Read Diuxi-tilantongo San Juan 20 Bible Online

San Juan 20 - Diuxi-tilantongo bible

San Juan 20

¹Kɨu kiꞌna nuu semana, juaꞌan María Magdalena yau kava jan. Datne neꞌe kuu, dani iin nee ka. N‑xini‑i xa ñatuka ndiꞌu yuú yau.

²N‑kendava‑i, n‑naxee‑i nuu tuu Simón Spedru, xiꞌin ɨnka se n‑dakuaꞌa Jesús, se yo n‑xemani‑ia. N‑jaꞌan‑i nuu‑s: —N‑ka kineꞌe ñayiu yɨkɨ kuñu Xtoꞌo‑ro yau kava, te ña xini‑da ndexu n‑ka kida ñaꞌa‑i.

³Ijan n‑kee Spedru, xiꞌin se ijan, ɨnka se n‑dakuaꞌa Jesús kuu‑s, te ka xeꞌen‑s, nduu‑s, yau kava.

⁴N‑ka kendava‑s nduu‑s, ko xee ka n‑kendava se ijan. Ɨnka se n‑dakuaꞌa Jesús kuu‑s, te kiꞌna ka se ijan n‑xee yau kava.

⁵N‑xajan nenu‑s xiti yau kava, te n‑xini‑s daꞌma ndi Jesús kandodo ijan, ko ña n‑kɨu‑s yau kava.

⁶Ndijun ka Simón Spedru n‑xee, te n‑kɨu mee‑s yau kava, te n‑xini‑s daꞌma ndi Jesús kandodo ijan.

⁷Te dɨuni n‑xini‑s daꞌma n‑xo daꞌu nuu‑ia kandodo ijan. Ña kandodo kaꞌnu daꞌma jan xiꞌin ɨnka daꞌma. Nuu kandodo dɨɨn daꞌma katnaꞌnu.

⁸Ijan dada, n‑kɨu se ijan, ɨnka se n‑dakuaꞌa Jesús kuu‑s, xiti yau kava. Kiꞌna ka‑s n‑xee, ko ña n‑kɨu‑s ijan. N‑xini‑s, te n‑jandixa‑s.

⁹Te tnuꞌu Ianyuux n‑ka chidotnuni seyɨɨ xá n‑kuu kueꞌe kuia, jaꞌan xa io xa nandoto Jesús nuu n‑kuu‑ia ndɨyɨ. Ko se n‑dakuaꞌa‑ia, ta kutnuni ini koio ka‑s tnuꞌu yaꞌa.

¹⁰Te ka nuꞌu se n‑dakuaꞌa Jesús veꞌe‑s. N‑kixee Jesús nuu María Magdalena

¹¹Te nujuiin María Magdalena yata yau kava jan. Te ndaꞌi‑i. Nɨni ndaꞌi‑i, te n‑xajan nenu‑i xa kundeꞌa‑i xiti yau kava.

¹²N‑xini‑i uu ángel, ia ka xinokuechi nuu Ianyuux. Xniꞌna‑ia daꞌma kuixi, te xtuu‑ia nuu n‑kaa ndi Jesús. Ɨɨn‑ia nukoo nuu n‑kaa dɨkɨ‑ia, ɨnka‑ia nukoo nuu n‑kaa xeꞌe‑ia.

¹³N‑ka jaꞌan‑ia: —Ñadɨꞌɨ, ¿nakuenda ndaꞌi‑n? N‑jaꞌan‑i: —Xneꞌe ñayiu yɨkɨ kuñu Xtoꞌo‑da juaꞌan, te ña xini‑da ndexu n‑kida‑i.

¹⁴N‑jaꞌan‑i tnuꞌu yaꞌa, te n‑konenuu‑i. N‑xini‑i Jesús nujuiin‑ia ijan, ko ña n‑najini‑i‑ia.

¹⁵N‑jaꞌan Jesús: —Ñadɨꞌɨ, ¿nakuenda ndaꞌi‑n? ¿Jundu nanduku‑n? N‑xani ini‑i xa se ñunuu jardín kuu‑s, te n‑jaꞌan‑i: —Dito, nux mee‑n n‑ndeka‑ia juaꞌan, kachitnuñaꞌa‑n ndexu io‑ia, xa kuaꞌa‑da xa kandeka‑da‑ia jɨꞌɨn.

¹⁶N‑jaꞌan Jesús: —¡María! N‑konenuu‑i, te tnuꞌu hebreu n‑jaꞌan‑i: —¡Raboni! (Te raboni juini kachi: maestru.)

¹⁷Te n‑jaꞌan Jesús: —Maxku tnɨɨ ñaꞌa‑n, chi ta ndaa ka‑r nuu tuu Taa‑r. Juaꞌan nuu xtuu ñani‑r. Juña tnuꞌu‑n nuu‑s: “Nuꞌu‑r nuu tuu Taa‑r. Taa mee‑n kuu‑ia tuku. Ianyuux jandixa mee‑r kuu‑ia, te Ianyuux ka jandixa mee‑n tuku.”

