Read Dogri मत्ती 25 Bible Online

मत्ती 25 - Dogri bible

मत्ती 25

¹ओस बेलै सोर्ग दा राज उनै दस कवारियें आला लेखा ओग जेड़ीयां अपनीयां मशालां लेईयै मराजे कन्ने पेंट करने गी निकलीयां।

²उंदेचा पंज्ज मुर्ख ते पंज्ज समझदार थीयां।

³मुर्खें अपनी मशालां तां लेतीयां, लेकन अपने कन्ने तेल नेई लेता;

⁴लेकन समझदारें अपनी मशालें दे कन्ने अपनी कुप्पियें च तेल बी परी लेता।

⁵जेसलै मराजे दे ओंने गी देर ओई, तां ओ सारीयां सौनें गी झपकियाँ लैंन लगियाँ ते सेई गेईयां।

⁶अध्दी राती शोर मचया; के दिखो, मराज अवै करदा ऐ! ओस कन्ने पेंट करने गी चलो।

⁷ओस बेलै सारीयां कवारियां उठीयै अपनीयां मशालां ठीक करना लगियाँ।

⁸ते मुर्खें समझदारें गी आखया, अपने तेल बिचा असेंगी बी केश तेल दियो, किके साड़ीयां मशालां हिस्सला दियां न।

⁹लेकन समझदार कवारियें जबाब दित्ता, जेकर ए साड़े ते थुआड़े आसतै पूरा नेई उवै; ठीक गल तां ए ऐ के तोस बेचने आलें दे कोल जाईयै अपने आसतै मुल्लें लेई लिओ।

¹⁰जेसलै ओ मुल्लें लेने गी जा करदी हियां तां उसै बेलै मराज आई पूज्या, ते जेड़ीयां तयार हियां, ओ ओदे कन्ने विहा आलें कर च चली गेईयां ते दरबाजा बंद करी दित्ता गीया।

¹¹एस दे बाद दुईयां कवारियां बी आईयै आखन लगियाँ, ए स्वामी, ए स्वामी, साड़े आसतै दरबाजा खोली दे!

¹²ओसने जबाब दित्ता, आऊँ थुआड़े कन्ने सच आखना ऐं, के आऊँ तुसेंगी नेई जानदा।

¹³एसकरी बिजे दे रवो, किके तोस नेई ओस देन गी जांनदे ओ, नेई ओस घड़ी गी।

¹⁴किके ए ओस मनुक्ख आला लेखा आलत ऐ जेस ने परदेस जंदे पक्त अपने दासें गी बलाईयै अपनी जाजास्त उनेंगी सौंपी दित्ती।

¹⁵ओसने एक गी पंज्ज तोड़े, दुए गी दाऊँ, ते त्रिये गी एक[4]; मतलब अर एक गी ओसदी थबीक दे मताबक दिता, ते ओस बेलै ओ परदेस चली गीया।

¹⁶ओस बेलै, जिसी पंज्ज तोड़े मिले दे हे, ओसने फोरन जाईयै उंदे कन्ने लैंन देन कित्ता, ते पंज्ज तोड़े ओर कमाए।

¹⁷इसै तरीके जिसी दाऊँ मिले दे हे ओसने बी दाऊँ ओर कमाए।

¹⁸लेकन जिसी एक मिले दा हा, ओसने जाईयै गत कढया, ते अपने स्वामी दे तोड़े गी छपाली दित्ता।

¹⁹मते दिनें कोलां बाद उनै दासें दा स्वामी आईयै उंदे थमां लेखा लेने लगया।

²⁰जिसी पंज्ज तोड़े मिले दे हे, ओसने पंज्ज तोड़े ओर आनीयै आखया, ए स्वामी, तो मिकी पंज्ज तोड़े सोंपे दे हे, देख, मैं पंज्ज तोड़े ओर कमाए न।

²¹ओदे स्वामी ने ओस कन्ने आखया, “धन्न, ऐ अच्छे ते बश्वास जोग दास, तुं थोड़े बेच बश्वास जोग रिया; आऊँ तुगी मती सारी चीजां दा जिमेंबार बनागा। अपने स्वामी दी खुशी च शामल ओ।”

²²ते जिसी दाऊँ तोड़े मिले दे हे, ओसने बी आईयै आखया, ए स्वामी, तो मिकी दाऊँ तोड़े सोंपे दे हे, देख, मैं दाऊँ तोड़े ओर कमाए।

²³ओसदे स्वामी ने ओस कन्ने आखया, धन्न, ऐ अच्छे ते बश्वास जोग दास, तुं थोड़े च बश्वास जोग रिया; आऊँ तुगी मती चीजें दा जिमेंबार बनागा। अपने स्वामी दी खुशी च शामल ओ।

²⁴ओस बेलै जिसी एक तोड़ा मिले दा हा, ओसने आईयै आखया, ए स्वामी, आऊँ तुगी जानदा ऐं के तुं कठोर मनुक्ख ऐं तुं जित्त्थें कुतै नेई रांदा उत्थें बड्डनां ऐं, ते जित्त्थें नेई रानें आसतै सुटना उत्त्थुआं गै किट्ठा करना ऐं।

