Read Diuxi-tilantongo San Juan 12 Bible Online

San Juan 12 - Diuxi-tilantongo bible

San Juan 12

¹Iñu ka kɨu juini xa xee viko Paxcua, te n‑kixee Jesús ñuu nani Betania, ñuu se nani Lázaro. Te Lázaro kuu se n‑xiꞌí te n‑nadandoto Jesús mee‑s.

²Te ijan n‑ka kidavaꞌa‑i ndeyu xaxeꞌe Jesús. N‑dakee Tmarta ndeyu, te nukoo Lázaro xiꞌin se xtuu xiꞌin Jesús.

³Te ijan María neꞌe dava kilo xaxeꞌen vidi nani nardo. Nardo vaꞌa xa kueꞌe yaꞌu. Ndute nardo jan n‑najini‑i xeꞌe Jesús. Idi dɨkɨ‑i n‑nadayichi‑i xeꞌe‑ia. Te nituꞌu xiti veꞌe jan n‑xeꞌen vidi.

⁴Ko n‑kudeen Judas Iscariote, se kuu daꞌya Simón, nuu María. Juini kuu‑s ɨɨn se dakuaꞌa Jesús, ko se diko Jesús kuu‑s. N‑jaꞌan‑s:

⁵—¿Nakuenda ña n‑diko‑ro ndute nardo jan xa uni cientu denario, xa juñaꞌa nga‑ro tvini ñayiu ka kundaꞌu?

⁶Duꞌa ña jaꞌan‑s xaxeꞌe xa juini‑s xa chindee‑s ñayiu kundaꞌu. Duꞌa jaꞌan‑s chi ñaduꞌu kuu‑s. Neꞌe mee‑s tvini se dakuaꞌa Jesús, te tnɨɨ‑s davaꞌa nga tvini juini‑s.

⁷N‑jaꞌan Jesús nuu Judas: —Maxku kudeen ka‑n nuu‑i. Antecas xa kuú‑r, te xá n‑kida tuꞌa‑i yɨkɨ kuñu‑r, xa chinduxi vaꞌa ñaꞌa‑s.

⁸Ñayiu ka kundaꞌu, xtuu‑i xiꞌin‑n ntdaa kɨu, ko mee‑r, ma kutuu ka‑r xiꞌin‑n. N‑ka kida ɨɨn nuu‑s xa kaꞌni koio‑s Lázaro tuku

⁹N‑ka tekutnuꞌu kueꞌe ñayiu Israel xa tuu Jesús Betania, te ijan n‑ka xee‑i nuu tuu‑ia. N‑ka juini‑i xa jini‑i Jesús, ko dɨuni n‑ka juini‑i xa jini‑i Lázaro, se n‑nadandoto‑ia.

¹⁰Te n‑ka kida ɨɨn nuu dutu taxnuni xa kaꞌni koio‑s Lázaro tuku.

¹¹Chi xaxeꞌe Lázaro, te ka dandoo ñayiu xa xetniu ñayiu Israel, te ka jandixa‑i Jesús. N‑kɨu Jesús ñuu nani Jerusalén (Mt. 21:1‑11; Mr. 11:1‑11; Lc. 19:28‑40)

¹²Oꞌon ka kɨu juini xa xee viko Paxcua, te ka xee kueꞌe xa kueꞌe ñayiu Jerusalén. N‑ka tekutnuꞌu‑i xa ijan xee Jesús.

¹³N‑ka xaꞌnde‑i ndaꞌa ñuu kuii, te n‑ka kee‑i Jerusalén, xa jɨn tnaꞌa‑i Jesús dava ichi. N‑ka kana‑i: —¡Na kutaꞌu‑ro Ianyuux! ¡Na kada‑ia xa kutuu vaꞌa se vaxi! ¡Se n‑tundaꞌa Ianyuux xa taxnuni‑s! ¡Na ku kuu‑s se kunxaꞌnu ka nuu ñayiu Israel!