¹⁸N‑xee María Magdalena nuu xtuu se n‑dakuaꞌa Jesús. N‑jaꞌan‑i nuu‑s: —¡Xá n‑xini‑da Xtoꞌo‑ro vitna! Ijan dada n‑jaꞌan‑i nuu mee‑s ntdaa xa n‑jaꞌan Jesús nuu mee‑i. N‑kixee Jesús nuu se n‑dakuaꞌa‑ia

¹⁹Na n‑kunee kɨu kiꞌna nuu semana, daa n‑ka nataka se n‑dakuaꞌa Jesús. Vaꞌa ndiꞌu yeꞌe, chi n‑ka yuꞌu‑s nuu se Israel. Ijan n‑xee Jesús, te n‑nujuiin‑ia meꞌñu mee‑s. N‑jaꞌan‑ia: —Na kada Ianyuux xa kutuu vaꞌa koio‑n.

²⁰Na n‑jaꞌan‑ia tnuꞌu yaꞌa, n‑dandeꞌa‑ia‑s ndaꞌa‑ia xiꞌin yɨkɨ naꞌa‑ia. Xijan kuu xa yo n‑ka kuvete se n‑dakuaꞌa‑ia, na n‑ka xini‑s Xtoꞌo‑ro.

²¹N‑jaꞌan Jesús ɨnka vuelta: —Na kada Ianyuux xa kutuu vaꞌa koio‑n. Ná n‑tundaꞌa ñaꞌa Taa‑r mee‑r, da tundaꞌa ñaꞌa mee‑r mee‑n.

²²Na n‑jaꞌan‑ia tnuꞌu yaꞌa, n‑tutachi‑ia nuu‑s, ntdaa‑s, te n‑jaꞌan‑ia: —Juejoon koio xa kadatniu Espíritu Ii anu‑n.

²³Ɨɨn ñayiu, nux taxkanu ini‑n kuechi‑i, xá n‑taxkanu ini Ianyuux kuechi‑i. Nux ma taxkanu ini‑n kuechi‑i, dani tuu‑i xiꞌin kuechi‑i. N‑xini Tomás xa n‑nandoto Jesús

²⁴Ko Tomás, se n‑ka xo danani‑s Cuati, ña n‑xo tuu‑s xiꞌin‑s hora n‑xee Jesús. Se n‑dakuaꞌa Jesús kuu‑s, ko xakuaa ijan, ña n‑xo tuu‑s xiꞌin‑s.

²⁵Xijan kuu xa n‑ka jaꞌan ɨnka se n‑dakuaꞌa Jesús nuu‑s: —¡N‑ka xini‑r Xtoꞌo‑ro vitna! Ko n‑jaꞌan Tomás nuu‑s: —Io xa jini‑r ndaꞌa‑ia, nuu n‑ka keé ndɨi kaa. Xiꞌin dɨkɨ ndaꞌa‑r, io xa tnɨɨ‑r nuu n‑ka keé‑i. Xiꞌin ndaꞌa‑r, io xa tnɨɨ‑r yɨkɨ naꞌa‑ia. Dada kuu xa jandixa‑r xa ka jaꞌan‑n.

²⁶Nuu una kɨu, ɨnka vuelta n‑ka nataka se n‑dakuaꞌa‑ia xiti veꞌe jan. Te vuelta yaꞌa n‑xo tuu Tomás xiꞌin‑s. Juini n‑xo ndiꞌu vaꞌa yeꞌe, ko n‑xe kɨu Jesús xiti veꞌe, te n‑nujuiin‑ia meꞌñu mee‑s. N‑jaꞌan‑ia: —Na kada Ianyuux xa kutuu vaꞌa koio‑n.

²⁷Dada n‑jaꞌan‑ia nuu Tomás: —Xiꞌin dɨkɨ ndaꞌa‑n, tnɨɨ ñaꞌa yaꞌa. Kundeꞌa ndaꞌa‑r. Xiꞌin ndaꞌa‑n, tnɨɨ yɨkɨ naꞌa‑r. Te maxku ku kuu ka‑n ɨɨn se ña jandixa. Jandixa ñaꞌa.

²⁸N‑jaꞌan Tomás: —¡Xtoꞌo‑da kuu‑n! ¡Ianyuux jandixa‑da kuu‑n!

²⁹N‑jaꞌan Jesús: —Xaxeꞌe xa xiꞌin nuu‑n n‑xini ñaꞌa‑n, vitna jandixa‑n. ¡Naka kuvete koio ñayiu ña n‑xini ñaꞌa xiꞌin nuu‑i, ko dani jandixa ñaꞌa‑i! Libru yaꞌa n‑kuaꞌa, xa jandixa ñayiu Jesús

³⁰Kueꞌe ka milagru n‑kida Jesús xa n‑ka xini se n‑dakuaꞌa‑ia, ko ñatu yodotnuni yaꞌa.

³¹Ko n‑kidavaꞌa‑da tnuꞌu yaꞌa, xa jandixa koio mee‑n xa Jesús kuu Cristu, Ia n‑tundaꞌa Ianyuux, te kuu‑ia Daꞌya Yɨɨ Ianyuux. N‑kidavaꞌa‑da tnuꞌu yaꞌa, xa jandixa koio mee‑n mee‑ia, te duꞌa kutuu vaꞌa koio mee‑n, xiꞌin mee‑ia kuia ma jɨn ndɨꞌɨ.