Read Dogri मत्ती 23 Bible Online

मत्ती 23 - Dogri bible

मत्ती 23

¹ओस बेलै यीशु ने पीड गी ते अपने चेलें गी आखया,

²“शास्त्री ते फरीसी मूसा दी गद्धी उपर बैठे दे न जीनें गी कनून अधिकार कन्ने तर्जमा करी सकदे न;

³एसकरी ओ तुसेंगी जे केश आखन ओ करो ते मनो, पर उंदे जिये कम मत करो; किके ओ प्रचार ते करदे न पर करदे नेई।

⁴ओ सारे किस्मे दे कनून बनादे न जेड़ा लोकें गीं मनना मुश्कल ओई जंदा; पर अप्पुं उसी मनने आस्ते त्यार नेई।

⁵ओ अपने सारे कम लोकें गी दसने आसतै करदे न; ओ अपने कपडें दे गलमें गी चैड़ा करदे ते अपने कपड़े दी चालरें गी बदांदे न।

⁶रुट्टी दी धामें च खास-खास जगहां, ते प्रार्थनाकार बेच खास-खास कुर्सियां,

⁷ते बजारें च नमस्ते, ते मनुक्खें बेच गुरु खुआना उनेंगी छैल लगदा ऐ।

⁸पर तोस अपने आप गी गुरु नेई खुआयो, किके थुआड़ा एक गै गुरु ऐ, ते तोस सारे प्रा ओ।

⁹तरती उपर कुसे गी अपना पिता नेई आखयो, किके थुआड़ा एक गै पिता ऐ, जेड़ा सोर्ग बेच ऐ।

¹⁰ते स्वामी बी नेई खुआयो, किके थुआड़ा एक गै स्वामी ऐ, मतलब मसीह।

¹¹जेड़ा थुआड़े बेच बड़ा ऐ, ओ थुआड़ा सेवक बनें।

¹²जेड़ा कोई अपने आप गी बड़ा बनाग, ओ निक्का कित्ता जाग, ते जेड़ा कोई अपने आप गी निक्का बनाग, ओ बड़ा कित्ता जाग।”

¹³“ए कपटी शास्त्रियो ते फरीसीयों, थुआड़े उपर बसोस! तोस मनुक्खें आसतै सोर्ग दे राज दा दरबाजा बंद करदे ओ, नां गै तोस अप्पुं ओस बिचें दाखल ओदे ओ ते नां दाखल ओनें आलें गी दाखल ओना दिंदे ओ।

¹⁴(ए कपटी शास्त्रियो ते फरीसियो, थुआड़े उपर बसोस! तोस विधवें दे करें गी लूटी जंदे ओ, ते दसने आसतै मते चेर तकर प्रार्थना करदे रोंदे ओ; एसकरी तुसेंगी बड़ी बड़ी सजा मिलग)।

¹⁵“ए कपटी शास्त्रियो ते फरीसीयों, थुआड़े उपर बसोस! तोस एक जन गी अपनी मत्त बेच आनने आसतै सारे जल ते थल बेच फिरदे ओ, ते जेसलै ओ थूआडी मत्त बेच आई जंदा ऐ तां उसी अपने थमां जादै नरक बेच जाने आला बनाई बेदी ओ।

¹⁶“ए अन्नें अगुवो, थुआड़े उपर बसोस! जेड़े तोस आखदे ओ के जे कोई मंदर दी कसम खा तां केश नेई ओंदा, पे जेकर कोई मंदर दे सुन्ने दी कसम खा तां ओ ओदे कन्ने बझी जाग।

¹⁷ए मूर्खो ते अन्नयो, केड़ा बड़ा ऐ; सुन्ना यां ओ मंदर जेसदे कन्ने सुन्ना पवित्र ओंदा ऐ?

¹⁸पी आखदे के जे कोई के बेदी दी कसम खा तां केश नेई, ओंदा पर जेड़ी पेंट ओस उपर ऐ, जेकर कोई ओसदी कसम खा तां ओ ओदे कन्ने बझी जाग।

¹⁹ए अन्नयो, केड़ा बड़ा ऐ; पेंट जां बेदी जेस कन्ने पेंट पवित्र ओंदी ऐ?

