Read Dogri मरकुस 10 Bible Online

मरकुस 10 - Dogri bible

मरकुस 10

¹पी ओ उत्त्थुं उठीयै यहूदीया दे लाके च ते यरदन दे पार पूजे। पीड पी ओदे कोल किठी ओई गेई, ते अपनी रीति मताबक उनेंगी पी प्रचार करन लगया।

²ते फरीसियें ओदे कोल आईयै ओदी परिख्या लेने आसतै उसी पूछन लगे, “के ए ठीक ऐ के मर्द अपनी जनानी गी छुड़ी दे?”

³ओनें उनेंगी जबाब दिता, “मूसा ने तुसेंगी के उक्म दिता ऐ?”

⁴ओ बोले, “मूसा ने मनुक्ख गी उक्म दिता ऐ गी ओ लेखत देईयै छुड़ी सकदे न।”

⁵यीशु ने उनेंगी आखया, “थुआड़े मन सख्त होने दी बजाए उक्म लिखा ऐ।

⁶लेकन सृष्टि दे शुरुवात च, परमेसर ने मर्द ते जनानी बनाए।

⁷एसकरी मर्द अपने मां-प्यो कोलां लग ओईयै अपनी करेआली कन्ने रौग।

⁸ते ओ दुए एक जी ओगन, एसकरी ओ दो नेई एक जी न।

⁹एसकरी जिसी परमेसर ने जोड़या ऐ उसी कोई मनुक्ख लग नेई करै।”

¹⁰ते चेलें कर च आईयै एस दे बारै च पी पूछ्या।

¹¹ओनें उनेंगी आखया, “जेड़ा कोई अपनी करेआली गी तलाक देईयै ते दुई कन्ने ब्या करै तां ओ पैली दे खलाफ ब्यभिचार करदा ऐ।

¹²ते जनांनी बी जेकर अपने पति गी तलाक देईयै दुए कन्ने ब्या करै तां ओ बी ब्यभिचार करदी ऐ।”

¹³पी लोक बच्चें गी ओदे कोल लयान लगे के ओ उन्दे उपर अथ्थ रखन, लेकन चेलें उनेंगी डाटया।

¹⁴यीशु ने जेलै ए दिखया ते गुस्सै च ओईयै उनेंगी आखया, “बच्चे गी मेरे कोल औन दियो, उनेंगी मना नेई करो, किके परमेसर दा राज इयै नियां दा गै।

¹⁵आऊँ तुसेंगी सच आखना, जेड़ा कोई परमेसर दे राज गी बच्चें आला लेखा ग्रहण नेई करै, ओ ओदे राज च कदें बी दाखल नेई ओग।”

¹⁶पी ओ उनेंगी गोदी च लेईयै उंदे उपर अथ्थ रखियै उनेंगी गी अशीर्वाद देन लगया।

¹⁷ते जेसलै यीशु ते ओदे चेलें निकलियै सफर च जा दे हे, तां एक मनुक्ख ओदे कोल दौड़दा आया, ते गोढे नुवाईयै उसी पूछन लगया, “ए अच्छे गुरु, मेशा दी जिंदड़ी थोने आसतै आऊँ के करां?”

¹⁸यीशु ने उसी आखया, “तू मिगी अच्छा कि आखना ऐं? परमेसर दे बजा कोई अच्छा नेई

¹⁹तू उक्में गी तां जांनना गै, अत्या नी करयां, ब्यभिचार नी करयां, चोरी नी करयां, चुठी गुआई नी दियां, तोखा नी करयां, अपने मां-प्यो दा आदर करयां।”

²⁰ओनें उसी आखया, “ए गुरु, आऊँ बचपन थमां ए सारीयां गल्लां मनदा आया ऐं”

²¹यीशु ने उसी दिखियै ओदे कन्ने प्रेम कित्ता, ते उसी आखया, “तेरे च एक गल्ल दी कमी ऐ। जा, जेड़ा केछ तेरा ऐ उसी बेचियै गरीबें गी बंडी ओड़, ते तुगी सोर्ग च तन्न थोग, ते आईयै मेरे पिछें चली आ।”

²²एस गल्ल उपर ओदे मुं उपर दुआसी छाई गेई, ते ओ दुखी ओईयै उत्त्थुं दा चली गीया, किके ओ बड़ा धनी हा।

²³यीशु ने चौनी पासें दिखियै अपने चेलें गी आखया, “मीर मानुऐ दे लेई परमेसर दे राज बेच जाना किन्ना औखा ऐ!”

²⁴चेलें ओदी गल्लें उपर रांन ओई गै। एस गल्ल लेई यीशु ने उनेंगी पी आखया, “ए बच्यो, परमेसर दे राज च दाखल ओना किन्ना औखा ऐ!

²⁵परमेसर दे राज च मीर मानुऐ गी दाखल ओनें कोलां ए सौखा ऐ ऊंट दा सूई दे नके बिचें निकलना!”

²⁶ओ मते गै रांन ओईयै अप्पुं बिचै बोलन लगे, “ते पी कोन बचाया जाग?”