¹⁴N‑niꞌi Jesús ɨɨn burru, te n‑xe kaa‑ia‑tɨ. Te xá n‑kuu kueꞌe kuia, se n‑ka chidotnuni tnuꞌu Ianyuux, n‑ka kidavaꞌa‑s xa duꞌa koo. N‑ka chidotnuni‑s:

¹⁵Maxku yuꞌu koio ka‑n, ñayiu Jerusalén.Kundeꞌa koio‑n xa vaxi se kunxaꞌnu ka nuu‑n,yodo‑s ɨɨn burru.

¹⁶Te hora ijan ni, ña ka kutnuni ini se dakuaꞌa Jesús nax n‑kuu. Ko hora juan ndaa Jesús andɨu, n‑ka najaꞌan‑s xa duꞌa n‑ka kidavaꞌa se n‑chidotnuni tnuꞌu Ianyuux, te duꞌa n‑yaꞌa.

¹⁷Te n‑ka jaꞌan ndaa kueꞌe ñayiu ijan xaxeꞌe Jesús. N‑xo tuu‑i xiꞌin‑ia, hora n‑kana‑ia ndi Lázaro xa ndee‑s yau kava, te n‑nadandoto‑ia‑s nuu n‑yɨnduxi‑s.

¹⁸N‑ka tekutnuꞌu kueꞌe xa kueꞌe ñayiu xa n‑kida Jesús milagru jan, te xaxeꞌe xijan n‑ka xe tnaꞌa‑i‑ia ichi Jerusalén.

¹⁹Te n‑ka jaꞌan se fariseu, nuu ɨɨn‑s nuu ɨnka‑s: —Xini‑n xa ni ɨɨn xa kida‑ro ñatu xiniñuꞌu. Ntdaa ñayiu ñuñayiu ka kunduu xiꞌin‑s. Se jaꞌan tnuꞌu griegu, n‑ka nanduku‑s Jesús

²⁰Nuu ñayiu n‑ka xeꞌen Jerusalén, xa ndadakaꞌnu‑i viko Paxcua, ijan tnaꞌa uni koon ñayiu griegu, ñayiu ña ka kuu ñayiu Israel.

²¹N‑ka kuyatni‑s Slipe, se ñuu nani Betsaida distrito Galilea. Ɨɨn se dakuaꞌa Jesús kuu‑s. N‑ka xijan‑s nuu‑s: —Dito, ka juini‑da xa jini‑da Jesús.

²²N‑nanitnaꞌa Slipe xiꞌin Ndrixi, te n‑xiaꞌan‑s xa n‑ka jaꞌan se griegu, te nduu‑s juaꞌan xiꞌin‑s xa juñaꞌa‑s Jesús.

²³N‑jaꞌan Jesús: —Mee‑r kuu Se kuu ñani tnaꞌa ñayiu. Xá n‑xee kɨu xa kadakaꞌnu ñaꞌa Taa‑r mee‑r.

²⁴Xandaa kuu xa jaꞌan‑r. Ná kuu ɨɨn tata trɨu kuu‑r. Nux ña xate seyɨɨ tata trɨu nuu ñuꞌu, ma kane ni ɨɨn xa kaxi xa koꞌo‑ro. Ko nux jungoio trɨu nuu ñuꞌu, te koo kueꞌe xa kaxi xa koꞌo‑ro. Duꞌa koo xa kuú mee‑r, te kutuu vaꞌa koio mee‑n.

²⁵Ɨɨn seyɨɨ, nux tuu‑s xa niꞌi‑s ntdaa xa juini‑s, te dakuita‑s ntdaa xa n‑xani ini‑s xa n‑niꞌi‑s. Ko ɨɨn seyɨɨ, nux daxio‑s xa io ñuñayiu xa kunduu‑s xiꞌin Ianyuux, te niꞌi‑s xa kutuu vaꞌa‑s xiꞌin Ianyuux andɨu kuia ma jɨn ndɨꞌɨ.

