Read Diuxi-tilantongo Hebreos 8 Bible Online

Hebreos 8 - Diuxi-tilantongo bible

Hebreos 8

¹Xaꞌa kuu xa jaꞌan‑da. Duꞌa kuu dutu taxnuni ka n‑taxi Ianyuux. Taxnuni‑ia andɨu, nuu nukoo‑ia ndaꞌa kuaꞌa Ianyuux, Ia taxnuni nuu ntdaa xa io.

²Kuu‑ia dutu taxnuni ka, nuu tuu Ianyuux veñuꞌu tabernáculo ndaa ña n‑ka kidavaꞌa ñayiu. Andɨu, kuu‑ia dutu taxnuni ka nuu Ianyuux xaxeꞌe‑ro.

³N‑nduku Ianyuux ɨɨn ɨɨn dutu taxnuni ka nuu ñayiu Israel, xa juñaꞌa‑s xa ka xiaꞌan nga ñayiu xiꞌin xa ka doko ñayiu. Xijan kuu xa, n‑xio xa koo ɨɨn xa doko dutu taxnuni ka tuu andɨu tuku.

⁴Nux dani n‑xo tuu‑ia ñuñayiu n‑kuu, te ma ku kuu‑ia dutu, chi xndaxio dutu ka xiaꞌan xa ka doko ñayiu ná io ná juaꞌan tnuꞌu taꞌu tniu Moisés.

⁵Ntdaa xa ka kida dutu ñayiu Israel kuu ná kuu ɨɨn juendaꞌu ntdaa xa io andɨu. Na n‑kixeꞌe Moisés xa kadavaꞌa‑s veñuꞌu nani tabernáculo, n‑jaꞌan Ianyuux: “Koo‑n cuedado, xa kadavaꞌa‑n ntdaa, ná io ná juaꞌan xa n‑dandeꞌa ñaꞌa‑r dɨkɨ yuku.”

⁶Ko yo vaꞌa ka xa kida Jesús, dada xa ka kida dutu ñayiu Israel. Dɨuni yo vaꞌa ka tratu xee, dada tratu kiꞌna nuu. Nujuiin Jesús nuu Ianyuux xaxeꞌe‑ro, kida‑ia ná io ná juaꞌan tnuꞌu yo vaꞌa ka n‑taxi Ianyuux.

⁷Chi nux ndaku xa kada‑ro ná io ná juaꞌan tratu kiꞌna nuu n‑kuu, te ma ndoñuꞌu xa koo ɨnka.

⁸Ko n‑tekuechi Ianyuux ñayiu jan, chi jaꞌan tnuꞌu Ianyuux:Jaꞌan Xtoꞌo‑ro:“Vaxi kɨu xa kada‑r tratu xee xiꞌin ñayiu Israel, xiꞌin ñayiu Judá.

⁹Tratu xee, ñatu kuu ná kuu tratu n‑kida‑r xiꞌin taxaꞌnu tnetnu ñayiu jan.N‑daneꞌe‑r ñayiu jan,te ndeka‑r ñayiu jan juaꞌan,xa kee koio‑i ñuu nani Egipto.Ko ña n‑ka jandixa‑i tratu n‑kida‑r,te xijan kuu xa n‑dandoo‑r‑yɨ”,kuu Xtoꞌo‑ro xiaꞌan‑ia.

¹⁰Jaꞌan Xtoꞌo‑ro:“Duꞌa kuu tratu xee kada‑r xiꞌin ñayiu Israel, na yaꞌa kɨu ijan.Kada‑r xa kani ini koio‑i tnuꞌu taꞌu tniu‑r,te kuu ná kuu xa kadavaꞌa‑r tnuꞌu taꞌu tniu‑r anu‑i.Te ku kuu‑r Ianyuux jandixa koio‑i.Te ku kuu koio mee‑i, ñayiu mee‑r.

¹¹Te ma ndoñuꞌu xa dakuaꞌa ɨɨn seyɨɨ ñayiu xtuu xiꞌin‑s, xiꞌin ñani‑s, xiꞌin kuꞌa‑s,xa kunduu koio‑s xiꞌin Xtoꞌo‑ro.Chi kunduu koio ntdaa ñayiu xiꞌin‑r, nde sekuechi xiꞌin nde sexaꞌnu.

¹²Chi taxkanu ini‑r xa uꞌu n‑ka kida‑i,te ma najaꞌan ka‑r kuechi‑i.” Kuu Ianyuux xiaꞌan‑ia.

¹³Hora jaꞌan Ianyuux xa tratu xee kuu, jaꞌan‑ia xa ñatuka xiniñuꞌu tratu kiꞌna nuu. Te nux ñatuka xiniñuꞌu, nux xa nyɨɨ kuu, io xa jɨn ndɨꞌɨ.