²⁵एसकरी आऊँ डरी गीया ते तेरा तोड़ा मिट्टी च शपाली दित्ता। देख, जेड़ा तेरा ऐ, ओ ए ऐ।

²⁶ओदे स्वामी ने उसी जबाब दित्ता, ए दोष्ट ते आलसी दास, जे तुं ए जानदा हा के जिथें आऊँ नेई रानां उत्त्थुआं दा बड्डना ऐं, ते जित्त्थें मैं नेई सुटया उत्त्थुआं दा किट्ठा करना ऐं;

²⁷तां पी तुगी चाईदा हा के मेरा पैसा शाऊकारें गी देई दिंदा, ओस बेलै आऊँ अपना पैसा आईयै ब्याज दे कन्ने लेई लैंदा।

²⁸एसकरी ओ तोड़ा ओस थमां लेई लिओ, ते जेसदे कोल दस तोड़े न, उसी देई दियो।

²⁹किके जेस कुसे दे कोल ऐ, उसी ओर दित्ता जाग; ते ओदे कोल मता ओई जाग; लेकन जेसदे कोल नेईयैं, ओस थमां ओ बी जेड़ा ओदे कोल ऐ, लेई लित्ता जाग।

³⁰ते एस नकम्मे दास गी बार न्हेरे बेच सुट्टी दियो, जिथें रोनां ते दंद किल्डनां ओग।

³¹जेसलै मनुक्ख दा पुत्तर अपनी मैमा च औग ते सारे सोर्गदूत ओदे कन्ने औगन, तां पी ओ अपनी मैमा दे सिंहांसन उपर विराजमान ओग।

³²ते सारी जातीयां ओदे अगें किट्ठीयां कित्ती जाघंन; ते जियां गुबाल पिड्डें गी बकरीयें कोलां लग करी दिंदा ऐ, उयांगै ओ उनेंगी एक दुए कोलां लग करग।

³³ते ओ पिड्डें गी अपनी सज्जी बखी ते बकरीयें गी खबी बखी खड़ा करग।

³⁴ओस बेलै राजा अपनी सज्जी बखी आलें गी आखघ, ए मेरे पिता दे धन्न लोको, आओ ओस राज दे आक्दार ओई जाओ, जेड़ा जगत दे शुरू थमां थुआड़े आसतै तयार कित्ते दा ऐ।

³⁵किके आऊँ भूखा दा हा, ते तुसें मिगी खाणे आसतै दिता; आऊँ त्रैया (प्यासा) दा हा, ते तुसें मिगी पानी पलाया; आऊँ परदेसी हा, ते तुसें मिगी अपने कर च रख्या;

³⁶आऊँ नंगा हा, ते तुसें मिगी कपड़े पुआए; आऊँ बमार हा, ते तुसें मेरा खयाल रख्या, आऊँ जेल बेच हा, ते तुसें मिगी मिलने गी आए।

³⁷ओस बेलै तरमी उसी जबाब देघंन, ए प्रभु, असैं कुस्लै तुगी भूखा दा दिखया ते खाणा खलाया? जां त्रैया (प्यासा) दा दिखया ते पानी पलाया?

³⁸असैं कुस्लै तुगी परदेसी दिखया ते अपने कर च रख्या? जां नंगा दिखया ते कपड़े पुआए?

³⁹असैं कुस्लै तुगी बमार जां जेलै च दिखया ते तेरे कन्ने मिलने गी आए?

⁴⁰ओस बेलै राजा उनेंगी जबाब देग, आऊँ थुआड़े कन्ने सच आखना के तुसें जेड़ा मेरे इनें निकें थमां निक्के प्राऊ बिचा कुसे एक क्न्नें इयै नियां पला कम कित्ता, ओ मेरे गै कन्ने कित्ता।

⁴¹ओस बेलै ओ खबी बखी आलें गी आखघ, ए लांनती लोको, मेरे सामनें दा ओस मेशा दी अग्गी बेच चली जाओ, जेड़ी शतान ते ओदे दूतें लेई तयार कित्ती गेदी ऐ।

⁴²किके आऊँ भूखा दा हा, ते तुसें मिगी केश खाणे गी नेई दिता; आऊँ त्रैया (प्यासा) हा, ते तुसें मिगी पानी नेई पलाया;

⁴³आऊँ परदेसी हा, ते तुसें मिगी अपने कर नेई रख्या; आऊँ नंगा हा, ते तुसें मिगी कपड़े नेई पुआए; आऊँ बमार ते जेलै च हा, ते तुसें मेरा खयाल नेई कित्ता।

⁴⁴ओस बेलै ओ जबाब देघंन, ए प्रभु, असैं तुगी कुस्लै भूखा, जां त्रया दा प्यासा, जां परदेसी, जां नंगा, जां बमार, जां जेलै च दिखया, ते तेरी सेवा टैल नेई कित्ती?

⁴⁵ओस बेलै ओ उनेंगी जबाब देग, “आऊँ थुआड़े कन्ने सच आखना ऐं के तुसें जेड़ा इनें निकें थमां निकें बिचा कुसे एक कन्ने नेई कित्ता, ओ मेरे कन्ने बी नेई कित्ता।

⁴⁶ते ए मेशा दी सजा पोगघंन मगर तरमी मेशा दी जिंदड़ी च दाखल ओगन।”