²⁶Ɨɨn seyɨɨ, nux ɨɨn se xinokuechi nuu mee‑r kuu‑s, te io xa kunduu‑s xiꞌin‑r. Nuu kutuu mee‑r, ijan kutuu se xinokuechi nuu‑r tuku. Nux xinokuechi ɨɨn ñayiu nuu‑r, te kadakaꞌnu Taa‑r mee‑i tuku. N‑jaꞌan Jesús nanda koo xa kuú‑ia

²⁷ʼYo loko kueꞌe tnau ini‑r vitna. ¿Nax jaꞌan‑r? ¿Kajan‑r nuu Taa‑r xa dakaku ñaꞌa‑ia, xa maxku yaꞌa‑r kueꞌe vida u? Duꞌa ma kajan‑r, chi vaa‑r xa kada‑r ná io ná juaꞌan tniu n‑taxi‑ia.

²⁸Dada n‑jaꞌan‑ia nuu Ianyuux: —Taa‑da, kada‑n xa kutnuni ini ntdaa ñayiu xa mee‑n kuu Ia kunxaꞌnu ka. Hora ijan ni n‑jaꞌan ɨɨn tnuꞌu nde andɨu: —Xá n‑kida‑r xa kutnuni ini koio ñayiu xa Ia kunxaꞌnu ka kuu‑r, te kada‑r ɨnka vuelta.

²⁹Te xyuku kueꞌe ñayiu ijan. N‑ka teku‑i tnuꞌu nde andɨu, te dava‑i n‑ka jaꞌan xa kana dau. Ko dava‑i n‑ka jaꞌan xa ɨɨn ángel, ia xinokuechi nuu Ianyuux, n‑jaꞌan nuu Jesús.

³⁰N‑jaꞌan Jesús nuu ñayiu xyuku ijan: —Ñadu xaxeꞌe mee‑r n‑jaꞌan tnuꞌu jan nde andɨu. N‑jaꞌan Ianyuux xaxeꞌe mee‑n.

³¹Vitna ndadandaa‑r kuechi ñuñayiu. Vitna kineꞌe‑r kuiꞌna ñuñayiu, xa ma taxnuni ka‑i nuu ñayiu.

³²Na katakaa ñaꞌa koio‑s mee‑r, te kada‑r xa jandixa ñaꞌa ntdaa ñayiu mee‑r.

³³Te xiꞌin tnuꞌu yaꞌa n‑jaꞌan‑ia janda kuu xa kuú‑ia.

³⁴N‑ka jaꞌan ñayiu: —Xá n‑ka teku‑r xa kuia ma jɨn ndɨꞌɨ taxnuni Cristu, Ia tundaꞌa Ianyuux. ¿Nanda kuu xa jaꞌan‑n xa katakaa koio ñayiu Se kuu ñani tnaꞌa ñayiu? ¿Jundu kuu se ijan, Se kuu ñani tnaꞌa ñayiu?

³⁵N‑jaꞌan Jesús: —Ná kuu luz vaꞌa ka koko kuu mee‑r. Xaku nga kɨu kutuu‑r xiꞌin‑n. Nɨni tuu‑r ñuñayiu, io xa kunduu koio‑n xiꞌin‑r, xa ma ku kuu koio mee‑n ná kuu ɨɨn seyɨɨ xikonuu nuu nee, ɨɨn se ña xini ndexu jɨꞌɨn‑s.

³⁶Nɨni tuu‑r xiꞌin‑n, io xa jandixa ñaꞌa koio‑n, xa nduu koio mee‑n daꞌya‑r. N‑jaꞌan Jesús tnuꞌu yaꞌa, te juaꞌan‑ia. Ñayo ka‑s naniꞌi ñaꞌa. Se Israel, dani ña n‑ka jandixa‑s Jesús

³⁷Juini kida‑ia kueꞌe milagru xndeꞌa ñayiu Israel, ko dani ña ka jandixa‑i‑ia.

³⁸Duꞌa n‑xetnaꞌa nax n‑kidavaꞌa Isaías. Se xian tnuꞌu tnuꞌu Ianyuux nuu ñayiu kuu Isaías. Xá n‑kuu kueꞌe kuia n‑kidavaꞌa‑s:Xtoꞌo‑da, ña n‑ka jandixa ñayiu tnuꞌu n‑xian tnuꞌu‑da nuu‑i.N‑dandeꞌa‑n xa taxnuni‑n nuu‑i, ko dani ña n‑ka jandixa ñaꞌa‑i.

