Read Diuxi-tilantongo Apocalipsis 4 Bible Online

Apocalipsis 4 - Diuxi-tilantongo bible

Apocalipsis 4

¹Nu n‑yaꞌa xa duꞌa n‑jaꞌan‑ia, te n‑xini‑da xa nune yeꞌe andɨu. N‑teku ntuku‑da xa n‑jaꞌan ná n‑kuu xa ndaꞌi strompeta n‑teku‑da vuelta kiꞌna nuu. Duꞌa n‑jaꞌan xijan: —Ta ki kaa yaꞌa na kachitnuꞌu ñaꞌa‑r xa yaꞌa.

²Dana ini n‑tu ini‑da xa ndeka ñaꞌa‑ia juaꞌan, te n‑xini‑da ɨɨn silla kaꞌnu nuu nukoo Ia taxnuni andɨu.

³Ná kaa yuú nani jaspe xiꞌin ná kaa yuú nani cornalina kaa ñɨɨ Ia nukoo nuu silla kaꞌnu jan. Nɨkanduu nuu nukoo silla jan naduku nduu tkoyaꞌnde. Ná kuii yuú nani esmeralda, kuii tkoyaꞌnde jan.

⁴Dɨuni n‑xini‑da oko koon ka silla xiꞌin oko koon se ka kunxaꞌnu xtuu nɨkanduu nuu nukoo silla kaꞌnu jan. Xtuu‑s nuu silla jan te xndeꞌa‑s Ia nukoo meꞌñu‑s. Xniꞌno‑s daꞌma kuixi te xñuꞌu corona oro dɨkɨ‑s.

⁵Kee taxa nuu nukoo silla kaꞌnu jan. Kana dau te kaꞌndɨ. Ka koko uxa xa xndaa ná xndaa itikava do nuu silla kaꞌnu jan. Uxa xijan ka kuu uxa espíritu Ianyuux.

⁶Dɨuni do nuu silla jan io ɨɨn xa kaa ná kaa mar. Ná kaa vidriu kaa, te kɨndɨ. Xnii koon kɨtɨ dana xndaa meꞌñu silla kaꞌnu ka xiꞌin meꞌñu sexaꞌnu xtuu jan. N‑ka naduku nduu‑tɨ silla kaꞌnu jan. Kueꞌe nduchi nuu‑t xndaxio do nuu‑t, do yata‑tɨ du.

⁷Ɨɨn‑tɨ kaa ná kaa ngaꞌa. Ɨnka‑t kaa ná kaa ncerru. Ɨnka‑t neꞌe nuu ñayiu, te kɨtɨ kuu koon kaa ná kaa ñau. Ndava‑tɨ.

⁸Io iñu ndixi kɨtɨ dana xndaa jan. Io nduchi nuu‑t do yata ndixi‑t, kaꞌa ndixi‑tɨ xiꞌin diñi ndixi‑tɨ. Nde nuu ndixi‑tɨ ndenee nduchi nuu‑t. Nduu xakuaa ka jaꞌan‑tɨ:Ii Ianyuux, Ia kuu Xtoꞌo‑ro.Ii Ianyuux, Ia kuu Xtoꞌo‑ro.Ii Ianyuux, Ia kuu Xtoꞌo‑ro.Taxnuni‑ia nuu ntdandituꞌu xa io.Kuu‑ia Ia xa daa nga io te jɨꞌɨn ntuku‑ia ñuñayiu. Ka kuu‑t.

⁹Ka ndadakaꞌnu nkoon kɨt dana xndaa jan Ia xa daa nga ndito, te ma kɨu ma ñuu kuú‑ia, te nukoo‑ia nuu silla kaꞌnu xa taxnuni‑ia. Dɨuni ka najuen tnuꞌu ñaꞌa‑tɨ, te ka xiaꞌan‑tɨ xa n‑ka kutaꞌu‑t nuu‑ia. Ntnaꞌa vuelta duꞌa ka kida nkoon kɨt ijan, ka xe juiin xiti ntdaa sexaꞌnu ka kunxaꞌnu jan nuu Ia xa daa nga io, te ma kɨu ma ñuu kuú‑ia, xa ndadakaꞌnu‑s‑ia tuku, te ka jantuu‑s ntdaa‑s corona‑s nuu‑ia, te ka xiaꞌan‑s:

¹¹Kuu‑n Xtoꞌo‑da, Taa‑ro Ianyuux.Io xa ndadakaꞌnu ñaꞌa‑da.Io xa najuen tnuꞌu ñaꞌa koio‑da.Io xa taxnuni‑n.Chi ndixi n‑xani ini ntdaa xa io andɨu xiꞌin ñuñayiu.Ntdaa xaꞌa io chi daa n‑juini‑n.