²⁷यीशु ने उंदी बक्खी दिखियै आखया, “मनुखे थमां तां ए नेई ओई सकदा, लेकन परमेसर थमां सब केश ओई सकदा ऐ।”

²⁸पतरस ने उसी आखया, “देख्ख, अस तां सारा केछ छुड़ीयै तेरे पिछें ओई गेदे न।”

²⁹यीशु ने आखया, “आऊँ तुसेंगी सच आखना ऐं के ऐसा कोई नेई, जेस ने मेरे ते मेरे शोभ समाचार खातर करयां प्रा यां पैनां यां मां यां प्यो यां बाल-बच्चे यां खेती गी छूडी ओड़ा ओग,

³⁰ते हुन एसलै सौ गुणा नेई थूवै, करें गी, प्राऐं गी, पैनें गी, मांऐं गी, बाल-बच्चें गी ते खेतरें गी सताव दे कन्ने ते औने आले योग च मेशा दी जिंदड़ी।

³¹लेकन मते सारे जेड़े पैले न, ओ पिछले ओगन; ते जेड़े पिछले न, ओ पैले ओगन।”

³²ते यीशु ते ओदे चेलें यरूशलेम दे रस्ते च जा दे हे, ते यीशु उन्दे अगें-अगें चला दे हे; चेलें रांनगी करना लगे, ते जेड़े ओदे पिछें-पिछें चला दे हे ओ मते गै डरे हे, पी ओ बारें गी लेईयै उन्दे कन्ने गल्लां करन लग्या, जेड़ीयां ओदे कन्ने ओनें आलियां हां,

³³सुन्नो, “अस यरूशलेम च जानेयां, ते आऊँ मनुक्ख दा पुत्तर प्रधान याजकें ते शास्त्रियें दे अथ्थ च पड़काया जागा, ते ओ उसी मौत दी सजा देने योग आखघन, ते गैर जातीयें दे अथ्थ च सोंपगन।

³⁴ते ओ ओसदा मौजु लैगन, ओदे उपर थूकगन, उसी कोड़े मारगन, ते उसी मारी ओडगन, ते त्रै देन च जिन्दा ओई जाग।”

³⁵पी जब्दी दे दो पुत्तर, याकूब ते यूहन्ना ओदे कोल आईयै बोलन लग्गे, “ए गुरु, अस चानयां के जेड़ा केछ असैं तेरे कोलां मंगया ऊऐ तू साड़े आसतै कर।”

³⁶ते ओनें उसी आखया, “तोस के चान्दे हो के थुआड़े आसतै करां?”

³⁷उनै उसी आखया, “असेंगी एदे, के तेरी मैमा च साड़े बिचा एक तेरे सजी बखी ते दुआ तेरी खबी बखी बवे।”

³⁸यीशु ने उनेंगी आखया, “तोस नेई जांनदे के तोस के मंगा दे ओ जेड़ा दोख दा प्याला आऊँ पीने आला ऐं के तोस पी सकदे ओ? यां जेड़ा मौत दा जल संस्कार आऊँ लेने आला ऐं के तोस पी सकदे ओ?”

³⁹उनै यीशु गी आखया, “साड़े कोलां ओई सकदा ए जेड़ा प्याला आऊँ पीने आला ऐं के तोस पी सकदे ओ यां जेड़ा जल संस्कार आऊँ लेने आला ऐं के तोस लैगे।

⁴⁰लेकन अपने सजे यां खबे बखी बठाने दा कम मेरा नेई; ऐ उन्दे लेई ऐ जिन्दे लेई त्यार कित्ता गेदा ऐ।”

⁴¹ऐ गल्ल सुनीयै दसैं चेलें याकूब ते यूहन्ना उपर गुस्सै ओई गै।

⁴²ते यीशु ने उनेंगी कोल बलाईयै आखया, “तोस जांनदे ओ के जेड़े गैर जातीयें दे राज करने आले समझे जन्दे न ओ उन्दे उपर राज करदे न; ते उन्दे च जेड़े बड्डे न उन्दे उपर अख्त्यार चलान्दे न।

⁴³लेकन थुआड़े च ऐसा नेई ऐ, लेकन जेड़ा कोई थुआड़े च बड़ा बनना चा, ओ थुआड़ा सेवदार बने;

⁴⁴ते जेड़ा कोई थुआड़े बिचा बड़ा बनना चा, ओ सारे दा दास बने।

⁴⁵किके मनुक्ख दा पुत्तर एस आसतै नेई आया के ओदी सेवा कित्ती जा, वरन् एस आसतै आया के सेवा करै, ते मतें गी छुडाने आसतै प्राण देईयै छडौती दिती।”

⁴⁶ओ यरीहो शैर च पूजे। ते जेसलै ओ अपने चेलें ते एक बड़ी पीड दे कन्ने यरीहो शैर चा बार जा दे हे ते बरतिमाई नां दा एक अन्नां पेख मंगने आला, जेड़ा तिमाई दा पुत्तर हा, सेड़क दे कंडै बैठे दा हा।

⁴⁷ऐ सुनीयै के यीशु नासरी ऐ, करलाईयै बोलन लगा, “ए यीशु, दाऊद दी औलाद, मेरे उपर दया करो!”

⁴⁸मते सारें उसी चिडकियै गलाया के, चुप रवो, पर ओ तां पी जोरियै क्रलान लगा, “दाऊद दी औलाद, मेरे उपर दया करो!”

⁴⁹यीशु ने रुकियै आखया, “उसी बुलाओ।” ते लोकें ओस अन्नें गी बुलाईयै आखया “इम्त रख, ओठ! ओ तुगी बुला दा ऐ।”

⁵⁰ते ओ अपना कपड़ा सुट्टीयै तौलै उठया ते यीशु दे कोल आया।

⁵¹एदे उपर यीशु ने जबाब दिंदे ओई आखया, “तू के चानां ऐ के आऊँ तेरे लेई करां?” ते अन्नें ने उसी आखया, “ए गुरु, आऊँ चानां के मैं दिखन लगां!”

⁵²यीशु ने उसी आखया, “चली जा, तेरे बश्वास ने तुगी चंगा करी ओड़या ऐ।” ओ तौलै गै दिखन लगा, ते ओ रस्ते च ओदे कन्ने चली पिया।