²⁰एसकरी जेड़ा कोई बेदी दी कसम खंदा ऐ, ओ ओदी ते जे केश ओदे उपर चाड़ा ऐ, ओसदी बी कसम खंदा ऐ।

²¹ते जेड़ा मंदर दी कसम खंदा ऐ, ओ ओसदी ते ओस बेच रौने आलें दी बी कसम खंदा ऐ।

²²जेड़ा सोर्ग दी कसम खंदा ऐ, ओ परमेसर दे सिंहासन दी ते ओस उपर बैठने आले दी बी कसम खंदा ऐ।

²³“ए कपटी शास्त्रियो ते फरीसीयों, थुआड़े उपर बसोस! तोस पुदनें ते सौंफ, ते जीरे दा दसमा अंश तां दिंदे ओ, पर तुसें कनून दियां गैरीयां गल्लां मतलब न्याय, ते दया, ते ईमानदारी गी शुड़ी दिते दा ऐ; चाईदा हा के तोस इन्नें गी बी करदे रोंदे ते उनेंगी बी नेई शुड़दे।

²⁴ए अन्नें अगुवो, तोस निके उक्में गी मनने कित्ते बड्डे चोकन्ने ओ, तोस मछर गी तां छानी लैंदे ओ, पर ऊंट गी निंगली जंदे ओ।

²⁵“ए कपटी शास्त्रियो ते फरीसीयों, तोस निके उक्में गी मनने कित्ते बड्डे चोकन्ने ओ, थुआड़े उपर बसोस! तोस कटोरे गी ते थाली गी उपर-उपरा दा साफ करदे ओ पर अन्दर दिले बेच न्हेर ते कौड़ा पन परे दा ऐ।

²⁶ए अन्नें फरीसी, पैलैं कटोरे गी ते थाली गी अन्दर दा साफ़ के ओ बार दा बी साफ़ रवै।

²⁷“ए कपटी शास्त्रियो ते फरीसीयों, थुआड़े उपर बसोस! तोस चूना फेरी दी कबरें आला लेखा ओ जेड़ीयां उपरा तां शैल लबदियां न, पर अन्दर दा मुड़दे दियां अड्डियां ते सारे किसम दी गन्दकी कन्ने परोई दियां न।

²⁸एस चाली तोस बी उपरा दा मनुक्खें गी तरमी लबदे ओ, लेकन अन्दर कपट ते अतर्म कन्ने परोए दे ओ।

²⁹“ए कपटी शास्त्रियो ते फरीसीयों, थुआड़े उपर बसोस! तोस पविखवक्तें दी कबरें दी मर्मत करदे ते तरमीं दियें कबरें गी बनांदे ओ,

³⁰ते आखदे ओ, अगर अस अपने बजुर्गें दे बेलै च ओदे हे तां पविखवक्तें दी अत्या च उंदे सांझीदार नेई ओदे हे।

³¹एस गल्ल थमां तां तोस अपनी गुआई अप्पुं गै दिंदे ओ के तोस पविखवक्तें दी अत्या करने आलें दी औलाद ओ।

³²एस आसतै तोस अपने बजुर्गें आला लेखा पाप दा घड़ा पूरी चाली परे दे ओ।

³³ए सप्पयो, ए जरिले सप्प दे बच्चयो, तोस नरक दी सजा थमां कियां बचगे?

³⁴एसकरी दिखो, आऊँ थुआड़े कोल औने आले पविखवक्तें गी ते बुधिमानें ते शास्त्रियें गी पेजना ऐ; ते तोस उंदे बिचा केईयें गी तां मारी देगे ते सूली उपर चढ़ागे, ते केईयें गी अपने प्रार्थनाकार च डंडे मारगे ते एक शैर बिचा दुए शैर गी खदाड़दे फिरगे।

³⁵जेस कोलां तरमी हाबिल थमां लेईयै बिरिकयाह दे पुत्तर जकर्याह तकर, जिसी तुसें मंदर ते बेदी दे बिच मारी दित्ता हा, जिन्नें बी तर्मियें दा खून तरती उपर रुडाया गेदा ऐ, ओ सारा थुआड़े सिरे उपर पौग।

³⁶आऊँ थुआड़े कन्ने सच आखना ऐं, ए सब गल्लां एस पीढ़ी दे लोकें उपर सजा आई पोंघंन।”

³⁷“ए यरूशलेम दे लोको! ए यरूशलेम दे लोको! तुं जेड़ा पविखवक्तें गी मारी ओड़ना ऐ, ते जेड़े तेरे कोल पेजे गै उन्दे उपर तुं पत्थर मारना ऐ। किनी बारी गै मैं सोच्चया के जियां मुर्गी अपने बच्चें गी अपनीयें बगलें एठ किटठा करदी ऐ, इयां गै आऊँ बी तेरे बच्चें गी किटठा करी लै, पर तो ए नेई चाया

³⁸दिखो, थुआड़ा कर थुआड़े लेई जुआडीयै शुड़या जंदा ऐ,

³⁹किके आऊँ थुआड़े कन्ने आखना ऐं के हूंन थमां जेसलै तकर तोस नेई आखगे, धन्न ऐ ओ, जेड़ा प्रभु दे अधिकार कन्ने ओंदा ऐ ओस बेलै तकर तोस मिगी पी कदें बी नेई दिखगे।”