yata‑s, ñatu xiniñuꞌu‑s xa kadatniu‑s nuu ñuꞌu. Daa kuu dava ñayiu juini xa kɨu tnaꞌa‑i nuu ñayiu taxnuni Ianyuux nuu‑i.