³⁹Xijan kuu xa ña n‑ka kuaꞌa‑i xa jandixa‑i. N‑kidavaꞌa Isaías ɨnka vuelta:

⁴⁰N‑kida‑ia xa kuaa‑i.N‑kida‑ia xa kuxee ini‑i.N‑kida‑ia xa nduchi nuu‑i ña kuaꞌa‑i xa kundeꞌa‑i.N‑kida‑ia xa ña kutnuni anu‑i.N‑kida‑ia xa ña kuaꞌa‑i xa natu ini‑i kuechi, xa ndadavaꞌa‑ia‑i.

⁴¹Duꞌa n‑jaꞌan Isaías, chi n‑xini‑s nax koo hora kixi Cristu, Ia tundaꞌa Ianyuux. N‑kutnuni ini‑s xa taxnuni‑ia, te n‑jaꞌan ndaa‑s xaxeꞌe‑ia.

⁴²Ko kueꞌe ñayiu, joon, n‑ka jandixa‑i Jesús. Nde dava se taxnuni nuu ñayiu Israel n‑ka jandixa‑ia. Ko xaxeꞌe se fariseu, te ña n‑ka jaꞌan kanda‑s xa jandixa‑s‑ia, chi ña n‑ka juini‑s xa kineꞌe ñaꞌa koio se fariseu veñuꞌu ñayiu Israel.

⁴³Chi se taxnuni nuu ñayiu, n‑ka tna ini ka‑s xa koo koio ñayiu xañuꞌu nuu mee‑s, dada xa jaꞌan Ianyuux xa ka kida‑s xavaꞌa. N‑jaꞌan Jesús: “Xiꞌin tnuꞌu jaꞌan mee‑r ndadandaa Ianyuux ñayiu”

⁴⁴Hora ijan ni xee n‑jaꞌan Jesús: —Ɨɨn ñayiu, nux jandixa ñaꞌa‑i mee‑r, ña jandixa‑i meni mee‑r, chi jandixa‑i Ia n‑tundaꞌa ñaꞌa mee‑r tuku.

⁴⁵Te ɨɨn ñayiu, nux ndeꞌa ñaꞌa‑i mee‑r, duꞌa ndeꞌa‑i Ia n‑tundaꞌa ñaꞌa mee‑r.

⁴⁶Ná kuu luz vaꞌa ka koko kuu mee‑r. Vaa‑r ñuñayiu, xa ntdaa ñayiu ka jandixa ñaꞌa mee‑r, ma kutuu koio ka‑i nuu nee.

⁴⁷Ɨɨn ñayiu, nux teku‑i tnuꞌu mee‑r, ko ña chinuu‑i nax jaꞌan‑r, te ña ndadandaa‑r‑yɨ. Chi ñatu vaa‑r xa ndadandaa‑r ñayiu, vaa‑r xa dakaku‑r ñayiu, xa maxku kuú koio‑i xiꞌin kuechi‑i.

⁴⁸Ñayiu ña ka jandixa ñaꞌa mee‑r, ñayiu ña ka chinuu tnuꞌu‑r, ma kaku koio‑i. Kɨu ndadandaa Ianyuux ntdaa xa io, daa, xiꞌin tnuꞌu n‑jaꞌan mee‑r, ndadandaa‑ia ñayiu jan.

⁴⁹Chi ñatu jaꞌan‑r tnuꞌu mee‑r. N‑tundaꞌa ñaꞌa Taa‑r, te n‑taꞌu tniu mee‑ia nax jaꞌan‑r te na tnuꞌu jaꞌan‑r.

⁵⁰Naꞌa‑r xa nux jandixa ɨɨn ñayiu tnuꞌu taꞌu tniu Taa‑r, te kutuu vaꞌa‑i xiꞌin‑ia kuia ma jɨn ndɨꞌɨ. Xijan kuu xa jaꞌan‑r tnuꞌu Taa‑r. Tnuꞌu n‑jaꞌan mee‑ia nuu mee‑r, tnuꞌu ijan, jaꞌan mee‑r nuu mee‑n.